الموضوع: جيب شيروكي xj ولا بليزر k5 - أرجو الافادة من أهل الخبرة

المشاركة الأصلية كتبت بواسطة crx

شكراً جداً لكم جميعاً على الرد والإفادة... وآسف على التأخير على الرد... ربنا يكرمكم... أنا استفدت كتير...


طيب... أنا إشتريت البليزر موديل 89 الحمد لله... ليه؟ لعدة أسباب... أولاً: لإنها بيك أب أو ممكن تدي شكل الترك truck بمجرد ما تشيل التوب وده كان شكل نفسي فيه من زمان.. ثانياً: المساحة علشان الأولاد يقعدوا ورا مستريحين لإني كنت راكب رانجلر yj وللاسف كانوا بيبقوا متعسفين في الركوب ورا.. ثالثاً: بعد توحش الأسعار أصبح الxj بعيدة شوية لإنها عربية تانية واستخدامها محدود في الرحلات والسفاري والكامبنج وكده...
الحمد لله وفقت في عربية بيتهيألي انها مش بطالة خالص.. إن شاء الله أرفعلكم شوية صور ليها.. محتاجة سروجي علشان أظبط الداخل بتاعها.. عملت تجربة كده امبارح بالليل test drive في الصحراء وكان الأداء مش بطال خالص..

الملاحظات:

حسيتها تقيلة شويتين تلاتة على الرمل بشكل مزعج فغرزت الصراحة... بس لما جيبت ال4 low طلعت هوا.. التورك -العزم- بتاعها بصراحة هايل، ما شاء الله...

- فيها نتعة كده لو دوست جامد على دواسة البنزين مش عارف ده أسبيراتير ولا كربراتير عايز يتنضف لانها مركونة من فترة
- حسيت ان لما بشغل فتيس الغرز بيلقط ساعات وساعات لأ فمش عارف... غالباً هخلي حد يراجع عليها
- العربية كربيراتير فمش عارف الأفضل (من حيث القوة والأداء) انها تفضل كربيراتير ولا أقلبها إنجكشن
- صاحب العربية بيصين عند حد قالي اسمه صابر الجازولي، وبيشكر فيه، شكلي هروحله بس لو حد يعرف حد أظبط معاه بشكل دائم يبقى متشكر جداً لو دلني عليه بس حد معلم بليزر... أنا كنت بشتغل مع حسين السلمي قبل كده وهوا حد جميل جداً، ولو بيشتغل في البليزر، هظبط معاه وش إن شاء الله

- وأخيراً ايه هي الأفكار والمقترحات علشان أعلي من أداء وعزم الموتور، عايز يديني بيرفورمنس أقوى من كده.. أعمل ايه؟؟

وشكراً جداً ليكم يا شباب...

الف مبروك وربنا يديك خيرها ويكفيك شرها - إختيار موفق إن شاء الله وبالصبر واحدة واحدة حاتظبطها إن شاء الله واحنا معاك فى اى استشارة على قد مانقدر -بالإضافة لكلام المهندس أحمد : بالنسبة للكرابراتير حاقول لحضرتك على كذا نقطة تحطهم فى دماغك :
- إوعى تخلى حد يفك الكربراتير ويقولك طقم اكسات وبوابات وبيكات والكلام ده - لو الكرابراتير بيدور العربية ويمشيها كويس ومافيش اى ريحة بنزين ومابتغيبش معاك فى الدوارة ولا بتشرق سيبه راكب وابتدى اتعامل معاه خارجيا بإنك تنضفه بمنظف كاربراتير وده بترشه على الكاربراتير وعلى البوابات وتمسح داخل البوابات كويس بقماشة مبلولة منظف وتمسح جدران وبوابات الكاربراتير وخصوصا من الجنب ومن الخلف (البوابات) - وتسيبه لغاية ماينشف وبعدين تدور - تشوف كل الخراطيم اللى راكبه على الكرابراتير متوصله كويس ولا فيها حاجه مقطوعه او مش راكبه - السوست تتنضف كويس برضه بمنظف الكرابراتير - مافيش حد بيعرف يصلح كاربراتير فى مصر ولو صلحه حايشتغل بالكتير اسبوع ويضرب تانى . عاوز تصلح الكاربراتير مظبوط تبعت تشتريله طقم اصلاح كامل من بلده وتعمله بايدك.
- حاول تظبط الهوا مع البنزين والكهربا حاتتظبط ان شاء الله .
- سيبها كاربراتير احسن من الانجيكشن وفيه ناس كتير جدا بره مصر بترجع للكاربراتير تانى .
بالنسبة للصيانات بصفة عامة :
- اول حاجه حاول تدور على الكتالوج بتاعها على النت علشان تطلع منه انواع الزيوت الخاصة بالموتور والفتيس والكوارين وفتيس الغرز والشحوم كمان والبوجيهات (لأن ممكن جدا تلاقى البوجيهات اللى راكبة مش بتاعتها وصدقنى نص العربيات اللى ماشية فى مصر مش مركبه البوجيهات بتاعتها وعامله مشاكل - اكتر من ٧٥٪ الناس بتروح تشترى البوجيهات بالبركة والزيت برضه بالبركه ويرجعوا يشتكوا من العربية )
- بعد كده حاتغير البوجيهات وكل الزيوت والفلاتر والسيور وتيل الفرامل وزيت الفرامل بعد كده تبدأ تشوف ايه اللى فى العربية وتصلحه او تظبطه .
- لما تروح تغير الحاجات اللى فاتت تشتريها انت بنفسك من زيوت او قطع غيار او خلافه وتقف على ايد الصنايعى وهو بيركبهم .
ده اللى اقدر اقولهولك دلوقتى وانصحك مرة تانية بالصبر وانا عارف انك حاتصبر لان كان معاك yj قبل كده :)