المشاركة الأصلية كتبت بواسطة م/أحمد عبد الفتاح
بمنتهى البساطة الـ differential lock معناه إنك تعشق عمود الكردان الامامى والخلفى مع بعض عن طريق فتيس الغرز أو Transfer case فى الحالة دى بيبقى الكورونة الامامية والكورونة الخلفية واخدين الحركة مع بعض من فتيس الغرز - عندك بقى فتيس الغرز ده ليه وضعين وضع high ووضع low - فى الوضع الـ high مافيش فرق عن الدفع الخلفى غير انك ربطت عمودين الكردان وبالتالى الكورونتين الامامية والخلفية مع بعض - فى الوضع الـ low بتنقل على ترس تانى فى فتيس الغرز بيكون اكبر من الترس بتاع الـ high وبالتالى العزم بيكون اكبر فى حالة الـ low .
بالنسبة للـ hub lock فده بيكون فى بعض العربيات فى العجل الامامى ووظيفته انه يعشق العجلتين مع الاكسات اللى طالعة من الكورونة بمعنى إنك لازم تعشقهم بإيدك لو عاوز تمشى دفع رباعى - لو معشقتش الـ Hub lock حاتفضل العربية دفع خلفى حتى لو نقلت على الـ High أو الـ Low - حتلاقى العجل الاماميى بيلف عالفاضى على الاكس بتاعه ومش بيدى اى دفع .
وتقدر تعرف عربيتك اذا كان فيها Hub lock ولا لأ من العجل الامامى لو فيها مفتاح زى اللى فى الصورة اللى ناشرها الباشمهندس أحمد.
بالنسبة للـ Hub lock ماتمشيش عليه عالاسفلت كتير علشان بيحد من الـ steering أو التوجيه بتاع العربية وممكن يأثر على الكاوتش ويسبب تاكله وتلفه بسرعه .
الحاجه الاخيرة اللى قصدك عليها داخل الكورونة او الـ differential هى مجموعة إسمها LSD أو limited slip differential ودى بتتركب داخل الكورونة مكان الترسين الصغيرين اللى بالعرض ودى فايدتها إنها بتخلى العجلتين اللى على كورونه واحدة تلف باستمرار بنفس السرعة بغض النظر عن كونها عندها تراكشن مع الارض او لأ وده بينفع لو العربية غارزة ٣ عجلات والرابعة عندها تراكشن حاتقدر تفلفص بالعربية وممكن تطلع من الغرز.