الموضوع: كليوباترا هى وفاء- مقال قوى لأحمد خالد توفيق فى مواجهة الغزو الثقافى الصحراوى

المشاركة الأصلية كتبت بواسطة sab3aawy

اسف يا اخى انى مش متفق مع كلامك نهائيا، رموز الاسلام هى ارضنا المقدسة فى مكة والمدينة والتى احتكرها ال سعود وجبوا الأموال الباهظة من كل من يرغب فى زيارتها
اما باقى ممكلة آل سعود فهى دولة مثل اى دولة، لا هى رمز من رموز الدين ولا يحزنون، كل ما فى الامر انها تبيع لنا هذه الفكرة لخدمة اجندتها السياسية حتى يصبح كل خارج عن فكر آل سعود هو خارج عن الملة
لكن لا هو فرض من فروض الاسلام تقديس آل سعود ولا سنه من سنن الاسلام عدم خروج على فكرهم
والله لو فى وقت من الأوقات المسلمين اتحدوا على تدويل المناطق المقدسة وتبقى مكة والمدينة دولة لوحدها نقدر نزورها بعيدا عن سطوه ال سعود وجبايتهم ، يبقى فضل وعدل من المولى عز وجل، اقله يفوقوا من الوهم اللى هم عايشين فيه ومعيشيننا معاهم ان الوكيل الحصرى للدين هو هم

ياريت نركز شوية فى الجزء ده من كلام الاستاذ سبعاوى , ليه ؟! علشان اللى بيقول عليه ده بالظبط هو قلب المشكلة وأساسها .
مثال آخر بعيدا عن السعودية عشان الناس تستوعب الفكرة بدون تحفظ , لو بصينا لوجود هيئة الأمم المتحدة (مقر الجمعية العامة ومجلس الأمن وهما أقوى اجهزة الأمم المتحدة ) داخل الولايات المتحدة الأمريكية وعلى أراضيها وتدار كليا بواسطتها لأمكننا أن نستشف بعض النتائج وهى بالفعل حدثت على أرض الواقع :
1- وجود الأمم المتحدة بأجهزتها الرئيسية التى تنادى بالحرية على أرض الولايات المتحدة يعنى أن الولايات المتحدة تنادى بالحرية .
2- يعنى أن من يعادى الولايات المتحدة يعادى الحرية .
3- يعنى أن الولايات النتحدة تملك صك غفران الحرية وصاحبة الامتياز الحصرى لمنحها
4- استحالة فصل الأمم المتحدة فى جزيرة نائية لتصبح هيئة او منظمة مستقلة ولو بمجرد الموقع الجغرافى .
وبنفس المنطق والمنهج الاستقرائى أو الاستنباطى او أى عقل فى الدنيا هنفهم ان الحدوتة قديمة ومن زمان , انا معايا عصاية عاشور الناجى يبقى انا أحق بالفتونة ومتخرجش من بيت الناجى وربنا يسهل بامتيازات حيازة عصا عاشور الناجى الكبير زى ما ابدع نجيب محفوظ فى الحرافيش

الخلاصة
ياريت ناخد بالنا من كلمة الحق التى قد يراد بها باطل وطالما قلنا قد , يعنى لا نتهم اللى قالها وبرضو منعديهاش على عقلنا مهما كانت مكانة اللى قالها ونفكر فيها حتى لو كانت من عند من يملك المقر الدائم والامتياز الحصرى .

مبدافعش عن سبعاوى ولا عن حاكمى السعودية , بقول نفكر بهدؤ , واحد قاللك بيتكم حقير اروح قايللو اهو انت اللى بيتك وبيت اللى جابوك ياكذا يا ابن الكذا واللى بيته من ازاز ميحدفش الناس بالطوب الخ اقف ثانية وافكر ولو ملقتش اجابة اسأله طيب تفتكر بيتى حقير ليه , يمكن شايف اللى انا مش شايفه , يمكن بتنزل من بيتك وبيحصل حاجة من وراك مثلا , فبلاش الردود الواثقة وجاهزة التحضير وياريت نطرح كل شئ للنقاش , بدل الحرايق اللى بتولع كل ماتيجى سيرة مصر والسعودية .

