العربية اتقلبت و عايز مساعدتكم فى التعامل مع الجمعية و مراكز الصيانة

**foxking_369** · 11-12-2008 12:49 PM

الف حمد لله على سلامه حضرتك و سلامه الاسره بجد موضوع ظبط الضغط داخل العجل مهم جدا و بسببه برده دا هيحصلنا حادثه زى دى بس ربنا ستر و والدى هدى السرعه قوى لانه حس ان العربيه بتدب على الارض و بعد 5 دقايق العجلى اللى ورا يمين اتقطعت ( لانها كانت واخده اكتر من خابور ) الحمد لله محصلناش اى حاجه احنا او العربيه و من ساعتها اشترينا مقياس ضغط علشان نتاكد ورا العظماء بتوع الكاوتش دول - حسبي الله و نعم الوكيل -

**omarkh** · 11-12-2008 01:05 PM

1000 حمدا لله على سلامتك وسلامة الاسرة

**MohaMed_Refaat** · 12-12-2008 08:34 AM

حمد الله على سلامتك والحمد الله انك بخير .

**polo61** · 12-12-2008 10:07 AM

الف حمد لله على سلامتك والاسرة
اما بخصوص تأمين الجمعية انصحك بالهدوء فى التعامل معاهم حتى يعين ربنا وتقدر تخلص اجراءات اصلاحها
يعنى نصيحة احتفظ بأعصاب هادية وادينا ورا الكداب لحد باب الدار ( حسب المثل العامى )
وربنا معاك

**Ahmed REDA** · 12-12-2008 10:15 AM

حمد الله علي سلامة حضرتك و الاسرة الكريمة

مش مهم العربية دية حتة حديد
المخم ان حضرتك و اسرتك بخير

**AAAPRD** · 12-12-2008 01:34 PM

أعزائى اعضاء المنتدى
شكرا جزيلا على مشاعركم النبيلة

ان شاء الله بكره هاروح التوكيل علشان اعرف تكلفة الاصلاح بشكل تقريبى و كمان المدة المتوقعة لعملية الاصلاح.
و بعد بكرة هابدأ المشوار مع الجمعية لانهم اجازة السبت

بعض الاصدقاء ينصحون بعمل الصيانة عند مركز من المراكز المتعاقدة مع الجمعية و خصوصا ان معظم الشغل سمكرة علشان اتفادى دفع الفلوس من جيبى و الله اعلم هاخدها من الجمعية امتى و ازاى.
يا ريت اي عضو خاض التجربة دى لا يبخل علي بالنصيحة
على فكره العربية عاملة 13 الف كيلو بس

و شكرا جزيلا مرة اخرى على شعوركم الطيب و شكر خاص للاستاذ كريم منير لعرضه المساعدة و ان شاء الله سوف اتصل به عندما اصل لقرار الاصلاح فى التوكيل او برة التوكيل

م. أحمد

**kita66** · 12-12-2008 01:41 PM

1000 حمدا لله على سلامتك وسلامة الاسرة

**momenhamdy** · 12-12-2008 01:48 PM

الف حمد لله علي سلامتك و علي سلامه الاسره الكريمة
و ان شاء الله العربية ترجع زي الاول و احسن
وربنا يوفقك الي الخير بأذن الله

