الحقونى انا اتضحك عليا فى العربيه

**abo 3li** · 11-12-2016 09:05 AM

السلام عليكم اشتريت عربيه فورد اسكورت من واحد جارنا والمفروض انه مصدر ثقه وكشفت عليها عند كذا حد وقالولى سليمه المهم بعد ما خلصت باسبوع لاقيت الفانوس اليمين اعلى من الشمال ف قلت يمكن عايز يركب مكانه فتحت الكابوت لاقيته مظبوط بعدت عن العربيه شويه لاقيه صدر العربيه هو اللى معوج ؟؟؟؟ رحت لسمكرى تانى قالى سليمه رحت لغيره قاللى فيه لحام فى فخده المساعد ودى خبطه هيا اللى عامله كدا

اول سؤال هيا كدا ممكن تكون مغيره نص مع العلم ان مفيهاش رقم شاسيه الا جوه عند الكرسى مش عارف الفورد اصلا كدا عشان الناس كلها بتقول دا مكانه بس

لو مغيره فخده مساعد فعلا او حتى متصلحه دى هيعمللى مشكله فى الفحص ؟؟؟

ولو عايز اصلحها السمكرى المفروض يعمل ايه عشان ابقى فاهم

ارجو المساعده

**abo 3li** · 12-12-2016 03:52 AM

ارجو المساعده يا جماعه

**sherif_mahalla** · 12-12-2016 10:42 AM

ممكن تحط صور عشان يبان العيب
عموما لو مغيره ربع أو نص هتلاقي أثر لحام في الدواخل أو الشاسيه أو دهانات
لو اللحام مش في الشاسيه و لا الصاج مش مشكله

**Weesky** · 12-12-2016 09:44 PM

معتقدش تكون مغيرة نص لأن ساعتها اللحام مكنش حيبقة في المكان ده والسمكري اللي قالك فيها لحام يقدر يعرفلك مغيره نص او ربع ولا لأ وبالنسبة للفحص ان شاء الله مفيهوش مشكلة اما بالنسبة لجارك ربنا يكرمه بعربية مقلوبة مرتين

**msadeka** · 13-12-2016 12:38 PM

زى الاعضاء ما قالو كنت لقيت لحامات ودهان ممكن تكون خبطة خفيفة وبالنسبة للفحص متقلقش خالص

**م أحمد** · 13-12-2016 02:37 PM

مغيرة نص هتلاقى آثار لحام فى العتب بين قائم الباب و القائم الوسطانى... فى جانبى العربية

كمان هتلاقى آثار اللحام فى السقف

و كمان هتلاقى آثار اللحام فى بطن العربية من تحت

لحام النص مشكلة فى الترخيص

لحام الربع مافهيوش مشاكل بشروط

**Colin Chapman** · 13-12-2016 05:54 PM

المشاركة الأصلية كتبت بواسطة Weesky

معتقدش تكون مغيرة نص لأن ساعتها اللحام مكنش حيبقة في المكان ده والسمكري اللي قالك فيها لحام يقدر يعرفلك مغيره نص او ربع ولا لأ وبالنسبة للفحص ان شاء الله مفيهوش مشكلة اما بالنسبة لجارك ربنا يكرمه بعربية مقلوبة مرتين