الموضوع: ترموستات ax

المهم درجة الحرارة ثابته مابين رينج معين
والمراوح بتشتغل عند رنج معين
اما لو فيه سخونه فحضرتك انت غيرت حاجات تمنع اي مشاكل لكن اذا لسا كان فيه مشاكل معاك يبقى انت معالجتش المشكله وعالجت اعراض المشكله لكن لو لسا موجوده لازم تتعالج
اخبار طرمبة المياه ؟ والشكمان ؟ الكهربا والبوجيهات ؟ تقسيمة الكاتينه مرحلة سنة لقدام او لورا ؟ ضغط طرمبة الزيت (خلوص السبايك) او ضعف تزييت درة الزيت ؟ جوان وش السلندر يسرب مياه على دورة الشكمان ؟ الفرامل في اي تقل او عجله قافشه ؟
لو فيه حاجة مش مزبوطه من دول تزيد درجة الحرارة وتعمل مشاكل سخونة معاك

شكراً جدا لاهتمام حضرتك بس الموضوع شكله هيطول معايا انا كنت غيرت طرمبه الميه بردوا و الشكمان بس ايه موضوع السبايك ده؟

موضوع السبايك دي هي اللي بتعمل ضغط الزيت طرمبة الزيت بتنقل حجم فقط لكن السبيكة و الخلوص بتاعه هي اللي بتولد ضغط كان حضرتك ماسك خرطوم وفاتح الحنفيه على الاخر كدا كدا الخرطوم بينقل المياه والحنفية مفتوحه انت لما تحب تبعد المياه اكتر بتضغط على فتحة الخرطوم بايدك فتدي مفعول ضغط اكبر فتنظف اكتر
ونفس النظام في الموتور الزيت غير انه بيزيت البساتم فهو بيبرد الشمايز مع المياه فكل ماضغط الطرمبة زاد كل ما الزيت اتنقل بشكل اسرع فعمل تبريد اكتر
طيب مبدأيا كدا مشاكل السخونه بتيجي من غرفة الحريق( اللي مسؤول عنها وش السلندر وطريقة خراطه وجوان وش السلندر )
لو مخروط قبل كدا المفروض انك تحط جوانين فوق بعض بمقدار القشط لو في حالة كان مقفع واتقشط قبل كدا عشان تعوض النقص في حجم غرفة الحريق والموتور مايسخنش بسرعة
ولو بايظ بيتغير بواحد استيراد هايفرق معاك لما تكون حالته نظيفه
جوان وش السلندر لما يتقفل ويركب غير قابل للفك والتركيب يعني طالما الوش اتحل بيترمي اقصد الجوان او هو بيطلع مقطع لو الصنايعي قفل ونسي حاجه ورجع فك وركب تاني على نفس الجوان يبقى بيغامر بالشغل ودا غلط
العربيه لو اتعرضت لسخونه جامده وماعملتش طحينه ممكن تبقى جابت جوان او الجوان باظ بس مش ظاهر يعني الجوان فوت المياه على كبس غرفة الحريق وليها طريقة اختبار والعربية مبطله افتح غطا الراديتير او القربه شيل فيشة الموبينه دور مارش كزا مره لو المياه نطرت او الكبس طلع من الردياتير او القربة بقللت يبقى فيها جوان لادع او بايظ كمان لو الجوان اتركب مقلوب دا غلط ليه اتجاه في التركيب
حاجة كمان في طبب للمياه جوا البلوك دي لازم تتاكد ان مافيش فيها تسريب وممكن تتغير مع اي صيانه عشان تزبط كبس المياه
ظبط التاكيهات مهم جدا وبيأثر على الحراره جدا.
نوع البوجيهات وخلوص سن البوجيه لازم يتزبط على الفيلر قبل التركيب وتقديم وتأخير توقيت الاشعال في الاسبراتير العاده وكمان ترحيل او تقديم وتأخير او زبط تقسيمة سير الكاتينه مهم جدا وبتأثر .
الرادياتير وطرمبة المياه من العوامل المهمة جدا.
كمان خراطيم المياه لو مشققه او مهرية هاتهرب مياه مع الضغط وكبس الماكنه والتلاته الاخرنيين الراديتير والخراطيم وطرمبة المياه بتختبرهم تحت كبس معين على حسب النظام عندك بمكبس مخصص عشان لو فيه تسريب يظهر

انت الموتور اللي عندك ايه ؟؟؟؟؟
TU3 الماكنة السودا العدلة ١٤٠٠cc بالزبط 1360cc ولا موتور تاني ؟؟؟
الراديتير عامل ازاي ؟مقفول ولا ليه غطا وهل فيه حساس مستوى مياه والقربه فيه ولا لوحدها ؟ نوعه ايه نوع العلب بتاعته نحاس ولا فيبر والعلب على الجناب ولا فوق وتحت ؟ وصدر المراوح دوبل ولا مروحة واحده ؟ بيبقى فيه شرايح فيبر بين صدر المراوح والراديتير راكبه كانها قميص زي البيجو 504 بس صغيره
اخبار كويل تكييف السخن الدفاية لاغيه ولا شغال ؟ هل فيه سربنتينه تكييف خارجية بين الراديتير والمراوح؟
اخبار خراطيم المياه هل في اي توصيلات ولا الخراطيم سليمه ؟

اسف لعدم الرد و شكرا جدا لاهتمام حضرتك الموتور زهر ومكتوب ف الرخصة 1300 cc و لا يوجد سربنتينة لان التكييف مش شغال وبالنسبة للمروحة هي مروحة نوبيرا بالقميص بتاعها و الردياتير الومنيوم و وبه قربة فالجنب فيبر

كمان انا غيرت الكاربراتير عشان العربية كانت بتبطل و متلتة و بعد ماغيرته لاقيتها متلتة بس مابتبطلش

و معلش سؤال انا شايف ان حضرتك متمكن جدا هو حضرتك مهندس ميكانيكا