1- مشهد من فيلم امبراطورية الشمس لستيفن سبليبرج عن الحرب العالمية التانية و كان اليأس تمكن من الطفل بطل الفيلم انه يلاقي أهله، ساعتها كان هو في الصين، و كان مترحل هو و عدد من الأسرى و واحدة منهم ماتت، لحظة ما ماتت شاف في الأفق على بعد وهج مضيئ بشدة، ففكر انها روحها بتطلع السما، انما بعد شوية اكتشف ان دي كانت القنبلة الذرية لما ألقت على هيروشيما.. مشهد عبقري الصراحة.
2- مشهد من فيلم شئ من الخوف لما عتريس غرق أرض يحيى شاهين و رجالة عتريس حوالين اللي أرضه غرقانة عشان يحذروه انه يقول تاني ان جوازة عتريس من فؤادة باطلة.. انما هو بمنتهى الثبات بيقول لهم تغريق الأرض مش هايخلي الجوازة مش باطلة.. مهما تعملوا الجوازة باطلة.. الأرض تغرق الأرض تنحرق الجوازة باطلة.
3- مشهد من فيلم عرق البلح و شريهان ركبت نجاتي على الحصان و أول ما مشي بتقول بعزم ما فيها - و هي متأكدة انه مش هايسمعها - وووووووووه يا احمااااااااااد.. عدت راجل يا احماااااااااااااااد. بصراحة أداء شريهان في المشهد ده عبقري.. تعبيرات وشها و رجفة صوتها و هي بتهتف بالطريقة دي بتقول البنت دي بتحب اوي بجد.