بيجو 405 .. عطل بقاله 3 شهور محدش قادر يحدد سببه

**Beko88** · 06-09-2016 07:53 AM

عندي عربية بيجو 405 موديل 1998 .. 1600 سي سي .. بقالي دلوقتي اكتر من 3 شهور العربية واقفة وهيجيلي شلل عشان محدش قادر يعرف يصلحها بعد 3 ميكانيكية مختلفين جيبتهم

القصة بدأت من 3 شهور، كان عندي مشكله في الديبرايج، اشتريت واحد جديد وخدتها للميكانيكي وركبه ورجعت البيت، لحد هنا كل حاجه تمام، تاني يوم الصبح ادور العربيه مش بتدور .. صوت المارش شغال والبطارية زي الفل والبنزين اكتر من نص التانك، وكل حاجه تمام لكن مش بتدور

جيبت ميكانيكي قالي هات مشط وموبينه، وان المشكله فيهم، جيبتهم وادور مش بتدور خالص
جبت ميكانيكي تاني قالي لا دا المشكله في الاسبراتير، وان ملف الكهربا اللي جوا محروق، جبت اسبراتير استيراد، وبدوّر راحت دايرة
وبعد اقل من خمس دقايق وهي دايرة راحت مبطله، وادورها مش بتدور

اقول للميكانيكي وبعدين، يقولي مش عارف

جبت ميكانيكي "تالت" وجبت معاه كهربائي .. الاتنين أجمعوا ان المشط اللي انا جيبته مش تمام واني اجيب مشط تاني وهتدور، جبت مشط ألماني وركبته .. وزي المرة اللي قبلها دارت خمس دقايق وبطلت ومارضيتش تدور بعدها
.
.
.
انا هيجيلي انهيار عصبي خلاص، اعمل ايه

فيدوني واكسبوا فيا ثواب قبل مايجيلي جلطه ... أعمل ايه؟؟؟

**bluemail** · 06-09-2016 08:27 AM

اهدي بس وصلي علي النبي، ان شاء الله مفيش انهيار عصبي ولا كلام من ده

مشكلتك ان اي حد بيشتغل في العربيه

نصيحه شوف حد متخصص بيجو ووديله العربيه هيحطها علي السكانر ويشوف ايه المشكله ويظبطهالك ان شاء الله

بالتوفيق

**م أحمد** · 06-09-2016 08:36 PM

روح لكهربائى بيجو...ممكن المحترم اللى ركب طقم الدبرياج يكون قطع سلك حساس (حساس كرنك مثلا) و هو بيقفل او شىء من هذا القبيل

**sherif_mahalla** · 08-09-2016 01:15 AM

غالبا الرأي الأخير أصح
هو طالما العيب حصل بعد صيانة أو تغيير قطعة توقع إن فيه حاجه غلط حصلت أثناء الصيانة
أنا مره كنت مغير طقم دبرياج و الميكانيكي الله يجازيه زنق سلك و بعد يومين ماشي بالعربية لقيت دخان طالع من الكبوت
طبعا الكهربائي قاللي شوف ميكانيكي يفكلك طقم الدبرياج عشان أغير السلك اللي ولع يعني كلفني أجرة فك فتيس تاني و كمان كهربائي و كان هيولع في العربية