الموضوع: لمبة الزيت بتنور

السلام عليكم :
عندى مشكله لمبه الزيت نورت وطفت وبعد كام يوم نورت تانى بس مطفتش وقست مستوى الزيت سليم ولسه ميعاد تغير الزيت مجاش ممكن تساعدونى يا شباب وتقلولى اعمل ايه وممكن يكون السبب ايه ?

نصيحه افحص طرمبة الزيت و افحص الحساس نفسه و متكبرش عشان عمل عندى كده و قلت ادام المقاس تمام خلاص و اتارى المشكله كانت الطرمبه نفسها بتهيس لحد ما جابتلى طقم سبيكه

الراجل ده محترم واداك نصيحه صح جدا مش شرط مستوي الزيت لان مستوي الزيت ممكن يكون مناسب وزياده عن المناسب كمان لكن الطلمبه مش قادره تضغط زيت يوصل لكل اجزاء الموتور فطبعا حضرتك تقيسه تلاقيه مضبوط فتقول خلاص .. لا طبعا
افحص ضغط طلمبه الزيت مش عارف الكلام ده حد هيقدر يعملهولك في الشارع ولا هيبصولك اكنك من المريخ .... بس لو روحت التوكيل هيقيسوها لانها برضه ممكن تكون شغاله بس بكفاءه مش موصل زيت لجميع اجزاء الموتور لو احتجت حاجه اسال تاني بس ادعيلنا من قلبك

شكرا eng.wesam
وللاسف ساعات لما بنروح لميكانيكى او صنايعى اساله على حاجه يبصلى كانى عبيط و يقولى مفيش حاجه اسمها كده
بس عادى احنا فى ام الدنيا ده طبيعى

ده فعلا حقيقي بالمناسبه انا مهندس ومش برتاح الا لما بشتغل بايدي الناس بتهزر في ارواح الناس ولو عايز اقولك ضغط طلمبه الزيت عند سعادتك كام من فضلك سيبلي موديل العربيه وسنه الصنع وسعه الموتور وهجيبلك بيانات من سيستم توكيلها بأمر الله

تشرفت بمعرفة حضرتك انا كمان مهندس معمارى بس حاليا شغال تنفيذى انت عارف ام الدنيا بقى )مصر (
انا كمان بحب اشتغل ب ايدى خصوصا ان عربيتى قديمه شويه
ولو فيها تقل منى شويه كان ليا استفسار صغير
انا هسقط موتور بفتيس الاسبوع الجاى
اجيبه من الوكاله ولا من عزبة شلبى؟؟؟
انا عربيتى بولونيز 88
و هجيبه 1600 لان ال 1500 كله تعبان و خفبف و مشاكله كتير
بس الموجود فى السوق انجكشن
هل اشغله على كده ولا اقلبه كربراتير

مفيش اي تقل اطلااقا وارجوك متقولش كده الناس بالناس واختلافنا رحمه
بالنسبه للموتور اللي هيحددلك عزبه شلبي ولا الوكاله حاله الموتور ممكن اقولك علي اختبارات الاستاندر بس مش عارف هتعرف تعملها ولا لاء .... انت هتشتري علي اساس ايه انا مجبتش مواتير قبل كده يعني بتاخد ميكانيكي يكشف ولا بتاخد ضمان مثلا ابقي فهمني العرف بتاع الناس دي ايه

نيجي بقي للمحور التاني الانجكشن سيستم vs الكاربوراتير
لازم تعرف ان الانجيكشن بيشتغل بكنترول يونيت لازم تجيبها مع الموتور وبعدين بيشتغل علي عده حساسات اقل حاجه مثلا حساس قياس الاكسجين اللي بيسموه حساس شكمان وحساسات تانيه كتير مش بخوفك بس منظومه الانجكشن كومبليكيتيد شويه لانها جيل تكنولوجي منفصل خالص عن الكوربوراتير ومربوط كله ببعض بنظام فيد باك من غير ما ادوشك يعني لازم يكون فيه حساس علي الكرنك عشان يعرف يطلع التريجر امته بتاعت السلندرات وترتيبها يعني في اللحظه دي هيدي امر اشعال لمين معايا ؟؟؟
المنظومه في حد زاتها ممتازه بس السؤال هل ليها قطع غيار يعني علي الاقل هتلاقي مثلا رشاشات ؟؟؟ هتلاقي حساسات ؟؟؟

