الموضوع: رحلتى مع البومة منذ اتخاذ القرار وحتى صيانة الالف كم - فضل من الله

اصدقائى اعضاء المنتدى الجميل
انا منذ ان اتخذت قرار بشراء سيارتى البومة 1600 وانا من حين لآخر ينتابنى شعور بالرغبة فى كتابة موضوع ما خاص بأمر ما وكنت فى كل مرة اتراجع لسبب واحد وهو ان اجمع تجربتى بالكامل واحكيها لكم:
فى البداية اتخذت قرار بشراء سيارة كبيرة بالتقسيط وانا كان معايا لانوس وللعلم انا من الفيوم.
احد المعارض بالفيوم وهو معرض محترم جدا استقريت على الشراء من عنده وكنت محتار جدا بين الانسر البومة وبين الالنترا .. وبدأت اصعب مراحل الرحلة وهى اتخاذ القرار
لم اكن عضوا فى المنتدى الجميل حتى هذا التاريخ - احد الاصدقاء دلنى عليه وبدأت استعراض كافة المقارنات والاسئلة والاجوبة الخاصة بالموضوع
وكان لاعضاء متسوبيشى داخل المنتدى وعلى رأسهم مهندسنا العزيز طارق زويل فضل كبير فى حسم المسالة لصالح اللانسر البومة
وتوكلت على الله وصليت استخارة وذهبت للمعرض واتفقت معاه ودفعت المقدم 60000 جنيه من اصل ثمن العربية حسب المتفق عليه حينها 103000 جنيه للانسر البومة 1600 اوتوماتيك الكلاسيك خليجى سعودى وده كان يوم 3/9/2008/ 3 رمضان وسلمته صورة البطاقة ووصل كهرباء وخطاب يفيد متوسط الدخل من الشغل حسب طلباته. واتفقت معاه ان الاستلام سيكون خلال 15 يوم من تاريخه.
وللاسف تأخر موعد الاستلام ويوم يجر يوم وهو صارحنى بأن المشكلة هى الاستلامات فى الجمارك ومشاكل المستوردين .. الخ وانا الحقيقة كنت ولازلت مصدقه.
المهم استمرت عملية التسويف والتأخير وانا صابر خصوصا بعد علمى من المنتدى ومصادر اخرى وبسؤالى فى معارض كثيرة فى الفيوم والقاهرة علمت ان العربية أغلى من كده بكتير حتى وصلت بتوكيل المصرية الى 114000 جنيه. وبالتالى لم يكن هناك مفر من الصبر.
وفى يوم 18/10/2008 يعنى بعد 45 يوم فوجئت باتصال من المعرض بأن سيارتى وصلت وفرحت جدا طبعا ورحت مساء انا وابنى واستلمنا العربية وكانت الحقيقة فى افضل حالاتها لم يكن بها ما اسمع عنه انها احيانا ممكن يكون فى خدوش رفيعة او واضح عليها الاستعمال او ماشابه ذلك ، المهم انى استلمتها بحالة ممتازة ووعدنى بأن اجراءات البنك والافراج لن يتأخرا اكثر من اسبوع واستلمتها رغم ذلك نظرا لثقة صاحب المعرض فيا وعلاقتنا الشخصية وبدأت استخدام العربية فعلا وكانت عاملة 143كم اعتقد منها حوالى 100 كم خاصة بطريق الفيوم لانها وصلت ماشية من القاهرة الى الفيوم حسب كلامهم معايا
وللمرة الثانية تبدأ رحلة التسويف والمماطلة واعتقد فى هذه المرة كان السبب هو البنك وخصوصا بعد حدوث الازمة المالية وخروج بنوك كتير من عملية تمويل قروض السيارات، وانا اصلا الحقيقة ماكنتش مرتاح اوى لحكاية القرض البنكى علشان كان نفسى فى تقسيط شرعى
المهم بعد 20 يوم وبمتابعتى مع المعرض فوجئت بأنهم يخبرونى بأن البنك رفض التمويل ليس لى وحدى ولكن لكل المعارض وكل العملاء مما يعنى البدء من جديد فى الاجراءات مع بنك آخر.
وحمدت ربنا على كل حال وبدأ المعرض فى الاجراءات من جديد لا اعرف مع اى بنك فى المرة الاولى ولا المرة الثانية ولكنى فى نفس اللحظة لى علاقة بأحد الاصدقاء يعمل فى فرع بنك ابوظبى الاسلامى بالفيوم وتحدثت معه فقالى تعالى قابل المدير فقابلته تانى يوم وقالى احنا ممكن نجبلك العربية ولكن احنا نظامنا اسلامى يعنى لازم نشترى العربية الاول من المعرض وبعدين نبعهالك ولما سألت على المطلوب طلب نفس الاوراق - صورة البطاقة - وصل كهرباء - شهادة دخل - صورة رخصة القيادة ولكنه كمان طلب منى ان اسدد المقدم لديهم وليس لدى المعرض لانى المفروض شرعا سأشترى منهم اى من البنك ولكنه سيسدد بعد ان تأتى الموافقة من ادارة الائتمان واعطانى عرض سعر وطلب منى ان اختمه من المعرض، وبالفعل ختمت العرض وقدمت الاوراق.