المشاركة الأصلية كتبت بواسطة ams

---------------------------
السعوديين ليسوا افضل من على وجه البسيطه و كذلك نحن بافسادنا الدائم لقيمنا مع ان هذه القيم موجوده عند الغربيين كالعدل مثلا

+1

المشاركة الأصلية كتبت بواسطة ahmed1981

السعودية ليست المصدر الوحيد لعلم الدينوفي بداية هذا القرن إستعان ملك السعودية الأول الملك عبد العزيز بعلماء الأزهر لمحو الجهل الديني المستشري في الجزيرة العربية في ذلك الوقت
لكن نحن لا نعيش في الماضي فقط
الوضع الحالي يقول وجود علماء دين أجلاء بكل من مصر والسعودية

ده ملخص بسيط جدا عن اللى عايز أقوله برضه ...

أنا عشت في السعودية حوالى 10 سنوات وعاشرت الناس نفسها هناك سواء في الرياض أو جده أو مكة أو المدينة أو الجبيل اوالدمام (بس الكلام ده كان من 15 سنة يعني قبل مايوصلوا -واحنا معاهم- لمرحلة الفجر البين اللى وصلنالها جميعا مش همة بس)

أنا شفت منهم بلاوي سودة لو قلتها هاتلاقي كل اللى بيشتم في السعودية وبيكرهها فرحان وبيقول أهه شوفتو همة عاملين إزاي وقد إيه بيكرهوا المصريين -بالذات- ...

وفي نفس الوقت شوفت منهم مواقف وتصرفات وأساليب غاية في العدل والكرم والتدين والحب -حب المصريين على وجه الخصوص- والبساطة وحسن المعشر

اللى عايز أقوله إن الشعب -أي شعب- في الدنيا بيبقى فيه الناس اللى ماتستاهلش انها تكون ناس وبيبقى فيه الأجلاء اللى الواحد لو قابلهم في أي حتة أو أي مكان هيقف ويرفعلهم القبعة إحتراما لهم -حتى لو كانوا يهود- (أكيد ممكن يكون في واحد يهودي أو أتنين كويسين ... إحتمال يعني )

يبقى ماينفعش إننا نغلط في شعب بحاله عشان أخطاء البعض منه

المشاركة الأصلية كتبت بواسطة ahmed1981

وبالنسبة للفتوى التى ذكرتها
يقول الله تعالى في سورة يس : (وَالشَّمْسُ تَجْرِي لِمُسْتَقَرٍّ لَّهَا ذَلِكَ تَقْدِيرُ العَزِيزِ العَلِيمِ) آية 38 من سورة يس
ولذلك ليس علماء السعودية من قالوا ذلك
بل هو إجماع من العلماء المسلمين بكل ألوانهم على وجوب الإيمان بأن الشمس تجرى أي تتحرك
ولا فرق إن كانت تجري بمجرتها وحدة واحة أو تدور فهذا لن يكون مشكلة

لكن حضرتك سمعت الفتوى من مفتي سعودي وإعتقدت أنها من تأليفه
والحقيقه أنه ناقل لها عن فلان عن فلان عن فلان حتى نصل إلى زمان بعيد لم يكن فيه سعودية أصلاً وكان العالم يذكر بإسمه دون جنسيته

وأضيف لم يكن فيه أقمار صناعية ولا ... ولا ... وقت إصدار الفتوى أصلا

الكلام ده حقيقي وصحيح ... هو بس لم يكن من حقه تكفير المسلم لأن تكفير المسلم أمر عظيم وجلل ولا يليق أن يصدر من عالم جليل بمكانة الشيخ إبن باز حتى لو كانت الفتوى منقولة ولكن نحن لا نعلم ماهي الظروف التي قال في وقتها بهذه الفتوى (الكلام ده كان من 25 سنة) ... واللى درس قليل من الفقه لازم يعرف إن أي فتوى قد تصدر بناء على ظروف معينة وأحوال خاصة قد لا تنطبق على غيرها وقد تكون صحيحة تماما بالنسبة لهذه الحالة فقط ... ونظرية تعميم الفتاوى على إطلاقها نظرية خاطئة في الفقه الإسلامي

المشاركة الأصلية كتبت بواسطة د-احمد عبد اللطيف

حد يقوللى ازاي الحج من امريكا باقل من 5000 دولار ومن مصر بضعف هذا المبلغ فين بقى الجباية
انا قريبي مسافر الحج من مصر السنة دي بس بفيزا هدية من احد المسؤولين
الحج مكلفة هو وزوجته 20 الف ايوه 20 الف عشان لا فيه قرعة ولا سياحه
كل اللى دفعة للسعودية 3000 جنية للانتقال ورسوم الحج (20 الف اجمالي)
فين بقى الجباية