**kedab2a** · 12-12-2008 04:36 PM

ألف حمدالله على سلامتكوا جميعا
أنا كنت لسه خابط عربينى من أدام من شهر تقريبا وانا برضه مأمن مع الجمعية
أهم حاجتبن هما انك تعمل محضر طالما تكاليف التصليح هتعدى 5000 جنبه لإنك لو معملتش محضر هيخصموا منك 25% من تمن التصليح ، وتانى حاجة انك لازم تعمل اخطار فى التأمين خلال 72 ساعة من الحادثة زى ماهو مكتوب فى ورق التأمين اللى معاك وبصراحة معرفش لو اتأخرت هيحصل ايه ، وفى حاجة كمان حاول تعملها وانت رايح تعمل الإخطار وهى انك تحاول تشوف موظف هناك يظبطك ويملالك ورقة الإخطار عشان يظبطك كويس فى وصف الحادث اللى هتكتبو فى الإخطار وعشان ميجيش حد يتلككلك بعد كده و يئولك انا موافق على تصليح كذا وكذا لكن كذا وكذا التانى ده لأ ويئولك إن ده كان حاصل فى حادثة تانية أو أى تلاكيك من بتعتهم عشان يوافروا ... المهم وانت بتعمل الإخطار هيسئلوك عايز تصلح فيييين؟ وسعتها عندك اختيارين ، الأول هو انك تسبهلهم يصلحوها فى ورش تبعهم وسعتها على كلمهم انهم هيدفعوا علطول وتيجى تاخد منهم العربية جاهزة ، أما الإختيار التانى هو انك تختار مركز صيانة معين زى السبع مثلا و سعتها هيئولولاك انك هتصلحها على حسابك و بعدين هما هيطلعولك شيك بالمبلغ بعد كده (وحتة بعد كده دى ممكن تبأى شهر أو اتنين والله أعلم) المهم أنا أعتقد ان التصليح فى مركز صيانة هيكون أفضل عشان بتكون شايف عربيتك وبتاخد نمرة المهندس اللى مسئول عنها وبتقدر تطمن منه على الوضع أول بأول.
آخر حاجة بأه أبل موضوع الشيك انك تاخد أى قطعة غيار التوكيل غيرها عشان ترجعها للجمعية عشان برضه لو مرجعتهاش هيخصموا منك 25% ، بعد ماتخد قطع الغيار هتوديها عند مبنى الجمعية اللى فى العباسية جمب عمرأفندى وهتلائى عربية نقل خضره وئفه تحت أدام البنك اللى فى مبنى الجمعية من تحت بتاخد منك قطع الغيار وحيروحوا مضينلك بالاستلام ويئولك بعد كده تعمل ايه من امضائات وأختام.
طبعا متنساش تصور أى ورقة وتاخد أى رقم للمحضر أو لسجلك فى التأمين أو أى حاجة وكمان وانت رايح تعمل اخطار خد معاك صور البطاقة والرخص.

وسامحنى اذا كنت نسيت حاجة
وربنا معاك فى الحوار ده عشان انا عرفه عايز مجهود وشوية تفرغ
وبالتوفيق إن شاء الله

**tebeeb** · 13-12-2008 12:03 AM

ألف حمد الله على السلامة...

أنا حصلت لي حادثة في آخر شهر يوليو، قبل ما تظهر مشاكل الجمعية، لكنها ظهرت قبل ما استلم العربية،وبالتالي اضطريت أدفع الفاتورة بالكامل، وسلمت قطع الغيار والفاتورة للجمعية في أول شهر 10،ولسة مستني الشيك.

الجديد إنهم وقفوا استلام التالف من أول ديسمبر وهيخصموا مبلغ 5% من مبلغ التعويض، واتصرف انت في القطع التالفة.

بالنسبة لي هما خصموا كثير في التسوية اللي عملوها عن مبلغ الفاتورة (حوالي 9000 جنيه بحجة إن الفاتورة تعدت القيمة القصوى للإصلاح (وهي 30% من مبلغ التأمين على حد زعمهم)، بالرغم من موافقة المهندس على المقايسة المبدئية قبل الإصلاح، ولأني مش بتاع مشاكل استعوضت ربنا، وعلى الله ما يخصموش حاجة من الشيك عن مبلغ التسوية.

أهم حاجة انك تعمل معاينة قبل الإصلاح، وبعد الإصلاح، ومتنساش محضر الشرطة، وأصل الفاتورة المختوم، وصور الرخص، وبعد كده الصبر ثم الصبر ثم الصبر.