الاختيار دايما حسب الكتالوج... وكل ما زاد عن الكتالوج ما يفرقش معاك.. ده إذا ما كانش أفضل للموتور.
مواصفات الكتالوج عندك كالتالي:
اللزوجة:
20W-40 أو 20W-50
15W-40 أو 15W-50
10W-30 أو 10W-40 أو 10W-50
5W-30 أو 5W-40
اللزوجة المفضلة حسب الكتالوج هي 5W-30... بس يا ريت تقولنا بردو إيه هو أسلوب سواقتك واستخدامك للعربية .. يمكن نغير اللزوجة.
مستوى الأداء:
API : مستوى SJ على الأقل... يعني يمشي معاك SL و SM و SN (بالترتيب من الأقدم إلى الأحدث)
ILSAC : مستوى GF-2 على الأقل ... يعني يمشي معاك GF-3 و GF-4 و GF-5 (بالترتيب من الأقدم إلى الأحدث)
بالنسبة لحرف J
فالـAPI نظامها في وضع مواصفات الزيت بسيط جدا... حرف الـS بتاع مواتير البنزين... والحرف التاني بتاع رقم المواصفة نفسها..
وأول مواصفة طلعت كان اسمها A ... بعدها طلعت مواصفة B وكانت مواصفاتها أعلى من A... وكل كام سنة تطلع مواصفة جديدة مواصفاتها أعلى من اللي قبلها وتاخد الحرف الأبجدي اللي بعده..
مواصفة SJ طلعت في سنة 1996 ... ولغت المواصفة اللي قبلها اللي كان اسمها SH
مواصفة SL طلعت في سنة 2001... لغت SJ
مواصفة SM طلعت في سنة 2004... لغت SL
مواصفة SN طلعت في سنة 2010 ... لغت SM
معنى الكلام ده إنك لو جبت زيت مكتوب عليه SJ هيكون مناسب للعربية... وسعره كويس... بس السوق فيه زيت مستواه أعلى وينفع بردو تحطه في الموتور...
بس كله بتمنه.
كود الـILSAC يشبه كود الـAPI قوي وبيشتغل بنفس طريقته.. يعني GF-4 أحدث من GF-3 .. وأحسن طبعا..
لو لقيت زيت عليه الكودين (API و ILSAC) ده أفضل شيء لموتورك.. وغالبا هتلاقي الزيوت الخفيفة بس هي اللي عليها الكودين دول.
على فكرة... ما تحطش كود الـACEA في دماغك ما دام الكتالوج مش طالبه..
عموما.. مواعيد التغيير حسب المكتوب في جدول صيانة العربية في الكتالوج اللي معاك.
يا ريت تقولنا إيه هي أولوياتك من ناحية اختيار الزيت... لإن ممكن تحط زيت معدني مناسب للعربية جدا وتكلفته في حدود 100 جنيه (كل 6 شهور بحد أقصى)... وممكن تحط زيت تخليقي تكلفته في حدود 360-400 جنيه (كل 6 شهور بحد أقصى)... وممكن تحط زيت تخليقي حقيقي يكلفك فوق الـ500 جنيه.. بس الزيت ده هيقعد معاك مدة سنة أو 25 ألف كيلومتر..
عايزين معلومات علشان نقدر نساعدك.
الحقيقة معرفش إذا كان الفلتر لازم يتغير ولا لأ...
بس الأهم بالنسبالي إن زيت الفتيس الصح هو اللي يتحط فيه...
أوعى تجيب زيت موبيل 320 أو 220 أو أي حاجة مش متوافقة مع طلبات كتالوج عربيتك...
الكتالوج عندك طالب تحط زيت نيسان Matic S... ولو ما لقيتهوش تقدر تحط Matic D
اتأكد إن الزيت اللي هتجيبه على اسم أي مواصفة من دول.... غير كده ما تشتريش زيت ما تعرفش أصله ولا فصله.
...
المفضلات