بعد حوالى 4 ايام اتصل المعرض بى وقالى ان البنك وافق ولازم اسافر القاهرة علشان امضى مع البنك ونرخص العربية
واحترت هل انفذ ام انتظر البنك الاسلامى وخصوصا انى كنت مرتاح نفسيا جدا فى التعامل معاهم اولا لمشروعية العملية وثانيا لانهم فى الفيوم والبنك كله تقريبا اصدقائى. ولكنى خفت لو انا لغيت مع البنك بالقاهرة تروح عليا الفرصة وفى نفس الوقت ان يرفض بنك ابو ظبى
فقلت اروح واشوف
ورحت وللاسف شفت العجب، البنك اسمه بلوم مصر - فرع المهندسين
بداية طلبوا منى فتح حساب جارى طرفهم ففتحت الحساب ، مطلوب ايداع مبلغ 110 جنيه عبارة عن مصاريف فتح الحساب ومصاريف اصدار دفتر شيكات للتوقيع عليه فدفعت.
وبمناقشة الموظف عن الضمانات التى سوف يأخذها البنك فأخبرنى بمنتهى التعالى والعجرفة بالاتى:
التوقيع على عشرة شيكات على اعتبار التقسيط على خمس سنوات وهو سوف يأخذ شيك لكل ستة اقساط ولكن المدهش انه طلب ان يأخذ 10 شيكات على بياض بدون تدوين تاريخ استحقاق الشيك او مبلغه!!!!!!!!!
وصل امانة موقع على بياض بدون مبلغ او تاريخ!!!!!!!!!!!!!!!!!!!1
سند لامر موقع على بياض بدون مبلغ او تاريخ !!!!!!!!!!!!!
تفويض للبنك بتحرير الشيكات ووصل الامانة والسند فى اى وقت بأى مبلغ.
عمل توكيل للبنك بالعربية للتصرف فيها .
نسخة مفتاح.
ههههههههههه وطبعا حينها ابتسمت وقلتله واجيبلك ابنى رهن بالمرة لغاية لما اخلص الاقساط. فكانت اجابته ملخصها ان هو ده نظامهم واللى مش عاجبة ....
وطبعا رفضت تماما وانهيت المسألة معهم وطبعا بعد مادفعت الـ 110 جنيه.
وكانت المفاجأة انه ولله الحمد رد عليا بنك ابو بظبى تانى يوم وتصوروا ردوا عليا كان يوم الثلاثاء اللى فات يوم 25/11 بالتحديد كانت الساعة 11.30 صباحا وطلب منى مدير البنك ان يذهب اليه صاحب المعرض ويبعلهم العربية وبعدين اروحلهم انا اوقع لهم الاوراق وبعدها استلم اوراق العربية للمرور وفعلا ذهبنا للبنك وبدأنا فى توقيع الاوراق ووقع صاحب المعرض على مبايعة بالعربية ثم بدأت الاجراءات معى وطبعا انا كانت لدى هواجس من تجربة بنك بلوم فسألت مدير البنك عن الضمانات فقال لى شيكات بنكية على اى حساب لى فأخبرته انى سأوقع له الشيكات محررة بتاريخ ومدون بها المبلغ وكذلك مسطرة اى لا تستحق ولا تصرف ولاتقدم للبنك قبل تاريخها فوافق فورا بدون اى انزعاج.
وبالتالى وقعت له الشيكات فقط بالاقساط وطبعا بدون توكيل ولا نسخة مفتاح ولا اى شىء زيادة (الشىء الوحيد الزيادة انه طلب شيكات بقيمة بوليصة التأمين المستحقة عن السنوات المقبلة اربعة شيكات محررة بمبلغ بوليصة عن كل سنة وفى تاريخ استحقاق البوليصة) واخذت ورق المرور ورخصت تانى يوم 26/11/2008 الحمد لله.
وفى نفس اليوم وبعد الترخيص ذهبت للبنك حوالى الساعة 1 ظ بالرخصة فصوروها وطلب منى الاتصال بصاحب المعرض وجاء للبنك وخرجنا من البنك الساعة 2.30 ظ ومعاه شيك بكامل قيمة العربية
والله انا ماتصورت ان هناك معاملة مع بنك او مرونة واداء مثل مارأيت، وعلى فكرة انا كلامى عن بنك ابوظبى الاسلامى لان هناك مايسمى بنك ابوظبى الوطنى وهو بنك آخر .
بعد يومين بدأت اكتشف انى قد مشيت بالعربية خلال هذا الشهر حوالى 1000كم وراسلت المهندس طارق زويل وحدد لى مشكورا يوم السبت الماضى لعمل صيانة الالف وذهبت هناك فعلا (مركز الخدمة بقليوب) وتمت الصيانة لكن للاسف لم احظ بلقاء المهندس طارق لانه كان اجازة هذا اليوم – هكذا اخبرونى-
اسف للتطويل ولكنى حبيت احكيلكم عن هذه الرحلة
اما انطباعاتى عن السيارة منذ استلامها وبعد صيانة الالف كم فإن شاء الله تكون فى مشاركة اخرى غدا.
لكم كل التحية

صاحب المعرض باع لبنك ابو ظبي من غير مياخد فلوسه واستني لما رخصت والعربيه بقت باسمك علشان ياخد الفلوس حد يفهمني كده ايه الفرق بينه وبين بنك ناصر مثلا او اي بنك وليه بنك ابو ظبي مداش صاحب المعرض الفلوس الاول