ماروتي-2014-اتخبطت-حليت-سمكرت-نزلت-المارش الصبح تقيل مش بيكمل دوران

**أبو بلال** · 05-12-2017 09:47 AM

أصدقائي، وشكرا مقدما للاهتمام
ربنا يعافيكو، العربية خدت خبطة متوسطة، اضطريت عشان اسمكر احل الماكينة والتابلوه، وبعد السمكرة ركبتهم، وماشي بالعربية ومازال فيها مشاكل كتير، المشكلة المؤرقاني حاليا، هي إن المارش الصبح بيبقى تقيل جدا جدا، بسمعه بيلف لفة أو اتنين بالعافية ومش بيكمل الباقي، وكأنه كان ناوي يطلع جبل، وغير رأيه بعد خطوتين،
لو دارت زق أو أي حاجة بتبقى كويسة مفهاش مشاكل
خبرتي قليلة والصنايعية بتشوف الخبطة بتفتري تقعد تقولي غير كل حاجة
عايز اعرف دي مشكلة سلوك، ولا بوجيهات، ولا مارش، ولا كونتاكت ولا كاربراتير ولا ايه؟
ناس بتقولي طالما المارش مش بيلف للاخر يبقى العيب موصلش للبوجيهات وسلوكها، ولا الكاربيراتير، لسه المارش اصلا ملفش؟
مش عارف

**salam100100** · 05-12-2017 10:11 AM

خلينا نبتدى بالسهل
1. البطاريه لو كويسه خش على اللى بعده
2. المارش واللقط بتاعه- ممكن يكون عاضض فمبيلفش بحريه
3. الوصلات والاهم الارضى
4. صوت المارش وترس البندكس

روح لكهربائى يكشف على البطاريه- ويفك المارش ويجربه بره- ممكن يكون ثقيل بسبب رمان بلى بايظ- او ممكن يكون اتفك ومركبش فى مكانه عشان كدا بيعض

الموضوع سهل وبسيط وانشاء الله تلاقى يتصلح بسرعه بدون مصاريف

الماروتى عربيه بسيطه وعمليه جدا انا لسه بايع عربيتى الماروتى من اسبوعين موديل
1998
نزلتها على olx وبيعتها بعد 4 ساعات من الاعلان
اكتشفت انها عربيه محبوبه جدا- وكنت متاثر وانا بابيعها

**أبو بلال** · 05-12-2017 10:28 AM

شكرا يا صديقي على الاهتمام،
طيب، قبل ما اروح للكهربائي يحل المارش، هل فيه اشياء اقدر اعملها بنفسي اتأكد منها قبل ما اروح، وصلات المارش، خاصة الأرضي، وهل للموبينة اي دور، هل ليها دور مع المارش؟
...
ملحوظة: صوت المارش طبيعي، ولكنه بطيء، ويلف لفة واحدة مش اكتر
...
وازاي اقدر اتأكد ان البطارية كويسة أو انتهى امرها؟
..
ملحوظة تانية: المارش ساعات يبقى كويس وساعات يعتّل كده
..
ملحوظة تالته: البطارية فضلت محلولة شهر برا العربية، فهل ده يأثر على اداءها؟

**salam100100** · 05-12-2017 11:01 AM

كون البطاريه اتحلت بره وقعدت شهر مكوكه دا احسنلها

فالعادى ممكن تشيك على البطاريه بانك قبل ما تدور المارش نور النور (الوسط مش العالى) ودور المارش لو النور خفت خالص ونور الطابلوه خفت خالص
يبقا كدا البطاريه ماتت
العادى ان النور يخفت حاجه بسيطه مش يطفى خالص- لكن لو طفا خالص يبقا البطاريه ماتت
فى حالتك لو المارش بيعض يخلى نور العربيه يبهت ويختفى ويخليك تفتكر ان البطاريه نايمه
فغالبا الاختبار دى ممكن ميكنش عملى لكن اعمله

البوبينه ملهاش علاقه فى حالتك

ببساطه البطاريه بتغزى المارش بطاقه - الطاقه دى جزئين جزء بيزء ترس البندكس عشان يعشق فى ترس الفولان للامام وجزء بيروح للموتور الكهرباء عشان الترس الصغير يلف
مشكلتك بتنحصر فالبطاريه والمرش فقط مدام انت بتقول ان العربيه بالزق بتقوم وبتمشى تمام

**أبو بلال** · 07-12-2017 02:54 AM

شكرا يا صديقي على اهتمامك، المشكلة طلعت فعلا من البطارية، اللي خلاني احترت من البداية إن الناس فالشارع قالتلي طالما بيعتل يبقى مش البطارية
...
جبت بطارية بتاعة عربية تانية وجربتها العربية دارت عادي
...
السؤال دلوقتي وتاعبك معايا، هل البطارية تتبدل فوري؟ ولا بيتعملها شحن أو كده وترجع طبيعي، ولا ايه حكايتها؟
...
ملحوظة، الخبطة من شهر ونص ريحت على البطارية ومعرفوش يطلعوها الا لما شدوا الصاج شوية، فهل ممكن الخبطة تبوظ اداءها؟ وهي جافة على فكرة
ملحوظة2، دلوقتي قبل ما ابطل بالليل بدوس بنزين تلات مرات كده عشان اشحن البطارية زي ما الناس بتعمل، وبتدور معايا الصبح
...
والطبيعي إن عمر البطارية اصلا قد ايه؟ واحتاج اغيرها؟ البطارية دي من 2014

**salam100100** · 07-12-2017 08:44 AM

للاسف البطاريه الجافه بتموت فاجئه بدون مقدمات ملحوظه
وعمرها مبترجع تانى
وعمرها فالمتوسط سنتين
ممكن تعد اكتر ل5 سنين مثلا
اعتقد بطاريتك 3 سنين حلوين عليها كدا