الموضوع: بعد زيادة الكهربا ...............هل من مفر واين المفر؟

المشاركة الأصلية كتبت بواسطة volociximab

انا فاتورة الكهربا الشهر ده 500 ريال
250 استهلاك الشهر و 250 ضايفهم ماعرفش منين
يعنى ما يعادل 1600 جنيه

مع احترامي وتقدير لسيادك
بس ماتقرنش سعر الكهرباء اللي ضربته في جنيه وتقول انا بدفع 1600 جنيه
لو ضربت مرتب حضرتك برده في العمله هتلاقيه معدي دخل وزير في مصر

الحسبة مش بتتحسب كدا خالص
علي فكرة انا قاعد في الامارات وفتورتي 540 درهم الشهر داه
بس انا عارف ان داه بالنسبة للدخل لا يقارن فتورة كهرباء في مصر بالنسبة لدخل الفرد

وطبعا لازم يتقاس سعر اي شي بالنسبة لدخل الفرد

ومحدش يقولي الراجل بيقول تكيف انه عايز يعيش حياة مرفهة
داه اقل حق انه يقدر يعيش ويعيش اولاده ويوفي احتيجاته اليومية

انا متاكد ان صاحب الموضوع انسان متعلم ومن الطبقة المتوسطة اللي كلنا ننتمي اليها
ونفسنا نعيش حتي لو اللي جي علي اد اللي رايح

بس الحال دلوقتي مفيش جي والرايح كتير

الواحد بجد مقهور
نفسي ارجع واربي عيالي زي ماتربيت في مصر انا مش بقالي كتير هما 3 سنين
بس كل واحد مغترب بيدفع كتير في غربته

بيدفع بعد عن اهل وحسبة كل شهر من شيك سكن لكهربا لقسط هنا وقسط هنا
وتحس انها مش جيبة همها ومتقوليش كفاية انك عايش كويس
انا صحيح عايش عيشة ادممين
لكن ولادي ميعرفوش يعني ايه بيت عيالة ومشاركة فرح وحزن اهالينا والاخ واقف جنب اخوه

احنا بنخسر كتير اوي قصاد كام جنيه لما نرجع مش هيعمله اي حاجة في بلد ضمير حكومتها مات

حسبي الله ونعم الوكيل

هي خطوة صعبة و مش سهل ان حد يتقبل زيادة سعر اي حاجة عليه بس هي شر و لابد منه..
انا مش مع فكرة الدعم الصراحة و اعادة هيكلته كانت لازم تحصل من بدري اوي لانه بلاعة بتشفط ايرادات الدولة و في الاخر بيتوجه لغير مستحقيه اللي كتير مننا منهم بما فيهم الطبقة المتوسطة..
على الرغم من الزيادات دي لكن مصر مازالت تعتبر من الدول اللي المعيشة فيها رخيصة و سهل ان الفرد يعيش كويس و يحوش و ده مش موجود في اغلب الدول الاكثر تقدماً اللي بالكاد تقدر تكمل الشهر بعد كم الضرائب و الفواتير اللي شبه بتاكل دخل الفرد كله و ناس كتير بتضطر تشتغل اكتر من شغلانة عشان تقدر تعيش..

للمرة الثانية اؤكد لحضراتكم ان الكهرباء فى ظل انخفاض سعر الوقود والمساعدات من المملكة السعودية غير مدعمة
الانكى من ذلك ان الجهات السيادية عليها متاخرات 60 مليار جنيه لم تسدد استهلاك كهرباء
تقبلوا تحياتى

Mohamed212
كلامك صحيح و لكن هذه هى الدنيا

المشاركة الأصلية كتبت بواسطة karim alaa

لا حضرتك عايش فيها و طافح كل مرارها و سيادتك خلطت اوراق كتير جوا بعض مفيش بلد مبتفرض ضرايب و جمارك و نسبتها متهمتنيش فى شىء حضرتك بتتكلم على الاستيراد الى انا فوق برضه كاتب ان دعمه حاجه تقرف زيها زى دعم الاستهلاك مرض و سم ماشى فى جسد البلد بيغلى علينا كل شىء و بيدمرنا حرفيا و انا و انت ممكن نجيبله الف مبرر بس عشان نتراح نفسيا رغم انه مش مريح اقتصاديا و لا بيورفلنا انا و انت جنيه واحد بالعكس بيطبعو الفلوس و نتبهدل احنا

