الموضوع: سؤال عن الزيت المناسب لسيارة تويوتا كورولا عيون 99

الصور اللي حضرتك حاططها بتاعت كتالوج أمريكا..

وأمريكا الدنيا فيها مختلفة عن الشرق الأوسط في حاجات كتير قوي.. أولها القوانين السارية هناك.. وثانيها نوعية الزيوت المتاحة في السوق..

الغالبية العظمى من كتالوجات الشرق الأوسط بتاعت تويوتا بتوصي بالتالي:

اللزوجة:
20w-50 أو 15w-40
10w-30 أو 5w-30

مستوى الأداء:
Api sj أو sl (حسب موديل العربية والموتور)
وكمان يكون معتمد من ilsac (للزوجات الخفيفة فقط 10w-30 و 5w-30)

بالنسبة لزيت شل هيليكس hx3.. فلازم حضرتك تتأكد إنه مطابق للمواصفات اللي فوق دي

أتوقع إن النسخة المصري منه تكون أقل من SJ... فيا ريت حضرتك تأكدلي المعلومة.


...

المشاركة الأصلية كتبت بواسطة sherif_mahalla

شكرا عالرد يا بشمهندس أحمد
أولا فعلا ده الكتالوج الأمريكي ملقتش غيره عالنت
لو حضرتك عندك بتاع الشرق الأوسط أو تعرف ممكن ألاقيه فين يبقى جزاك الله خيرا
ثانيا
shell helix hx3 20W-50 SL
بس مش عليه أي كود من بتوع ilsac و لا بتاع مرسيدس و فولكس و الكلام ده
اللي مكتوب عليه
للمحركات القديمة التى قطعت آلاف عديدة من الكيلومترات
يحافظ على الأجزاء المتحركة و يقلل الإحتكاك و التآكل في أجزاء المحرك و مش قايل أي حاجه عن استهلاك البنزين
شكرا مره تانيه

للأسف.. كتالوج الشرق الأوسط مش موجود على النت خالص.. كل اللي قدرنا نوصله كان عن طريق إخوة أفاضل في المنتدى هنا ومنتديات عربية تانية..

والملاحظ إن تويوتا موحدة توصيات الزيوت بتاعتها لمعظم مواتيرها.. سواء كانت صغيرة أو كبيرة.. قديمة أو جديدة.

الرابط ده فيه خلاصة توصيات زيوت المحركات من تويوتا

http://www.nilemotors.net/Nile/3876095309-post17.html


عموما...الكتالوج ما اشترطش أي كود تاني غير API SJ للزوجات العالية زي 20W-50.. وبالتالي الزيت مناسب تماما.

وسيبك من الكلام بتاع التسويق ده (يحافظ على الأجزاء المتحركة. . . . . . . .)

المهم هو الكود... غير كده خلي اللي عايز يقول حاجة يقول زي ما هو عايز.



بس حضرتك إن ده اللي مكتوب على العلبة فعلا؟؟؟ ولا دي بيانات الزيت على الإنترنت؟؟

دي صفحة الزيت ده على موقع شل
Shell Helix HX3 20W-50 | Shell Global

بس أحيانا بيبقى الزيت الواقعي مختلف.

المشاركة الأصلية كتبت بواسطة sherif_mahalla

هو فيه سؤال بس كمان بعد إذنك
في الصورة اللي بتتكلم عن نقص الزيت
هو مش قايل معدل معين
بس أنا حاسس إن معنى الكلام إن المحرك الجديد المفروض يحرق بنسبه بسيطة و لو الزيت مبينقصش يبقى فيه حاجة غلط
بس بالنسبة للمحركاات القديمة
المفروض يحرق زيت قد إيه
أنا تقريبا زودت لتر و نصف
في ٤٠٠٠ كيلو هل ده عادي و لا قليل و لا كتير؟!
و هل أنزله على كده و لا طالما محتفظ بخواصه أخليه
أنا قريت كل مواضيع الزيت في المنتدى
بس الناس اللي اعرفهم كلهم بيقولوا القديم له نظامه غير الزيرو

لتر ونص في 4000 كم تعتبر كتير.. بس ده يعتمد على حالة الموتور وطريقة سواقتك

حسب المكتوب في الصورة دي..



