الموضوع: يوجد اربع وصلات تحت التابلوه مش متركبين - ارجو الافادة

انا عارف ان بيكون فيه جاك فى المكان دة بيتوصل فيه الكومبيوتر بتاع مركز الصيانة، بس ده عادة بيكون جاك واحد

وممكن تكون الضفيرة اللى بتتتعمل للعربية دى والعربية الكاملة هى هى واحدة وبالتالى بتبقى بعض الجاكات بدون توصيل فى عربيتك، يعنى مثلا جاك عداد ال RPM وجاكات المرايات الكهربائية والسنترال لوك وفوانيس الشبورة كلها هتبقى بدون توصيل فى عربيتك

اهم حاجة ان كل حاجة فى العربية شغالة، يبقى فى الحالة دى الجاكات دى زيادة فى الضفيرة علشان ضفيرة واحدة تناسب كل موديلات السيارة

السلام عليكم ورحمة الله وبركاته
الف شكر يا بشمهندس علي الرد السريع وعلي الاهتمام لكن هل ممكن يبقي في اي احتمالات اخري ولا طالما كل حاجه شغاله يبقي تمام
ويا ريت بالمناسبة انا قرات موضوعك عن الزيوت : انا لما اتصلت بالتوكيل عشان اسال عن افضل الزيوت اللي ينصحوا بتغييرها المهندس قال لي شل الترا 5000 كم فارجو النصيحة بخصوص تغيير الزيت خصوصا اني هغيره اليومين دول وخارج التوكيل

طالما ان كل حاجة شغالة يبقى مافيش قلق. اهم حاجة تتاكد ان مروحة الردياتير بتشتغل ومروحة سربنتية التكييف بتشتغل بالإضافة طبع الى ما ذكرت انت من الأنوار وكاسيت ومبينات التابلوه

شل هيليكس 5000 ممتاز، بالمناسبة هو اسمه هيليكس مش ألترا، لأن شل ألترا هو اللى بيقعد 10000

هيليكس 5000 علبته لونها اصفر وسعرة حاجة وسبعين او حاجة وستين جنيه وهيليكس الترا علبته رمادى وسعره 215 جنيه، والاتنين احسن من بعض واستخدام اى منهما يتوقف على رغبتك انت

السلام عليكم ورحمةالله وبركاته
طبعا ان هستغل وجودك في المنتدي وهطمع في مزيد من المعلومات
طبعا طالما ان الحرارة مستواها طبيعي يبقي مروحة الردياتير شغالة وكذلك التكييف ومروحته نفس الشيء ولا ايه رايك
وهل شل هيليكس افضل من موبيل
وهل يفضل اغير الزيت والفلتر علي الف كيلو بالضبط ولا استني شوية عقبال ما الزيت اللي موجود ياخذ رايش الموتور

انا بستريح لشل وتوتال اكتر من موبيل بس دى مسألة راحة شخصية ليس عليها دليل مادى، بس انا بحس مع شل او توتال ان الموتور انعم من مع موبيل

تغيير الزيت حسب كتالوج عربيتك وحسب تعليمات التوكيل انا غيرت زيت عربيتى على 5000 وزمان غيرت زيت اللانوس اول مرة على 5000 لأن دى كانت تعليمات الكتالوج، اما زيت الشاهين فغيرته على 1000 كيلومتر لأنى كنت قلقان لأن الموتور كان مكتوم جدا فى التيين فتوقعت انه طلع رايش كتير