مفهمتش حضرتك قصدك ايه بمبدا المساواه و العدل ايه علاقه مساواه و عدل بالدعم المريض فى كل شىء استهلاكى يا سيدى الغالى حان وقت وقف دعم الاستلاك و دعم الانتاج حضرتك عشان عايش فيها عارف كويس ان كل شى مدعم الناس بتستدخدمه باكثر من احتياجها ليه بمراحل صح و لا ده كلام ؟

حضرتك لما بدعم استهلاك بزود استهلاكه و بضغط على اقتصاد منهار الصح دعم انتاج دعم فلاح دعم مصدر

و فى النهايه انا عارف ان ردى صعب و قولت فى اول كلمه ليه مش هيعجبك عشان احنا اتربينا كده :) لو خدو الدعم هنموت كفايه غلا و اصلا الدعم احد اهم اسباب الغلا و هتفضل نطبع فلوس عشان نوصل دعم لناس لا تستحق انها تدعم بربع جنيه و نغلى كل اسعار كل شىء :)

و عاجلا ام اجلا هيتلغى الدعم اما عن قرار اقتصادى اجتماعى مدروس و ناخد الدوا المر و نبقى مسؤلين عن ديونا دى كلها او بعد متخرب مالطا و ميبقاش فى خزنه عشان تدعم و ساعتها هنقول يارتنا دعمنا المنتج و تظ فى الاستهلاك الى فى النهاياه كلنا قادرين نستغنى عنه

يا شباب ده راى و دى اخر مشاركه ليا فى الموضوع انا شاب عندى 30 سنه من منطقه عاديه جدا و عايش نفس الطحنه الى كلكم عايشنها و كمان داخل على جواز و بتسرق من كل حته بس لا يصح الا الصحيح و الاقتصاد مفيش فى مجاملات احتا انا و انت و محمد و حسين و مرقص بندمر نفسنا بنفسنا و مبنستدفش شىء غير راحه نفسيه اسمها انا باخد دعم و بتدفع اضعافه فى غلا الاسعار و انهيار الجنيه

على فكرة دة إلى بتكلم فيه حرفيا بس أختلافنا أن حضرتك فاكر لما الدعم فى بعض الحاجات يقل الدنيا هتبقى حلوة كأن إلى بيتحكموا فى أقتصاد مصر ناس عسل يعنى أنت مصدق أن الحكومة لما تقلل الدعم عن (س ) مثلا بحيث أن الأستهلاك يقل ميبقاش على الفاضى و المليان
هل وقتها الحكومة هتدعم حاجة تانيه زى الصحةأو التعليم أو الزراعة أو الصناعة ؟
طيب هل هتراقب الأسعار ؟
هل هتخفض الضرايب و الجمارك على الأستيراد ؟
طيب هتدعم منظومة الصحة بقرش حتى ؟
طيب الأولى فى الوقت الحالى المراقبة ثم تطبيق ألغاء الدعم بشرط نقل الدعم من شئ لأخر ولا ألغاء الدعم و ربنا يسهل فى المراقبة و الدعم الأخر ؟
طيب شعبنا بالكامل هيبقى اد المسؤولية الرقابيه و من بعدها القانونية فى حالة فرض قوانين و أحكام ؟

و بالنسبه للعدل و المساواة يا سيدى الفاضل
فيه فرق كبير أوى أوى بين الأتنين
و دة الى الناس لسانها دلدل عشان الدعم يوصل لمستحقيه
يعنى مينفعش حضرتك تدعم رغيف العيش مثلا لعامة الشعب الفقير و نلاقى وزير بياكل باتيه بنفس السعر أو ببلاش

فى النهايه ركز فى كلامى هتلاقينى بتكلم صح و أنت بتتكلم صح
بس الفرق بين كلامى و كلامك
أنك فاكر أن الحكومة وقتها هتدعم الصح
و أنا معنديش أمل فى حكومة بتعترف كل يوم بفشلها و بعجز أقتصادها و أمكانيات البلد و أمكانياتها

اذا عندك منتج اساسى يكلفك حتى يصل للمواطن 100 ج ولا يستطيع هذا المواطن ان يشترية بمئة جنيه فتضطر تدعمه ب 50جنيه ليكون سعره 50 ج
والان انخفض سعر المنتج الى 50 ج عالميا وكمان فيه دولة تانية بتديهولك شحاتة ببلاش
اين الدعم الذى تريد ان تسحبه او تخفضه والذى من اجله جعلت سعر المنتج يباع ب 130 ج؟