استفسار محيرنى جامد عن فرق الزيت الماتور

السلام عليكم

بما انى عندى فضول عن زيت الموتور الافضل فى السوق من حيث اطالة عمر الموتور ده فى المقام الاول و حيث السحب و نعومة التسارع و كنت محتار جدا جدا جدا

انا حاليا بستخدم زيت توتال كوارتز 9000 5w40 و واخد اعلى جودة ACEA SN و A3/B3 و كلام ده كله متوافق تماما مع متطلبات الكتالوج الرينو

طيب الزيت ده يعنى حاسس انه فى احسن منه رغم انه متوافق مع توصيات الكتالوج فهل فعلا فى احسن منه بحيث يدى للموتور عمر افتراضى اعلى و يدى نعومة و صوت اقل فى التسارع تحت ظروف التشغيل الشاقة ؟

ولا توتال 9000 ده كافى و بزيادة ؟؟ و اثبت عليه على اساس انه متوافق مع الكتالوج و هيدينى افضل اداء مهما غيرت لانواع تانية ؟

معلش انا عارف انى بسأل كا مرة بس عشان دماغى تهدى

عشان تحافظ على الماتور خليك فى الزيت الاقرب مسافة
عشان مستوى اللزوجة بتاعه بيقى افضل من9000
ويقل مستوى اللزوجة كلما زاد عدد استهلاك الكيلو متر
وخليك فى الزيوت الاقل كم
زى 5000 موبيل او mx 3000موبيل
وكله فى الاخر برضه حسب استهلاكك

اقتباس:

---

المشاركة الأصلية كتبت بواسطة ahmed.biso13

عشان تحافظ على الماتور خليك فى الزيت الاقرب مسافة
عشان مستوى اللزوجة بتاعه بيقى افضل من9000
ويقل مستوى اللزوجة كلما زاد عدد استهلاك الكيلو متر
وخليك فى الزيوت الاقل كم
زى 5000 موبيل او mx 3000موبيل
وكله فى الاخر برضه حسب استهلاكك

---

تمام

طب فى زيوت زى موتول و امسويل دول افضل كحماية اكتر للموتور و نعومة و تسارع افضل ؟؟

نوع الموتور k4m

ناوى ان شاء الله احط 5w50 عامل 17 الف كيلو

لازم الأول نتأكد من طلبات الكتالوج قبل أي حاجة...

أنا فاكر إن حضرتك حطيت صورة من زمان وقلت إن دي توصيات الكتالوج
https://www.nilemotors.net/Nile/4872...post3876073784
http://s32.postimg.org/q9sh5hll1/20160506_213329.jpg

وكمان حضرتك حطيت رابط لملف الـpdf بتاع "المذكرة الفنية" رقم 6013A

المذكرة الفنية دي رينو نزلتها سنة 2004 قبل ما تعمل لنفسها مواصفات باسمها خاصة بالزيوت....

رينو حاليا عندها مواصفتين للزيوت.. واحدة اسمها RN0700 والتانية اسمها RN0710... ويفضل إن الزيت اللي تشتريه يكون مطابق للمواصفتين دول.


بشكل عام.. رينو متساهلة عموما بالنسبة لزيوت الموتور بتاعت عربياتها... خصوصا لما نعرف إنها المفروض تكون عربيات اقتصادية في المقام الأول.. يعني مش المفروض نصرف كتير على نشغيلها..

دي توصيات زيت الموتور لأغلب مواتير رينو (الصورة من كتالوج رينو فلوينس وفيها نفس الموتور اللي دايما ينزل في مصر K4M)..

http://nileup.com/up/uploads/nilemotors_14704983111.png

حسب الصورة دي... تقدر تحط تقريبا كل درجات اللزوجة..

ومستوى أداء الزيوت مش مربوط بجهة معينة.. يعني لو لقيت زيت معتمد من API بس يمشي معاك.. ولو لقيت زيت معتمد من ACEA بس بردو يمشي معاك.. وحتى لو لقيت زيت عليه مواصفة رينو بس هيمشي معاك..

المهم إنك تلتزم بتقاطع كل مواصفة مع اللزوجات بتاعتها...

أنا شخصيا أفضل تجيب زيت يكون عليه كل شروط مواصفات الأداء دي مع بعض..
يعني زيت عليه تصنيف API SL على الأقل مع مواصفة ACEA A1 أو A3 أو A5.. ويكون كمان معتمد من رينو...

الزيوت اللي عليها الحاجات دي (حسب الكتالوج) هتكون بلزوجة 0W-30 أو 0W-40 أو 5W-30 أو 5W-40 أو 10W-40 .. بس.


