٥ سنين و ٦٠ الف كيلو مع الdsg

**ahmedyehia515** · 29-08-2016 03:36 AM

السلام عليكم،

أولاً آسف اني مختفي بقالي فترة بس كانت ظروف.

الموضوع ده تكملة للموضوع الأولاني بتاع الDSG

http://www.nilemotors.net/Nile/229591-dsg-6-a.html

الحمد لله العربية عاملة دلوقتي ٦٠ الف كيلو و ربنا يحفظها. المهم بعد ٥ سنين مع الفتيس الجهنمي ده واجب علي احكي تجربتي.

رأيي في الفتيس انو اختراع رائع، مفتكرش موقف أحتجته فيه و موقفش معايا و لحد النهارده مفيش عربية ١٦٠٠ تقدر تطلع مني، مبحبش الجري و ربنا يحفظنا منه بس ساعات بنحتاجه.

ندخل علي الفنيات :
١. الفتيس كفاءته قلت و ده حسيته عشان كل ٣ شهور بطلع علي طريق مفتوح و بجيب آخر العربية : من ٥ سنين كان ٢٣٠كم/ساعة و دلوقتي بقي ٢١٠، فيه ناس بتقول آنو جزء من الموضوع ده انو كفائة الموتور بتقل مع الوقت.
٢. صوت النقلات بقي واضح لو ماشي في شارع هادي و ديه حاجة طبيعية و عيب عام في الفتيس.
٣. فيه نتشه محترمة من الثالث الرابع في حاله الحرق و غير محسوسة لو ماشي هادي.
٤. ساعات بيكون فيه ذي رجه لو هديت في مطب و بعدين كبست بنزين، ذي ما تكون عربية مانييوال بترزع، التوكيل بيقول ده طقم دبرياج محتاج يتغير بس بصراحة مش مقتنع لان الموضوع بيختفي بعد تفويلة ال٩٥ فبصراحة مهندس التوكيل ماقنعنيش.
٥. لاحظت حاجة جديدة لما ابقي ماشي مانييوال، لو دايس بنزين العربية بتبقي محضرة الغيار اللي بعده عشان ده اللي طبيعي هعمله بس لو حاولت تجيب الغيار اللي قبله لأي سبب هتحس انو بياخد وقت اكتر من لازم غير لو شلت رجلك من علي البنزين ساعتها العربية بتحط احتمال انك هتهدي فبتحضر الغيار الأقل. الموضوع مختلف عن المية داون عشان العربية بتنقلك للغيار اللي هيديك اعلي عزم في السرعة ده و بتنقل بال٣ غيارات مره واحدة.
٦. الDSG اللي قعد الفترة ديه كلها في مصر قليل اوي و انا شايف انو بعد ستر ربنا موضوع انو انا سواقتي معظمها بعيد عن الزحمة و لما بتزنق في الزحمة بقلبها مانييوال هو السبب انو لِسَّه العربيةماشية.
ربنا يسترها

ده اخر تحديث لموضوع الDSG و لو حد عنده استفسار انا في الخدمة

السلام عليكم

**Yehya Badr** · 30-08-2016 09:40 PM

أنا مستغرب ليه الفتيس دا فشل في مصر ! هل مش عارفين يعملوا الصيانة بتاعته صح ؟ عموما الحق بيع العربية قبل ما تعملها معاك و ربنا يوفقك

**ahmedyehia515** · 01-09-2016 10:44 PM

مشكلة الفتيس ده انو مش معمول الزحمة و لازم تكون فاهمة عشان تعرف تستفيد منه و موضوع انو طقم الدبرياج عمره الافتراضي مش واضح و سعره غالي و التوكيل بيدفع علي حسب صوتك عالي قد إيه.
من ناحية تانية: انا مشفتش فتيس ذي ده في سرعة أدائه

**Yehya Badr** · 02-09-2016 12:50 AM

مافيش حاجة اسمها فتيس اتوماتيك ما يحبش الزحمة و لا فتيس محتاجة معاملة خاصة ! حاجة من اثنين يا شغال و بيرح الواحد يا مش شغال و يفرف الواحد في عيشته الأتوماتيك تم اختراعه علشان يسهل علي الناس السواقة في الزحمة و غير الزحمة و حتي اوروبا دلوقت ابتدي الاتوماتيك ينتشر عن زمان
في حاجة غلط في تصميم ال DSG , و للأمانة كل ال Dual Clutch Automatic , مخليه عمره الأفتراضي ضعيف

يا رجال عربية والدي التويوتا كريسدا فضلت من سنة 1986 لغاية ما باعها في 2009 الفتيس الأتوماتيك شغال زي الفل يبقي معقول أننا في سنة 2016 بنتكلم عن فتيس اتوماتيك مش شغال !

**ahmedyehia515** · 09-09-2016 10:27 PM

مينفعش تقارن عربية موديل ٨٦ بعربية ٢٠١٦ لسبب بسيط، بنفس سعة الموتور انت بقيت تطلع عزم اعلي و هورس بور اكتر، تطور العربيات بوجه عام جزء كبير منه مبني علي تحسين المواد اللي أي حاجة في العربية بتتصنع منها و تقليل وزنها و زيادة كفائتها بدليل مشكلة الطنابير اللي في الكورولا ٢٠١٦، أكيد يعني مش بعد العمر ده تويوتا طلعت مبتعرفش تعمل طنابير الفكرة انهم لعبوا في السبيكة و تقريباً عكت منهم بس عشان شركة محترمة بتغيرها علي حسابها.
انت لو سقت الdsg هتعرف انو فتيس المستقبل و مشاكل الجيل الثاني منه قلت بكتير و في الموديلات الجديدة قليل اوي اللي بيشتكي منه.

**Samir_Adel** · 11-09-2016 07:18 PM

انا كان معايا اوكتافيا a7 و كانت tsi و فتيس dsg. في الزحمة كنت بماور دايما و اما اجي اركن، كنت بماور و ارفع الهاند و بعد كدة بجيبها علي ال p.. عشان احمل علي التيل مش علي الفتيس.. و بعد كل دة جابت ميكاترونيكس في ال 50 الف كيلو.. عملتها علي حساب الضمان و بعد كدة بعتها و اتقفلت من مجموعة فولكس كلها!