الجزء الثالث
بص في حاله ان مفيش حد متخصص رايح معاك لازم تختبر كبس الموتور وينفع علي الارض كمان بس هتغرم حوالي 400 جنيه
هتجيب عده اختبار الكبس وهتفصل البوبينه خالص هتشيل البوجيهات من الاربع سلندرات وهتركب في اول اسطوانه سوكت جهاز الاختبار مكان البوجيهات وتدور مارش لا يقل عن 10 ثواني وتقيس اعلي ضغط طالع استندر الموتور اللي بتتكلم عليه
الحد الادني للضغط 9.2 بار يعني كده اقل حاجه يعتبر عندها مقبول بنسبه 65%
الحد الاعلي للضغط 10.2 بار وده اعلي قيمه وطبعا كده المحرك ايديال جدا ومثالي
وهتقيس بنفس الطريقه الاربع اسطوانات
ده بقي هيغنيك عن مليون اختبار يعني لايمكن تلاقي موتور ضغطه عالي ومحبوك اوي وبيسرب زيت مثلا هيجيب الضغط ده منين لو بيسرب ... فهمتني ياهندسه ؟ ؟
اي حاجه تانيه بتبقي سهله يعني طلمبه زيت ولا طلمبه مايه سهله تتجاب اسبراتير سهل بس لو في تفاوت كبير في الضغط يبقي معملناش حاجه
اخير اي معلومات فنيه اكتر داتا شيت يعني معاك وهجيبهالك من سيستم الشركه
لو الموضوع عجبك بنسبه 50 % مش مطلوب اكتر من ان سيادتك تدعيلي

المشاركة الأصلية كتبت بواسطة eng. wesam

الجزء الثالث
بص في حاله ان مفيش حد متخصص رايح معاك لازم تختبر كبس الموتور وينفع علي الارض كمان بس هتغرم حوالي 400 جنيه
هتجيب عده اختبار الكبس وهتفصل البوبينه خالص هتشيل البوجيهات من الاربع سلندرات وهتركب في اول اسطوانه سوكت جهاز الاختبار مكان البوجيهات وتدور مارش لا يقل عن 10 ثواني وتقيس اعلي ضغط طالع استندر الموتور اللي بتتكلم عليه
الحد الادني للضغط 9.2 بار يعني كده اقل حاجه يعتبر عندها مقبول بنسبه 65%
الحد الاعلي للضغط 10.2 بار وده اعلي قيمه وطبعا كده المحرك ايديال جدا ومثالي
وهتقيس بنفس الطريقه الاربع اسطوانات
ده بقي هيغنيك عن مليون اختبار يعني لايمكن تلاقي موتور ضغطه عالي ومحبوك اوي وبيسرب زيت مثلا هيجيب الضغط ده منين لو بيسرب ... فهمتني ياهندسه ؟ ؟
اي حاجه تانيه بتبقي سهله يعني طلمبه زيت ولا طلمبه مايه سهله تتجاب اسبراتير سهل بس لو في تفاوت كبير في الضغط يبقي معملناش حاجه
اخير اي معلومات فنيه اكتر داتا شيت يعني معاك وهجيبهالك من سيستم الشركه
لو الموضوع عجبك بنسبه 50 % مش مطلوب اكتر من ان سيادتك تدعيلي

مشاركة المهندس احمد عبد الفتاح فى موضوع سابق .....

تاخد بوجيه وتطلع على الخراط وهو يعملك الادابتر ده نحاس من ناحية سن دكر زى البوجيه بالظبط ومن ناحيه التانية سن ربع بوصه npt عادى
وعموما سن البوجيهات فى الغالب بيكون يا ١٤ x ١,٢٥ او ١٨ x ١,٥ -انا بافصل الاتنين فى مخرطة عندنا فى اسكندرية ب ١٥ جنيه يعنى الواحد بسبعة جنية ونص