بناء على الكلام ده... زيت توتال كوارتز 9000 اللي حضرتك بتحطه مش هو أفضل شيء للموتور بتاعك!!!

عموما .. أنصحك بأي زيت من دول:

زيت شل هيليكس ألترا 5W-30 أو 5W-40...
SHELL HELIX ULTRA 5W-30
SHELL HELIX ULTRA 5W-40

وكمان .. شل هيليكس HX7 (شل الأزرق) بلزوجة 10W-40 (نصف تخليقي)
SHELL HELIX HX7 10W-40


زيت مانول إليت بلزوجة 5W-40
https://www.mannolegypt.com/fb/p/sit...te-1.800x0.jpg
https://www.mannolegypt.com/fb/p/ar/...ine-oil/elite/

ولو عندك موزع لزيوت بترومين.. أنصحك بزيت بترومين A-1 بلزوجة 5W-30.
http://www.petromin.com/old_site/res...ies/37-123.jpg


ولو عايز حاجة كويسة جدا جرب تحط زيوت آمسويل يوروبيان.. عندهم 3 أنواع يمشوا معاك...
European Car Formula 5W-40 Classic ESP Synthetic Motor Oil

European Car Formula 5W-40 Improved ESP Synthetic Motor Oil

European Car Formula 0W-40 Classic ESP Synthetic Motor Oil

دور بردو عند زيوت موتول (Motul).. عندهم حاجات كتير تمشي معاك...


من وجهة نظري... أفضلهم هي زيوت آمسويل وموتول... بشرط واحد...

إنك تتأكد إن الزيوت من المجموعة 4 أو 5...

عايز تعرف إيه الفرق؟؟؟ ادخل على الموضوع ده:

الزيوت التخليقية ... هل هي تخليقية فعلا؟؟


...

اولا تسلم لرد حضرتك و شكرا على وقتك و المجهود الكبير وربنا يكرمك

ثانيا انا عايز اجيب امسويل signature 5w50 فهل استخدمة و مناسب و فى بردو 10w30 فهل ينفع استخدمهم ؟؟ وانا اختارتهم نظرا لاختبارات الراجل ده https://www.youtube.com/channel/UCLQ...X_lgTzaz4Ua1IA
فعرفت ان افضل زيت امسويل تحت درجة حرارة 100 هو 5w50 و 10w30

و ليه مش مكتوبين فى الكتالوج بتاعى 10W30 مع ان فى 10W40

.....................

ده رابط احدث بياكد على ان ينفع اللزوحة 5w50 تتحط صح كلامى ولا ايه ؟ملف مرفق 16725

اقتباس:

---

المشاركة الأصلية كتبت بواسطة renaultstepway

اولا تسلم لرد حضرتك و شكرا على وقتك و المجهود الكبير وربنا يكرمك

ثانيا انا عايز اجيب امسويل signature 5w50 فهل استخدمة و مناسب و فى بردو 10w30 فهل ينفع استخدمهم ؟؟ وانا اختارتهم نظرا لاختبارات الراجل ده https://www.youtube.com/channel/UCLQ...X_lgTzaz4Ua1IA
فعرفت ان افضل زيت امسويل تحت درجة حرارة 100 هو 5w50 و 10w30

و ليه مش مكتوبين فى الكتالوج بتاعى 10W30 مع ان فى 10W40

---

حضرتك عايز تعرف إيه الأحسن لموتور عربيتك.. مش كده؟؟؟

أنا بقول لحضرتك إن أفضل شيء هو المكتوب في الكتالوج... ومفيش أي حاجة تانية غيره..

صحيح إن زيوت آمسويل سجنتشر تعتبر من أحسن الزيوت في العالم حاليا..
بس للأسف.. سلسلة زيوت آمسويل سجنتشر عموما غير مناسبة للاستخدام في السيارات الأوروبية بشكل عام... لإن زيوت آمسويل سجنتشر مخصصة للسيارات الأمريكية (واليابانية والكورية بردو)... وأغلبها مش متوافق مع طلبات المواصفات الأوروبية ACEA.

راجع أرقام مواصفات زيوت السيارات في البروشور بتاعهم هنا... كلها أرقام خاصة بسيارات جنرال موتورز وفورد وكرايسلر وهوندا...
Signature Series Data Bulletins g2880

آمسويل عندها سلسلة زيوت تانية اسمها يوروبيان European مناسبة أكتر لعربيتك.. تقدر حضرتك تختار منها اللي يناسبك
Amsoil European
ودي الداتاشيت بتاعتها...
European Car Formula Databulletins g3395

كلها أرقام مواصفات شركات أوروبية... وأولها رينو..

