يا جماعه بعد إذنكم اللي يقدر يساعدني مايبخلش .

مواصفات السيارة :
الماركة : هيونداي
موديل : جيتز
سنة: 2011
محرك : 1600 أوتوماتيك

المشكلة :

لما بمشي بالعربيه علي أي سرعه منخفضة من أول 10 ل 80 مثلا بحس برعشه أو نفضه أو برجلة . انا معرفش مصدرها ايه ودخت السبع دوخات ولفيت علي الميانيكيه والعفشجيه وبتوع الجنوط والكاوتشات وبردو مافيش أي حل كل واحد أروحله يقولي العربيه مافهاش حاجه في تخصصه ويرميها علي أي تخصص تاني .

محاولات الحل :

شكيت ان البرجله أو النفضه من الموتور . رحت لميكانيكي حطها علي الكمبيوتر والكمبيوتر ماطلعش أي إيرور . لكن رجح ان النفضه دي من الكاوتشات او الجنوط

رحت لبتاع الكاوتش شيكت علي الجنوط لو فيها حاجه والكاوتشات وكان الرد انهم زيرو . خصوصا ان انا جايب أربع فرد جداد من 6 شهور . وحالة الجنوط كويسه وحتي لو فيهم حاجه مش هتبان الي سرعة 10 أو 20 .

رحت لواحد تاني بتاع كاوتش كشف عليهم وقالي نفس الكلام انهم زيرو . وقام رافع العربيه علي المجري وخلي حد يدورها ويدي غيار علي d وقام قالي انزل اوريك حاجه . وراني الكوبلن الداخلي ناحية اليمين بيرف وقالي هو ده سبب المشكله ولازم يتغير .

طبعا قلت أتأكد من عفشجي . رحت ل تلاته عفشجية قالولي الكوبلن سليم . ومدام العربيه مرفوعه عن الارض يبقي لازم هيرف معاك ده طبيعي . مشاكل الكوبلن الداخلي بتبان من أول سرعة 60 او لما احيب أشد بالعربيه مره واحده مع دوس البنزين او في مطلع مثلا .

واحد عفشجي تاني جرب العربيه وهو ماشي بيها جايب الفتيس علي n وقام طافي الموتور خالص . قالي دي لو حاجه في الكبالن أديني فصلته خالص يبقي دي حاجه من الجنوط او الكاوتش وفعلا العربيه مطفيه وماشيه بالدفع الذاتي وكان فيها نفس النفضه او البرجله .

انا مش عارف اعمل ايه ومش فاهم العيب منين بس اللي لاحظتو . ان العربيه بعد ما بتسخن وهي علي السلانسيه ال rpm بيكون علي 700 هل دي كده مشكلة كهربا ضعيفه ؟ طيب لو الكهربا ضعيفه العربيه هتفضل تبرجل حتي لو هي مطفيه ؟

ياريت تساعدوني بجد عشان تعبت جداااااااا.