اعمل ايه كل شويةطرمبة البنزين تبوظ ف byd

**r_elghareeb** · 05-08-2016 09:33 AM

كان عندي مشكلة ف ان العربية تكتم مني مره واحده ع الطريق ويبقاش فيها ضغط بنزين وتقعد تهدي لغاية متوقف العربيه شويه ويرجع ضغط البنزين قولولي غير قلب الطرمبة غيرتها

- بعدها بكام يوم مش عاوزه تدور خالص فك الطرمبه وقلي الخرطوم اللي جوا الطرمبه مقطوع غيروا وجاي يدور العربيه مش راضيه تدور فشاف الكهربا بلاقي الكهربا اللي داخله الطرمبه شويه تكون شديده وشويه تضعف غيرنا القلب تاني اشتغلت وبقيت كويسه وبرر لشده الكهربا وضعفها ان القلب عامل مقاومه

-بعدها ب يومين نفس العيب رجع تاني روحت جبت طرمبه كامله نظيفه قولت اكيد ده العيب اول مركبتها زي الفل وبتضخ بنزين كويس ف نفس اليوم العربيه مره واحده تهدي وتقف ادور تاني شويه وتشتغل تاني بس بدور كل بس بتفصل كل شويه

- ملاحظه : لما مكنتش بدور حطينا بنزين ع البوابه دارت ع طول
كشفت عليها كمبيوتر عند الميكانيكي قلي مفيهاش حاجه مفيش اررو خالص

بجد انا قرفت وصرفت كتير .. قولولي اعمل ايه

**sherif_mahalla** · 05-08-2016 11:05 AM

هي طرمبة البنزين عندك بكام؟
أولا ممكن يكون العيب في فلتر البنزين
راجع و غيره بواحد أصلي جديد
ثانيا ممكن في البنزين نفسه
راجع الأوكتان - يعنى لو بتفول 80 جرب 92 أو 95
و غير البنزينة اللي بتفول منها
يعني لو قديمة شوف بنزينة جديدة
لو مصر للبترول جرب وطنية
ثالثا ممكن المشكلة عندك في الكهربا
ممكن البطارية تعبانة و عايزة تتغير أو تعلى
ممكن مركب حاجة ساحبة البطارية ( زينون - ساوند سيستم)
ممكن حاجات تانية كتير
المحرك فيه مشكلة
زي الزيوت - البوجيهات و سلوكها و بابا غنوجها - السلندرات و وشوشها و جوانتها و شنابرها و حكاويها

نصيحة أخيرة
متبصش عالعطل بعين البصمجي أو المكروتاتي
بص بعين المهندس أو الصنايعي
يعني حلل المشكلة عشان تتحل
متاخدش قرصين مسكن عشان الصداع
و تسيب سبب الصداع
لأنه هيزيد و مش هيبقى بس صداع

و بالتوفيق

**sherif_mahalla** · 05-08-2016 11:09 AM

و غالبا هي مشكلة كهربا
لأنك بتقول الكهربا اللي داخلة بتزيد و تنقص

**م/أحمد عبد الفتاح** · 05-08-2016 12:36 PM

طلمبة البنزين فى اى عربية بيبقى ليها فيوز وريلاى فى علبة الفيوزات - اكشف على الريلياى او غيره وشوف جايحصل ايه - كمان خلى بالك لو طلمبتك من النوع اللى بيبقى جوة التانك بخراطيمها للاسف الخراطيم دى مش بتتباع لوحدها بتيجى مع الطلمبة الكاملة ولو حطيت خراطيم من اللى فى السوق بتبوظ بعد يومين تلاتة .

**r_elghareeb** · 05-08-2016 07:02 PM

شكرا ليكو جميعا

تحديث ع كلامكو انا مشيت ورا خط البنزين ملقتشي اى انسداد
غيرت فلتر البنزين وغيرت البوجيهات وغيرت كتاوت الطرمبه وبرضو مفيش فايده
في كهربائي قلي ممكن يكون الريجلاور (راجع التانك )مكتوم بالطرمبه تتخنق لغايه ما تبوظ و ممكن تكون الطرمبه وخدا ارضي فتضرب بسرعه

**r_elghareeb** · 05-08-2016 07:08 PM

المشاركة الأصلية كتبت بواسطة sherif_mahalla

هي طرمبة البنزين عندك بكام؟
أولا ممكن يكون العيب في فلتر البنزين
راجع و غيره بواحد أصلي جديد
ثانيا ممكن في البنزين نفسه
راجع الأوكتان - يعنى لو بتفول 80 جرب 92 أو 95
و غير البنزينة اللي بتفول منها
يعني لو قديمة شوف بنزينة جديدة
لو مصر للبترول جرب وطنية
ثالثا ممكن المشكلة عندك في الكهربا
ممكن البطارية تعبانة و عايزة تتغير أو تعلى
ممكن مركب حاجة ساحبة البطارية ( زينون - ساوند سيستم)
ممكن حاجات تانية كتير
المحرك فيه مشكلة
زي الزيوت - البوجيهات و سلوكها و بابا غنوجها - السلندرات و وشوشها و جوانتها و شنابرها و حكاويها

نصيحة أخيرة
متبصش عالعطل بعين البصمجي أو المكروتاتي
بص بعين المهندس أو الصنايعي
يعني حلل المشكلة عشان تتحل
متاخدش قرصين مسكن عشان الصداع
و تسيب سبب الصداع
لأنه هيزيد و مش هيبقى بس صداع

و بالتوفيق

انا بستخدم بنزين 92
غيرت البوجيهات
غيرت الفلتر قريب
غيرت زيت
غيرت فلتر الهواء - غيرت الكاتاوت وطبعا غيرت 2 قلب طرمبه وف الاخر جبت وحدا جديده

الفكره ان العربيه لما غيرها القلب بتمشي زي الفل وبعدها بشويه ترجع تاني العيب

في حد قلي ممكن يكون الريجلاور او الطرمبه وخدا ارضي

**ahmed.biso13** · 05-08-2016 07:36 PM

ممكن يكون الكنترول اخر حاجة تجربها
لانه المسئول عن ضخ كهرباء للعربية بالزيادة او النقصان

**م/أحمد عبد الفتاح** · 05-08-2016 08:20 PM

المشاركة الأصلية كتبت بواسطة r_elghareeb

انا بستخدم بنزين 92
غيرت البوجيهات
غيرت الفلتر قريب
غيرت زيت
غيرت فلتر الهواء - غيرت الكاتاوت وطبعا غيرت 2 قلب طرمبه وف الاخر جبت وحدا جديده

الفكره ان العربيه لما غيرها القلب بتمشي زي الفل وبعدها بشويه ترجع تاني العيب

في حد قلي ممكن يكون الريجلاور او الطرمبه وخدا ارضي

هل الطلمبة إللى إشتريتها كاملة زى اللى فى الصورة دى؟؟؟؟

خلى بالك من الخرطومين اللى عليهم سهم دول بييجوا مع الطلمبة الكاملة راكبين فيها وهما بيركبوا بالتسخين فى المصنع وصعب فكهم من غير مايتقطعوا ومتصنعين من مادة مقاومة للبنزين لأنهم جوه التانك والبنزين بيبقى جواهم وبرضه حواليهم . لو اتغيروا بأى خراطيم من السوق الخراطيم بتتسد وتبوش وتسد الدنيا والطلمبة تبوظ .