على فكرة.. الاختبار اللي الراجل ده بيعمله هو واحد من ضمن أكثر من 35 اختبار بيتعملوا على الزيت..
خد فكرة عنها من هنا..
api-engine-oil-classifications.pdf

تفتكر حضرتك ينفع أحكم على منتج معقد زي زيت الموتور باختبار واحد بس؟؟؟


ليه بقى اللزوجات دي مش مكتوبة في كتالوج عربيتك؟؟؟
علشان ببساطة مش مناسبين لموتورك... بس كده.

رينو لما أصدرت مواصفة RN0700 في سنة 2007 .. لغت اللزوجات دي لإن على ما يبدو.. مهياش مناسبة للاستخدام في مواتيرها.. أو بمعنى أصح... مش هتديك أعلى أداء.

على فكرة.. مواصفة RN0700 بتفضل إنك تستخدم لزوجة 10W-40.. دي أفضل لزوجة لمواتير رينو بشكل عام...

ده نموذج لزيت مخصص لمحركات رينو فقط... وشارح فيه الفرق بين مواصفات رينو للزيوت (RN0700 / RN0710)
Motul Specific 0710-0700 5W-40

هو اللي أنا مستغرب له ليه رينو ما حطتش مواصفة RN0700 في كتالوجك؟؟؟
تفسيري الوحيد إن رينو ما عملتش كده علشان عربية حضرتك أساسا مهياش رينو... دي "داتشيا" الرومانية.. يعني عربية اقتصادية موجهة للدول النامية... وعارفين كويس إن مواصفة رينو ممكن ما تكونش موجودة بسهولة في الدول اللي العربية بتتصدر لها.


على فكرة.. اختيار اللزوجة له معايير.. أولها طريقة استخدامك للعربية.

تقدر تعرف معلومات أكتر من هنا...
إزاي تختار لزوجة زيت الموتور المناسبة لعربيتك؟؟؟

اقتباس:

---

المشاركة الأصلية كتبت بواسطة renaultstepway

ده رابط احدث بياكد على ان ينفع اللزوحة 5w50 تتحط صح كلامى ولا ايه ؟ملف مرفق 16725

---

ده مش أحدث ولا حاجة...

دي المذكرة الفنية إياها.. Renault TechnicalNote 6013A.. اللي صدرت سنة 2004

في الوقت ده.. رينو كانت بتتعامل مع الوضع القائم في السوق.. خصوصا إن مواصفات الزيت اللي كانت سايدة في أوروبا في أواخر التسعينات ولحد أوائل الـ2000 كان اسمها CCMC.. ومواصفات الـACEA نزلت أول مرة في سنة 2002...

فالمذكرة دي نازلة علشان تعرف الناس تستخدم إيه من الـACEA بدل الـCCMC القديمة... وحضرتك لو حاولت تدور على أي زيوت في السوق مطابقة لمواصفات CCMC مش هتلاقي..

وراجع المذكرة مرة تانية... لإن المذكرة مقسومة لجزئين.. واحد للعربيات في أوروبا.. والتاني للعربيات بره أوروبا.


ملخص الكلام... ارجع لكتالوجك.. هو مرجعك الأهم والوحيد..

http://s32.postimg.org/q9sh5hll1/20160506_213329.jpg


وما تسمعش لكلام ناس تانية مهما حصل.


...

والله حضرتك انا متشكر على مجهودك ده طب انا دلوقتى فى الضمان و فى نفس الوقت عايز حاجة نظيفة و تحافظ على الموتور منغير قلق فأسلم حل اخلينى مع زيت التوكيل ولا اسيبه يحط الزيت و اخد الزيت ده و احط زيت من عندى افضل من زيت التوكيل ؟

والله حضرتك انا متشكر على مجهودك ده طب انا دلوقتى فى الضمان و فى نفس الوقت عايز حاجة نظيفة و تحافظ على الموتور منغير قلق فأسلم حل اخلينى مع زيت التوكيل ولا اسيبه يحط الزيت و اخد الزيت ده و احط زيت من عندى افضل من زيت التوكيل ؟ انا نفسى فى افضل زيت يخلى اداء الموتور احسن

رأيي حضرتك تستفسر الأول إذا كان ممكن تجيبلهم زيت معاك (بعد ما تكون أخدت موافقتهم عليه)... أو إنك تستثني تغيير الزيت من الصيانة...
وبردو لازم تعرف إيه الصيانات اللي حضرتك ممكن تتجاهلها عندهم من غير ما تأثر على الضمان.

