الموضوع: لو بتفكر فيadsl أبعد عن النت من اتصالات ( تجربة سيئة)

في البداية كل التحية لمنتدانا العزيز ادارة واعضاء وآسف لو هاطول عليكم تجربتي مش أول مكان اكتبها فيه هنا وهدفي توعية المشتركين الجدد (من خلال المنتدي المحترم ده ) وللناس اللي بيفكرو يشتركوا في ADSl ابعد عن اتصالات لان واضح ان شركة اتصالات شركة زبالة ومبقاش يفرق معاهم العميل وكمان واضح ان في اجماع علي كده .. تجربتي تجربة سيئة جدا جدا جدا مع شركة اتصالات مصر اسوء خدمة ADSL وأسوء خدمة عملاء في مصر الحكاية بدات لما قررت (ويارتني ما قررت) يوم 13/7 التعاقد علي الخدمة من خلال ال call center علي سرعة 4 ميجا والراوتر جالي يوم 17/7 ومن خلال التلفيون سئلتهم الخدمة هاتتفعل امتي قالولي بطريقة باردة خلال 14 يوم قولت أصبر دي أجرائات تمشي عليا زي الجميع وبعدها الخدمة اتفعلت يوم 20 ولا حد بلغني والله وبفتح الراوتر يوم 23/7 بمحض الصدفة قلت يمكن لقيت لمبة ال DSL منوره اتصلت بيهم قالولي فعلا الخدمة اتفعلت من 3 ايام!!! قلت وماله عادي ما يضرش يلا بقي ياسيدي اعمل اعدادات الراوتر ( حتي ما قاليش الباسورد واليوسر بتاع الخدمة ) قلت وماله جايز مفترض اني مش هاعرف اتعامل مع الراوتر و بعد ما خلص الاعدادات لقيته بيقولي واضح ان في سوء جودة للخط الارضي ( الجملة دي مسببالي ارتكاريا حتي اللحظة دي) اه والله ... نشيل الاسبليتر ونوصل مباشرة مفيش فايده السرعة اللي وصلاني تتراوح مابين 243 كيلوبت الي 450 كيلو بت... وبدا الكابوس عملت شكوي يوم 23/7 واتقفلت يوم 25/7 علي انهم فله شمعة منورة وان المشكلة من المصرية للاتصالات كلمت الاعطال بتاعة المصرية للاتصالات وجه الفني وغيرنا السلك بتاع التليفون ورجعنا تاني للدعم الفني وعملنا شكوي تاني يوم 25/7 اتقفلت زي اللي فاتت بالظبط يوم 28/7 علي ان المشكلة من السنترال مش من عندهم وعلي الحال ده بقيت اكلم السنترال يقولو الخط بتاعك مفيش فيه اي مشكله والتدبيس مظبوط وان المشكلة كده من اتصالات اخر حاجة شكوي يوم 17/8 وموظف الدعم الفني قالي اخر حاجة نطلب لحضرتك زيارة منزلية اذا كانت المشكلة مش من عندك من حق حضرتك التعويض عن الفترة اللي فاتت قلت تمام وسئلني اذا كان يناسبني يوم الاحد 21/8 قلت تمام واستنيت يوم واتنين وبكلمهم كل يوم وحجج فارغة وقلة ذوق تحت داعي ان الزيارة هاتتم بحد اقصي 23/8 رحت دفعت الفاتورة ويوم 24/08 قررت بصراحة اني زهقت واتصلت بيهم ولسه هايهرو بقي في الكلام الفاضي بتاع انا عملت ركويست للمسئولين بتوع ما اعرف ايه قولتلهم من فضلكم انا عاوز الغي الخدمة نهائيا قالولي هاتدفع 199 جنية لو لغيت قبل سنة طيب خفضلي السرعة الباقة بتاعة 1 ميجا وتحميل 10 جيجا اللي بخمسين جنية بدل ما بدفع 160 جنية ع الفاضي قالي هاتدفع 50 رسوم تغيير الباقة كل همهم الفلوس ويولع العميل المهم جيه الفني بتاع الزيارة المنزلية اخيرا يوم 25/08 الفني دخل علي صفحة الراوتر اللي بشوفها كل ساعه مرتين تقريبا وقالي واضح ان الخط فعلا سيئ !!!!! نورت المحكمة يا زويل عصرك واوانك وقالي خلي حد من اعطال المصرية يجي يبصلك عليه ( المصريه بترمي علي شركة النت والعكس) واللذيذ في الموضوع ان السرعة اللي وصلاني حاليا اتدهورت اكترواكتر لدرجة انها بقت ما بين 44 كيلو بت و 77 كيلو بت ( نت التليفون بتاع زمان واحنا في 2016 ) الخلاصة ان اتصالات من اسوء شركات مصر في الانترنت تعدت تي اي داتا بمراحل من حيث السوء ولو حد بيفكر في DSL اقوله بلاااااش اتصالات خليك فاكر اني قولتلك بلاش!!! آسف علي الاطاله وشكرا

المشاركة الأصلية كتبت بواسطة محمد حسين

لا انا حضرتك مالقيتش لا اهتمام ولا حل حاجة في منتهي السوء والبرود لانهم محفظين الموظفين الكلام كانهم كلهم بيقرو من سكربت قدامهم لدرجة اني من كتر ما اتصلت بيهم حفظت اللي هايقولو وبقيت اسبقهم بيه قبل ما يقولوه أما ان السرعة عند حضرتك بطيئة اوقات دي ممكن بسبب الضغط علي الشبكة والاجهزة اللي في السنترال انما توصل لانك تبقي متعاقد معاهم علي 4 ميجا ويوصلك اقل من 56 كيلو دي اللي جديدة عليا الصراحة بس سيبك انت رجعتلي ذكريات نت التليفون بتاع زمان

56 ده انجاز
انا اقصى سرعة كنت بوصلها كان 30 كيلو تحميل