الموضوع: تقريري عن سوزوزكي سياز صاحبه الضجه السعريه

بسم الله الرحمن الرحيم
بكل حياديه وبعيدا عن الحوار المنتشر مؤخرا في كل منتديات العربيات و الفيس وهو التعصب الغريب من كل شخص لعربيته على فكره ان العربيه يبقا ليها سعر في السوق واعاده البيع وده ضد مبدأ اننا نعرف بكل حياديه مميزات وعيوب العربيه

انا بقارن اداء العربيه ب لانسر بومه ١٣٠٠ مانيوال و افيو ١٥٠٠ اوتوماتيك

الموتور .. العربيه نازله على اساس ان الموتور ١٤٠٠ وده مش حقيقي العربيه ١٣٧٣ مللي حقيقي وهو شئ غريب علما بأن الانسر ١٣٠٠ كاملين و الافيو ١٤٩٨ ... مش القضيه المهم ان الموتور صوته هادي وسحبه في الاول عادي جدا لكن بعد سرعه ٦٠ تحديدا بتحس انه عنيف جدا وممكن تجيب بيه سرعات عاليه وتشد بيه وتغرز بيه وكده لكن لحد ال ٦٠ اكرر عادي جدا يمكن اقل من الافيو ( وجهات نظر ومحدش ياخدها شخصيه)
من ٦٠ وانتا طالع جميل جدا الصراحه و ناعم ومتحسش انك شديت بيه الا لما تلاقي نفسك على ١٣٠ مثلا ومازال تحفظي وقلقي على حته ال cc دي قائم وربنا يستر مع الوقت كفائته متقلش

الفتيس عادي ٤ سرعات ناعم جدا الصراحه واستجابته رائعه مفيش تعليق الا ان العربيه لما وصل تمنها ١٨٠ بقا فيه مقارنه ان مفهوش steptronic وتتحسب عليه

العفشه طريه واحلي من العربيتين التانيين
العزل جميل
البور خفيف احيانا وتقيل احيانا معرفش ازاي
التكييف رائع جدا يمكن لايؤثر على السحب نوعا ما
الثبات جميل جدا لحد ١٤٠ ولسه مجبتش اكتر من كده
التقفيل .. وحش بالنسبه لعربيه ب ١٨٠ الف جنيه .. احسن من الافيو واسوأ من البومه ( هتلاقي حتت كتير مفارقه و بتروح وتيجي معاك زي بلاستيك الابواب الداخلي ) لكن الخامات المستعمله جيده ( يعني مثلا الكيا ريو الخامات احسن بكتير والتقفيل برضه وهما الاتنين في نفس رنج السعر مثلا ) ودي حاجه دايقتي جدا
المشكله الفظيعه العربيه اكصداماتها ورق اكرر ورق اكرر ورق وليس لها اي تدعيم داخلي لو عجله خبطت الاكصدام الخلفي فهي قادره على خلعه من مكانه وحقيقه فعلا .. انا رشيته بعد ٥٠٠ كيلو بس من بوسه عربيه ليه مش خبطه لا بوسه بس !!!! وانا اللي كنت متحفظ على اكصدام الصني ( الحمد لله )
لكن الصاج كويس وتقيل
مشكله بالنسبالي المرايات لا تطوى باليد لازم بالزرار اللي من جوا مش مع اللوك ودي حاجه تدايق لأنك ممكن تنساها وبالتالي عرضه للكسر
للتلخيص :

العربيه في مجملها اقدر اقول كويسه ولكن اهم نقطه وهيا حق ربنا العربيه دي مشكلتها الوحيده ان الوكيل بتاعها وتجارها نسو نفسهم و سرحو بسعرها لممر الخيال وبالتالي ظلمو العربيه معاهم
(العربيه بتطلع من نفس مصنع ماروتي اللي في الهند وواضح ان العامل الهندي برضه ميتخيرش عن العامل المصري كتير في قله الضمير والكروته في التفنيش )
يعني اخر تمنها ونبقا كارمينها ١٤٠ الف جنيه بعد ازمه ارتفاع اسعار العربيات كمان
لكن هبل الوكيل والموزعين دخلها في مكان مش بتاعها خالص وبالتالي ظلمها
انا لا اتحيز لعربيه حتى لو كانت مرسيدس
كل عربيه فيها مميزات وعيوب يمكن اللي شافها وجابها ب ١٣٠ و ١٤٠ مقدرش يشوف اللي اتا شفته ده عيوب
بس اللي جابها ب ١٨٠ او بيفكر يجيبها لا دي فعلا عيوب
التوكيل بقا لسه متعاملتش معاه .. فمقدرش احكم
واللي هيسأل انا اشتريتها ليه لأن انا كنت بسمع فيها شعر فقررت اشتريها والحمد لله
واي استفسار انا تحت امركم

المشاركة الأصلية كتبت بواسطة mk3

هو اى نعم صاحبك اياه هو اللى بدأ يلقح عليك بس انت انظف من كده وانسان كويس ومتشخصنش العربيه عشان واحد انا عارف ان هو اللى بدأ يشاكسك

هوا ايه الموضوع !!؟؟
متفهمونا معاكم يا جماعه