الموضوع: زيت محرك لانوس 2015

أخي الحبيب... ما تضايقش قوي كده..

للأسف الكلام المنتشر عن استخدام الزيت التخليقي في العربية الجديدة غير صحيح بالمرة.

وبردو الكلام المنتشر عن استخدام الزيت المعدني في السيارات القديمة خطأ تماما..


الزيت الصح والأفضل لموتور عربيتك هو اللي مواصفاته مكتوبة في كتالوج عربيتك اللي جاي معاها... فقط لا غير..

يطلع معدني.. يطلع تخليقي... ده مالوش دعوة إطلاقا.


أنا عندي توصيات زيوت اللانوس I... اللي كانت نازلة سنة 1999... معرفش التوصيات اتغيرت دلوقتي ولا لأ..

أرجو إن حضرتك تصور لنا صفحة الكتالوج اللي مكتوب فيها مواصفات الزيت.. وإن شاء الله نقوللك على الزيت المناسب حسب استخدامك وأولوياتك.


وأرجو بردو إن حضرتك تعدي على الموضوعين دول.. هيفيدوك جدا..
http://www.nilemotors.net/Nile/434256-a.html
http://www.nilemotors.net/Nile/341680-a.html


ولو لسه محتار .. اسأل واحنا نجاوبك إن شاء الله.


...

المشاركة الأصلية كتبت بواسطة zeroten

مشكور أخي الحبيب للمرور والاهتمام

وإليك الصور









وسؤالي كان هل لو غيرت زيت المحرك للزوجة 5w30 يضر المحرك علما بأن اللزوجة دي مطروحة في كتيب السيارة ..... وألف ألف شكر

دي نفس التوصيات اللي موجودة عندي... وزي ما قلتلك دي بتاعت اللانوس I...

معلش.. سؤالي ده غلس شوية.. بس حضرتك اتأكدت من إن دي هي نفسها التوصيات اللي في كتالوج عربيتك؟؟؟؟

أنا بسأل لتأكيد المعلومة بالنسبالي مش أكتر.. ﻹن الآفيو مثلا فيها نفس موتور اللانوس بس مواصفات الزيت مختلفة.


تاني حاجة محتاج أعرفها ضروري هي طبيعة استخدامك للعربية.. ﻹن دي هي اللي بتحدد اللزوجة المناسبة.. خصوصا لما تلاقي إن أي زيت ممكن يشتغل زي حالتنا هنا.

كمان.. مهم أعرف أولوياتك بالنسبة للزيت نفسه...

تفاصيل الكلام اللي أقصده موجودة في الموضوع ده..
http://www.nilemotors.net/Nile/481878-a.html

وأنا بردو معاك لحد ما نلاقي أفضل زيت يناسبك ويناسب عربيتك.


...

المشاركة الأصلية كتبت بواسطة zeroten

أخي الكريم شاكر علي اهتمامك جدًا وتواصلك

وبخصوص التوصيات هي نفسها أنا صحيح استعرت الصور من المنتدي لاني لأتها زي اللي في الكتالوج بتاعي تمامـًا

وبالنسبة لإستخدامي انا استعمالي بسيط لا يتعدي 6000 كيلو في السنة .... الكيلوات دي مناصفة ما بين السفر لمسافات او داخل المدينة
وحالة العربية كما ذكرت اني شاريها من الزيرو وعاملة 7500 كم وهي موديل 2015 وللأسف أول زيت ليا بعد زيت الشركة كان موبل ون 20w50 موبل ون سوبر 1000 hp



وإليك صور من المانيول للانوس 2015 الخاصة بي










وأذكر حضرتك بسؤالي الأساسي وهو (( هل التغيير لزيت 5w30 التخليقي بالكامل يضر المحرك ؟ ))


وألف ألف شكر

طيب تمام .. طمنتني..

بالنسبة لاستخدام لزوجة 5w-30...

ﻻ مش هيؤذي الموتور خالص... إلا في حالة واحدة...

لو حضرتك كنت بتحمل على الموتور بشدة..

يعني لو كنت من هواة القرص على الموتور والسباق وكده..
أو لو بتحمل أوزان تقيلة بشكل متكرر (أكتر من 300 كيلو شامل كل أوزان الناس والحمولة التانية).
أو لو كنت ساكن في منطقة مرتفعة (على جبل مثلا زي المقطم) وبتطلع وتنزل كتير كل يوم.
أو لو كنت بتقطر عربيات أو بتجر مقطورة صغيرة...

كل الحالات دي اسمها حالات تحميل شديد على الموتور... اللزوجة الخفيفة ما تنفعش معاك لو الحكاية دي بتتكرر معاك باستمرار.

ارجع لموضوع "إزاي تختار اللزوجة" اللي حطيتهولك في اللينك.. شارح فيه كل التفاصيل دي.


...