الموضوع: افتونى فى امرى وجدت اسرة محتاجة تسكن قبر والدى فماذا افعل

انا مشوش جدا بجد ومش عارف انام من كتر تفكير فى موضوع غريب جدا
انا من بعد ارتفاع اسعار مواصلات مرحتش قبر ابويا وامى بقالى فترة ازورهم حسب العادة كل يوم جمعة وبعدين والدى جالى فى الحلم ٣ ايام متصلة واحلم انة عاد للحياة وللعمل ونفس الحلم يتكرر واستغربت جد من حلم روحت امس القبر ازورة لاقيت اشياء اسرة باطفال تسكن المقبرة بس الاسرة لم ترانى فؤجت بجد واتسمرت مكانى من المفاجاءة علما ان قبر والدى كان غرفة كبيرة ومساحة كبيرة خارج القاهرة وشكل الاسرة من الاشياء اللى وجدتها انهم فقراء جدا و بقابا الاكل واللبس تدل على ذلك

مش عارف كنت رايح اعمل محضر ودم كان بيغلى بعروقى باللى شفتة،,,, بس قلبى رق جدا وقلت اكيد الاسرة دى باطفالها عايزين يحتموا من البرد ومطر شتاء واكيد هما اسرة مشردة فجلست وحدى بالبيت اسهر وافكر هل اترك الاسرة تعيش بمقبرة مع ابى وامى ام اشردهم فى برد شتاء قاسى وحر شمس صيف مرة اخرى

حقيقى موضوع غريب .. و محتاج السؤال عن امور دينيه معينه قبل اتخاذ قرارك

الشي الوحيد اللى يتمناه الميت هو رجوعه للحياه للاستزاده من الحسنات و العمل الصالح ..

فهل حلم رجوع والدك للحياه و العمل هو انه اكتسب مزيدا من الحسنات بسبب هذه العائله ؟؟ .. ام يمكن تفسيره بانه يطلب منك اعانه هذه العائله كصدقه جاريه لوالدك ؟ .. ام انه تأذى من وجودهم ؟؟ .. ام شيئ غير هذا و ذاك ؟ .. الله اعلم

شعورك اثناء الحلم بالارتياح او الضيق .. قد يكون مؤشر للمراد من الحلم .. الله اعلم



اللى اعرفه انه لا يجوز المشى فوق القبور ( كنت قرأتها زمان جدا كرأى دينى ) .. بس انت محتاج تسأل دينيا فى النقطه دى علشان انا ما اعرفش بصراحه رأى الدين المؤكد باحاديث صحيحه فى الموضوع ده



و بعدين بعيدا عن حسن النيه .. تعرف منين التاس دول اخلاقهم كويسه و لا بيحششوا فى التربه مثلا .. و لو حبوا يخرجوا بعد كام سنه حيطلبوا خلو رجل ام لا ؟؟ .. و لا حيسكنوها من الباطن مثلا ؟؟ .. الله اعلم



الشيئ الوحيد المؤكد .. ربنا بعت لك باب صدقه جاريه على ابوك .. تديهم اعانه شهريه و لو بسيطه و ربنا يحنن عليهم قلوب اخرى زى ما حصل معاك .. و حياتهم تستمر .. بعيد عن سكن قبر والدك

لانى بصراحه عن نفسى موش حاقبل حد يدوس على امى او يعمل حاجه موش كويسه فوق قبرها .. بس ساكون مضطر نفسيا و اخلاقيا للمساهمه فى اعانه هذه العائله على قدر استطاعتى

و ربنا يسامحنى لو قلت كلام موش صح دينيا .. و انا لو عرفت انى قلت حاجه موش صح ساتراجع فورا عن اى كلمه كتبتنها هنا موش صحيحه دينيا