دعوة للاشتراك فى دورة اسعافات اولية لاعضاء الموقع
السلام عليكم و رحمة الله و بركاته
من كام يوم كريم منير اثار موضوع مهم خاص بالاسعافات الاولية و جهل الناس فى الشارع و تعاملهم بعدم احترافية مع المصابين فى الحوادث, الامر اللى بينتج عنه مضاعفات اكتر من مساعدة للمصاب
و كان نادر نبيل برده سئل على الدورة دى, ففكرت ليه مندعوش اعضاء الموقع كلهم اللى معندوش خلفية عن الموضوع ده للاشتراك فى الدورة دى.
مبدئيا الدورة دى حاجة مهمة جدا جدا, و لا يمكن يا جماعة تتخيلوا كم الاستفادة و المعلومات اللى هتتعرفوا عليها من خلال الدورة, و مش هقولك انت ممكن تنقذ حد فى الشارع او حاجة, انت ممكن تحتاجها مع اقرب الناس لك, اخوك, والدك, زوجتك,الخ.....
الدورة دى مدتها عشرة ايام, كل يوم 3 ساعات. جزء منها نظرى و جزء عملى على عرايس (stimulation) فى القصر العينى
هما بيفتحوا مجموعة من حد ادنى 100 شخص, لكن بعد اما سألت هما ممكن يفتحوا مجموعة للاشخاص اللى ملهومش علاقة بالمجال الطبى (non-medicals) بس يبقى عدد كويس مش شرط 100 و تبقى لاعضاء الموقع و معارفهم. يعنى ممكن تجيب اصحابك فى الشغل, اخوك, والديك, زوجتك, علشان تبقى الفايدة تعم على الجميع
بما ان الدورة مقتصرة على اعضاء الموقع, فمن الممكن اختيار ميعادها كمان, علشان فى ناس كتير بيبقى عندها شعل مثلا و صعب تيجى الصبح بدرى, فممكن مثلا تتعمل من 4 الى 7 مساء
الدورة بتشتمل على حاجات كتير جدا زى الغرز, اعطا الحقن, التغيير على الجروح, كيفية اعطاء الادوية, التعامل مع الحروق و الحوادث و الكسور, ده غير طبعا التنفس الصناعى و ال CPR
تكلفة الدورة 65 جنيه للطلبة (يجيب ما يثبت, زى كارنيه الكلية) و 100 جنيه للخريج