الموضوع: تغيير مشط الاسبراتير 4-5 مرات كل سنة لاكسنت 1300/2006

السلام عليكم جميعا،

أنا عضو جديد وده أول بوست ليا في المنتدى فسامحوني لو مش على دراية كافية بالقواعد

انا عربيتي اكسنت 1300 موديل 2006، من 2012 كدة ابتدت تقطع معايا، في الاول كنت فاكر السبب الكربيراتير والميكانيكي خلاني نظفته وغيرت فلتر بنزين واللازي منه ولا الهوا، ولكن مرة وهي بتقطع كنت على الدائري فإديت إنتظار لاقيت العربية سحبت، فضل الموضوع ده معايا مثلا سنتين وانا مكبر كل ما تقطع ادوس انظار مرة، اشغل تكييف مرة، اشغل مساحات مرة، وكل مرة تسحب، لحد ما ابتدت متتأثرش وبقت تقطع مهما عملت، وفي الاخر ماتت تماما

الموضوع اتظبط لما غيرت مشط اسبراتير، وقعد معايا سنة ونص او اثنين تقريبا، بعدين الموضوح حصل ثاني ومن وقتها وكل شهرين او ثلاثة بغير مشط ابراتير، بس الجديد بقى انه من 3 شهور بالاضافة لان العربية بتقطع، ابتدا الشكمان يضرب مدافع ولما يضرب مدفع ابص في مراية العربية الاقي غيمة سوده تختفي في ثواني لحد المدفع اللي بعده ولما غيرت المشط من 3 شهور طلع انه شاكوش الاسبراتير مكسور فا بالعافية لقيت شاكوش اسبراتير متسوبيشي استعمال (علشان بتاع الاكسنت كان صيني وصاج مش نحاس) وحطيت المشط القديم وسبت اللي اشتريته احتياطي

طبعا من سنتين كده بتوع قطع الغيار ابتدو ما يدوش ضمان على مشط الاسبراتير لان الموجود صيني (وحتى الكوري كمان اللي بضعف الثمن بيقولي البياع "معاك النهارده" وده بعد ما اتخانقت منعاه). المهم دورت على اسبراتير استيراد مفيش، مشط استيراد مفيش، قلت اسأل على مواتير فرنا مانيول محدش اداني جواب عدل

دلوقتي انا تايه ومش عارف اعمل ايه، مش لاقي قطع غيار عدله وشاكك في الميكانيكي بتاعي انه مش فاهم بيعمل ايه، مرة يقول كربراتير وبعد ما نظفهولي والعربية فضلت تقطع كان عاوز يخرطهولي عند الخراط وانا رفضت، بعد كده اكتشف انه المشط، وفي المرة الاخيرة خلاني اجيب مشط على الفاضي وطلع الشاكوش هو اللي بايظ، وبعد كده مش راضي يديني رقم تقريبي لسعر الموتور لانه مش عارف سعره بعد التعويم، انا مبقيتشي عارف ايه ممكن اعمله علشان احل المشكلة دي، واني اشتري عربية جديدة حاليا حل مش عملي علشان الاسعار

اكون شاكر لو حد قلي على فكرة او حل جديد، او ميكانيكي هايونداي كويس، او اسبراتير استعمال خارج، او اي حاجة يا جماعة انا يئست

شكرا لردودكم، انا وديتها عند ميكانيكي جديد مشهور في المعادي، وقال لي العيب مش في المشط اساسا وعمل الاتي:
1. طقم بوجيهات 160 جنيه
2. فلتر بنزين 50 جنيه
3. فك الكربيراتير ونظفهولي بإسبراي 60 جنيه
4. جاب طقم إصلاح للإسبراتير وفكه ووداه عند الخراط علشان الجلب كان فيها بوش

طبعا انا معنديش فكرة عن نمرة 4، بس هو لسوعني في المصنعية بس 250 جنيه، والحساب كله 630 جنيه.

هو مغيرليش المشط قاللي مش محتاج، فأنا جيت بيها النهار ده الشغل زي الفل، ربنا يستر في الشهور الجاية.

بالنسبة للمشط النظيف ده بقا مش موجود خالص خلاص، الموبينة قال مافيهاش حاجة، وهي نفسها الاصلية اللي عندي من يوم ما جبت العربية زيرو