الموضوع: مشكلة شخصية وارجو الاستماع الى ارائكم وعقولكم المفتوحة

انا اولا عضو قديم بالمنتدى بس انا فى مشكلة انسانية صعبة جدا جدا وصعب جدا على كرامتى ونفسى انى اصارحكم بمشكلتى الانسانية الغريبة جدا من نوعها بمعرفى القديم معايا وارجو من الادرة التستر على معرفى الحقيقى حفاظا على كرامتى الشخصية

انا من غير تطويل عليكم انا كنت زمان واحد غنى ومبسوط جدا جدا وتزوجت واحدة بعد قصة حب قصيرة او كنت اتوهم انها قصة حب لان الانسان لا يعرف من يعاشر الا وقت الازمات فقط
المهم حصلت ظروف معايا ولطشت الدنيا معايا جامد وافتقرت بشدة ودة شئ عادى جدا وقدر الله المكتوب ولا راد لقضائة ولما افتقرت مراتى طولت لسانها عليا واهانتنى بشدة وفضحتنى وسط الاهل والاصدقاء والاصحاب

المهم .......... انا بقيت اعيش فى مكان ومراتى فى مكان اخر شبة منفصلين بس اسمنا على الورق اننا متجوزين لكن بكل اسف انة جواز اشرف منة طلاق حتى يقضى الله امرا كان مفعولا

الهم عملت بوظيفة بمبلغ لا يتجاوز ال 600 جنية فى احد شركات ويادوبك بدفع النص مواصلات والباقى عايش على فول وطعمية زى زى اغلب المصريين والحمد لله ماشى جنب الحيط راضى وقانع ومش بشتكى ومفيش عندى مشكلة فى قسمتى ونصيبى

وانا بالشركة كنت بجلس دائما وحدى فى حجرة مغلقة واوقات الفراغ بقرا قران واقيم الصلوات لو حصل ان الوظيفة طلبت سهر... بسهر وبستغل الفرصة اقيم الليل ...الخ

وفجاءة حصل شئ غريب جدا بحياتى وانا بالغرفة المغلقة وكعادتى يوميا كنت ساجد ف لليل بين يدى الله خاشع وابكى من خشية الله وفجاءة دخلت عليا واحدة ست مطلقة بالشغل معايا وعرفت بعد كدة انها غنية جدا ومن اسرة ميسورة ولاقتها بصت لية باستغراب جدا وانا ساجد بين يدى الله وحسيت ساعتها ان عينها بتقول شئ لية ... انتهى الموقف باعتذار انها لم تكن تعرف ان الحجرة المغلقة فيها حد وانتهى الموقف .... بس بعدها لاقيتها فى شغل نظراتها وعينها عليا انا ..... مكنتش مصدق ان ممكن تكون الست دى فعلا ممكن تبصلى اصلا لانى بروح شغل بلبس قديم ومش شيك وموبيلى من اول ما خترعوا النوكيا القديم جدا اول جيل نوكيا وقلت فى عقل بالى انى بتوهم شئ جوايا

مرت الايام كل الى بيينا نظرات فقط وفقط وفى صمت تام تام

وفى يوم فجاءة لاقتها بتقترب منى وهى من تبدء الحوار معايا . صدمت جدا جدا خصوصا انها ست صغيرة بالسن و متوسطة الجمال وغنية وميسورة واصغر منى ب عشر سنوات ....... وبدء المسشوار معاها وبدئت اكلمها على الموبيل كلام خفيف

المفروض دلوقت حضرتك تعتقد انى خلاص هابدء معاها قصة حياة جديدة واكون اسعد انسان بالوجود بالست الجديدة اللى دخلت حياتى ....خصوصا انها هى من طلبتنى رغم ظروفى السيئة جدا

لكن فى واقع الامر انا فى ورطة كبيرة جدا ...... انا كاتب على نفسى وصل امانة لمراتى الاولى بمبلغ كبير جدا(مليون جنية) كنت كتبتة على نفسى ايام ما كنت غنى وعندى رصيد بالملايين فى البنوك وفى واقع الامر انا مخدتش من مراتى ولا جنية واحد او اى فلوس بس مرة كنا متخانقين مع بعض وانا حبيت اثبت لها حبى وانى شاريها فكتبت وصل الامانة على نفسى (عارف انى حمار كبير جدا جدا) بس انا من النوع العاطفى الساذج جدا جدا فى فوق كل تصور

طبعا دلوقت سيادتك ممكن تتصور لو مراتى الاولى عرفت انى هتجوز عليها ممكن تعمل فيا اية ووصل الامانة اللى عليا هتستخدمة ازاى لو شمت بس خبر انى اتجوزت عليها

لما بكلم الست الى حبتها واحبتنى ........ بتستغغرب انى مش ملهوف على الزواج منها وعكسها تماما خصوصا انها فرصة كبيرة جدا جدا لواحد فى مثل ظروفى المنيلة جدا جدا وانا حقيقى من جوايا بتقطع ونفسى اقلها السر اللى انا مخبية جوايا وانى فى ورطة كبيرة بسبب وصل الامانة اللى عليا

انا فى حيرة كبيرة لو صارحت الست بمشكلتى ....... ممكن تتفكر انى طمعان فى فلوسها او عامل حركة نصب عليها _وحتى ممكن تفتكر انى انا ومراتى الاولى بننصب عليها كمان ) والله يعلم انى مش طمعان فى اى حاجة الا فى حضن دافى بليل اترمى فية ويعوضنى احزانى يداوى جروحى والامى فى الدنيا اللى غدرت بيا بعد ما كنت بعيش فوق السحاب

ولو حتى صارحت الست وتفهمت موقفى السئ جدا وهيا عرضت عليا تدفع الفلوس لو مراتى هددتتنى بوصل الامانة اللى عليا ..تخيل انت واحدة ست تدفع فلوس ومبلغ كبير جدا ولمين ؟؟؟ لضرتها ؟؟؟ شئئ حتى فى افلام السينما متعملش

ولو دة حصل انا هستحقر اصلا نفسى انى ابدء حياتى مع واحدة ست دفعتلى فلوس وتمن خطئى انا

لو انت مكانى فى قصتى الغريبة جدا اية اللى ممكن تعملة ؟؟