يعني مثلا... أغلب الصيانات بتبقى عبارة عن تغيير زيت وفلتر زيت وفلتر هوا بس...
طيب هل لو ما عملتش الصيانات دي وعملت الصيانات المهمة بس (20 - 40 - 60 - 80 ألف ...) الضمان هيروح؟؟؟

لو مفيش أي حاجة تقدر تعملها من دول.. ساعتها ممكن تبقى تنزل الزيت زي ما حضرتك عايز تعمل...

بس دي كده فلوس كتير هتدفع بدون استفادة...
وكمان الزيت الجديد مش هتستفيد بيه 100%.. لإن بواقي الزيت السابق بتأثر على إضافات الزيت الجديد وتقلل من أداؤه... علشان كده بنفضل الاستمرار على نوع واحد من الزيوت.. مش كل شوية نغير.

ده غير اعتبارات تانية.... زي:
لو حضرتك عايز تحافظ على الموتور علشان يعيش معاك أطول مدة ممكنة... فأرجو إنك تشيل الموضوع ده من دماغك...
أي عربية في الوقت الحالي عمرها الافتراضي لا يزيد عن 15 سنة...
أول 5 سنوات منها يفترض إنها خالية من المشاكل..
وتاني 5 سنوات فيها بعض المشاكل اللي غالبا بتكون بسبب تحلل الأجزاء المطاطية .. زي الخراطيم والجوانات والأويلسيل.. وانتهاء عمر السوائل.. زي زيوت الفتيس والفرامل ومياه الرادياتير..
وثالث 5 سنوات فيها مشاكل أكبر بسبب استهلاك قطع كبيرة نسبيا.. زي الكبالن والمساعدين والمقصات...

وعلشان تستفيد من العربيات فعليا .. بمعنى إنك هتصرف أقل وتاخد أكتر.. فأول 7 سنوات تعتبر هي العمر المفيد في العربية.. بعد كده لازم تتخلص منها.

يا ريت نطلع فكرة عربية العمر دي من دماغنا... مفيش مكنة في الدنيا بتعيش طول العمر.

...

والله حضرتك لك كل التقدير و الاحترام و مش هعرف اشكرك ازاى ..

طيب كدة بقا خلينى مع زيت التوكيل لاخر مدتة الطبيعية و لما اخرج من الضمان ابقا احط امسويل اوروبى و يكون كود الرينو موجود و كده كده زى محضرتك قولت الموتور له عمر افتراضى معين مهما كان جودة الزيت و حتى لو الزيت مناسب 100 فى 100 و احسن حاجة فى السوق مع انى فاهم كل كلمة و كود فى مواصفات الزيت مع ذلك محتار لوجود كذا نوع و كله بيوعد بالاداء العالى لكن الواحد بيحتار بردو

هداك الله فى حياتك

طب كدة مفيش امسويل سجنتشر مناسبة ليا خالص او حتى يمشى معايا عشان مميز اوى بصراحة كفاية بيعد سنة وانا مطمن

اقتباس:

---

المشاركة الأصلية كتبت بواسطة renaultstepway

طب كدة مفيش امسويل سجنتشر مناسبة ليا خالص او حتى يمشى معايا عشان مميز اوى بصراحة كفاية بيعد سنة وانا مطمن

---

من ناحية اللزوجة.. سلسلة سجنتشر عندها 3 لزوجات تمشي معاك.. 0W-30 و 0W-40 و 5W-30

من ناحية المواصفات... فالأفضل تروح على الـ0W-30 أو الـ5W-30... لإنهم الاتنين واخدين تصنيف ACEA A5 بالإضافة إلى API SN طبعا.

إنما الـ0W-40 واخد تصنيف API SN فقط

تقدر تراجع المواصفات في آخر صفحة من البروشور ده.. من هنا..
Signature Series Data Bulletins g2880

طبعا أنا هنا ركزت على المواصفتين دول بس علشان أنا بتكلم من وجهة نظر كتالوج عربيتك... وما ليش دعوة بأي مواصفات تانية مكتوبة على علبة الزيت أو في البروشور.


وزي ما قلت لحضرتك قبل كده.. الزيوت تمشي معاك حسب الكتالوج... بس مش هي أفضل شيء للموتور.

والاختيار لحضرتك في الآخر :)

والله انا مش عارف اشكر حضرتك ازاى . جزاك الله كل خير