الكلام ده كمان صحيح 100 %

من فترة كده أيام ماكان الحج في مصر بحوالى 25 الف جنيه يعني من سنتين فقط كان لو الواحد راح الهند وحج من هناك كان هايتكلف تقريبا في حدود 5000 خمسة الآف جنيه فقط بكل حاجة ... وده حصل فعلا بمعرفتي بس الناس اللى راحت كانت على درجة من القرابة بواحد كان شغال في مكتب مصر للطيران في الهند فكان ليهم تخفيض على أسعار تذاكر الطيران فقط .... ومعنى كده إن كل الفلوس الزيادة اللى احنا بنسمع عنها هنا في مصر دي بتبقى في جيب شركات السياحة وما الى ذلك ..!!؟

في نقطة كمان مهمة وهى حادثة الطبيبين المصريين المحكوم عليهم في السعودية ... هوة معنى كده ان السعودية وحشة واحنا المفروض نقاطعهم ... لأ ... ده معنى كده ان إحنا اللى وحشين مش همة إحنا اللى أهدرنا كرامة المواطن المصري في الخارج وبقينا دولة مواطنيها درجة تانية سواء داخلها أو خارجها لأننا مابيفرقش معانا المصريين بيتعمل إيه فيهم برة

والأمثلة كتير مش في السعودية بس ... ليبيا وهى عمالة تعتقل في الصريين وترميهم في السجون بتاعتها (همة مذنبين آه) بس حد عندنا في الحكومة راح سأل هما بيتعاملو إزاي دول بيرجعوا يحكوا أهوال عن سوء المعاملة اللى بيلاقوها من الحكومة الليبية هل معنى كده ان ليبيا وحشة ... لأ دى دولة عايزة تفرض سيادتها على أرضها وده حقها لكن إحنا اللى أهدرنا حق مواطنينا وسايبنهم يتعاملوا زي الكلاب فيها .... موقف الطبيبين دول لو كان حصل في أمريكا وأمريكا حكمت بإعدامهم بالكرسي الكهربائي كنا هانعمل حاجة ولا هانقول حاجة؟ ده يمكن ماكناش سمعنا أصلا بالواقعة ... ما المصريين بيتبهدلو في أمريكا كل يوم لمجرد انهم مصريين ... لو تفتكروا الممرضات اللى كان محكوم عليهم بالإعدام في ليبيا وبرغم أنف ليبيا الحكم ماتنفذش مش عشان حاجة إلا لأن دولتهم ماسكتتش إلا لما خدت مواطنيها في حضنها تاني

أنا مش بدافع عن السعودية في القضية (لأني أصلا معرفش إيه هية ملابسات القضية) لكن لو فرضنا إن الحكم كان ظالم فعلا وإنه صدر مخصوص إرضاء لرغبة أميرة من الأسرة الحاكمة هناك (كما يدعى لأني لست على علم بالحقيقة).... هوة يعني الكلام ده مابيحصلش في مصر وعمرنا ماشفنا أحكام متفصلة مخصوص إرضاء لعيون أحد أفراد السلطة واللى بيكون نتيجة الأحكام دي ظلم بيّن لبعض المواطنين المصريين العاديين ...

الفساد موجود في كل حتة لكن الفكرة إحنا عملنا إيه عشان نجيب المواطنين بتوعنا من عندهم .. ولا حاجة .. صح ؟

ده لو كان الأتنين دول أمريكان كانت أمريكا قامت ومقعدتش إلا لما مواطنيها يوصلوا أمريكا ومع الإعتذار لهم كمان ... بلاش أمريكا .. خليها الصين أو الهند أو اليابان أو ... أو ...

إحنا اللى غلط في الأساس مش همة

المشاركة الأصلية كتبت بواسطة sab3aawy

والله لو فى وقت من الأوقات المسلمين اتحدوا على تدويل المناطق المقدسة وتبقى مكة والمدينة دولة لوحدها نقدر نزورها بعيدا عن سطوه ال سعود

والله انا نفسي في الموضوع ده .. وهو فكرة هايلة جدا ونفسي فعلا انها تتنفذ وتبقى مكة والمدينة عبارة عن دولة مستقلة مالهاش دعوة بالسعودية خالص زي الفاتيكان كده بس هاتقول لمين ... وهمة عمرهم مايسيبوها طبعا إلا إذا الدول العربية إجتمعت على الموافقة على كده وده واضح إنه صعب يحصل

أسف على الإطالة