السلام عليكم جميعا..كل سنة وانتم طيبين جميعا(متأخرة شوية)
مع إحترامي للأستاذ توت اللي أنا شخصيا باحترم أراءه وطريقة تفكيره من ساعة ما دخلت المنتدى..بس أنا أختلف وأتفق معاه..
أتفق معاه في إن لو الشخص عنده المقدرة إنه يكتب عربي فوقتها يكون مافيش داعي للـsms language أو الفرانكوأراب دي!
بس في أوقات لازم تستخدم..ودي حاجة أنا عايشها اصلا!
لي أصدقاء لبنانيين عايشين طول عمرهم في كندا!بيتكلموا عربي بس مابيعرفوش لا يقرؤا ولا يكتبوا بيه!
إنما لو الجملة إتكتبت بالفرانكو أراب بيقروها عادي وبيكتبوا بها كمان!
بس مع فرق الحروف المستجدة
بمعنى إني لو كتبت لحد فيهم 3amel 2ih ولا هيفهمني
إنما لو كتبتها amel eh يفهمني ويرد عليا بنفس الطريقة!
دي نقطة!
النقطة الثانية مدى التعود والإحتياج للغة العربية!
في ناس طبيعة شغلهم أو حياتهم كلها english typing فبالنسبة للناس دي بيكون صعب جدا التعامل بالعربي..ودي كانت مشكلة عندي بس الحمد لله باتحسن سنة سنة عشان أنا عايز كدة..إنما لو واحد مش فارقة معاه فأكيد هينفض!
النقطة الثالثة(والله أنا مش رغاي على الطبيعة بس أعمل إيه؟إعذروني)
إن إحنا معظم كلامنا العربي حلبنتيشي..مش لغة عربية
مثال مقتبس من مشاركتي دي..
في كلمة في اللغة العربية إسمها إحنا؟أو دي؟هينفض؟رغاي؟بس؟وغيره وغيره
زي ماقلت أنا متفق ومختلف معاك..بس باختلف أكتر مع الناس اللي عايزة تمنع الموضوع دة خالص!لأنه في الأول والأخر واقع موجود مش هيتغير..لو غيرناه هنا مش هنقدر نغيره في كل مكان..بل بالعكس..
يعني أنا لي أصدقاء كتيييير جدا كانوا نفس الرأي دة وبتخنقوا من اللغة دي..كانت نصيحتي ليهم إنهم يتعلموا يقروها..تحسبا لأي ظرف..
تخيل مثلا جاتلك رسالة من صديق بيقول لك el7a2ny 7alan ana fe moshkela gamda matetteselsh beya wta3alaly daroory
وإنت مش بتعرف تقرأ الطريقة دي ونفضت للموضوع..اللع أعلم إيه هتكون العواقب..صح؟
فا أنا بانصح إن الواحد بس يعرف يقراها..مش يتعامل بيها وتبقى لغته الأساسية
وأخيرا أسف جدا جدا على الإطالة..وإعذروني لو في اي حروف مكتوبة غلط لسة برضه مش أوي أنا..أنا بقالي 18 دقيقة باكتب في الكام كلمة دول!D:
وأحب أشكر الأستاذ توت لفتحه الموضوع دة!وباشكر كل الأعضاء اللي شاركوا فيه برأيهم..
السلام عليكم ورحمة الله وبركاته