المكتوب إن الموتور الجديد المفروض إنه يستهلك زيت أكتر!!!

ليه؟؟

علشان الموتور الجديد لسه بيلين.. يعني لسه ما أخدش وضعه تمام ولسه ما طبعش مظبوط.. خصوصا الشنابر مع السلندر... ده غير رواسب الكربون اللي بتتكون مع الوقت وممكن تسد الفروقات البسيطة اللي ممكن تعمل تسريب بين الشنابر والسلندر.


بردو مكتوب إن استهلاك الزيت بيزيد مع الدوران العالي والتسارع الشديد أو التباطؤ الشديد... يعني باختصار السواقة اللي فيها حرق وقرص على الموتور بتزود استهلاك الزيت.

ليه كده؟؟

ما تنساش إن السلندر عامل زي السرنجة ... لو حبيت تسحب البستم بتاعها وانت قافل الفتحة بتاعت الإبرة كويس البستم مش هيتحرك إلا
لو كان كاوتش البستم بيسرب هوا...

فلو كان عندك رذاذ زيت جوه البلوك .. فالسلندر ممكن يسحب الرذاذ ده أثناء شوط السحب.. خصوصا لو كان عندك حاجة ممكن تعوق انسياب الهوا من الصمامات (فلتر هوا مسدود مثلا).


بالنسبة لحالتك..

أتوقع إن الموتور بدأ يخف حبتين (الشنابر بدأت تتآكل أو جوانات الصبابات عايزة تتغير)...

- حاول تسوق بطريقة هادية شوية...
- كمل المسافة بتاعت الزيت عادي (5000 كم) ولو حبيت تزود زيت ابقى زود من نفس علبة الزيت اللي عندك..
- لو تقدر تغير جوانات الصبابات يكون أحسن..


...

المشاركة الأصلية كتبت بواسطة sherif_mahalla

أولا من صفحتهم ده الزيت اللي عندي بس مكتوب عليه الكلام اللي أنا كتبته من الناحية التانية
بالنسبة لموضوع الصبابات ايه أعراضه غير نقص الزيت
و يتغير بكام تقريبا و فين
أنا فعلا بحرق عالموتور
بجري بالعربية و معنديش ترموستات كوعة
يعني حرارة الموتور بتعلى و بتنزل علطول مش ثابته في رينج معين
بمشي مشاوير طويلة و بتسارع كبير لكن مش معدل تباطؤ سريع
بس أداء الموتور كويس الحمد لله
و مفيش دخان أبيض من الشكمان
هو فيه تسريب زيت بسيط من خرطوم الفايز بس أنا شايفه و مطنش لأنه مبيزيدش عن شوية تعريق حوالين الخارج بتاعه
الموتور سحبه كويس و صوته مش عالي و الزيت أول ما ضيفته كان أصفر و قعد حوالي شهر و بعدين بدأ يتحول لبني و دلوقت بني محروق و ده العادي بتاعه علطول بنزله على خمسة و بيبقى كده لأني بمشي تقريبا من ١٢٠٠ ل ١٣٠٠ في الشهر فمبيكملش ست شهور أبدا
يا ريت لو حد يقدر يفيدني يقول
و لا أعمل موضوع خاص في الورشة أحسن

عدم وجود ثرموستات الكوعة سبب مهم في نقص الزيت... خصوصا في بداية تشغيل الموتور وكمان في الجو البارد.

بالنسبة لعدم وجود دخان أبيض... فالدخان ممكن يكون موجود فعلا بس بيظهر في حالات معينة أثناء السواقة... واستحالة تشوفه وانت جوه العربية

غالبا الدخان بيظهر لمدة أقل من ثانية بين النقلات (فترة نزول دوران المحرك وانخفاض الضغط)...

جرب تخلي حد واقف عند الشكمان ودوس بنزين جامد وشيل رجلك علطول (يعني تعمل أمباليه :) ) .. وشوف كده في دخان بيطلع ولا لأ.


شوف برده لو حد يقدر يفيدك أكتر مني في قسم الورشة :)


...