السلام عليكم اهل الخبره ايه افضل زيت موجود دلوقتي في السوق و فيه زيت التوكيل الاصلي ..عاوز اعرف رايكم و لو حد جرب زيت التوكيل الاصلي يا ريت يقول رايه ايه و جزاكم الله خيرا
عرض للطباعة
السلام عليكم اهل الخبره ايه افضل زيت موجود دلوقتي في السوق و فيه زيت التوكيل الاصلي ..عاوز اعرف رايكم و لو حد جرب زيت التوكيل الاصلي يا ريت يقول رايه ايه و جزاكم الله خيرا
أفضل زيت هو اللي مواصفاته مكتوبة في كتالوج عربيتك .. أو أحسن منه...
ارجع لكتالوج العربية واختار أي زيت من أي ماركة... بشرط واحد... إنه يكون زي الكتالوج على الأقل...
مواصفات الزيت مش لزوجة... مواصفات الزيت اسمها مستوى الجودة أو الأداء.. وليها أكواد محددة لازم تكون موجودة في الزيت اللي بتشتريه..
يا ريت تصور لنا صفحة الزيت في الكتالوج اللي جاي مع العربية...
وياريت كمان تقول لنا طريقة استخدامك للعربية علشان نساعدك أكتر...
ولو عايز تعرف تختار صح من غير ما حد يشتغلك... ادخل على الموضوع ده...
https://www.nilemotors.net/Nile/341680-a.html
...
كاسترول ايدج لو الماتور مامشيش اكتر من 140 الف كيلو ودة درجة اللزوجة 5w-40 وبيتباع فى بنزية طاقة ودة بيكون جاى من الامارات بالكامل يعنى مش متصنع هنا وسعرة تقريبا 520 جنية
امسويل 5w-40 ودة اغلى زيت ماتور هتحطة وصناعة امريكى وسعرة كل فترة فية تغير ادخل على صفحتهم على الفيس بوك هتلاقى صفحة ammsoile
دول افضل اتنين تحطهم فى الحالة دية
لو الماتور ماشى اكتر من 150 الف هتحط زيت كاسترول ماجنيتك ودة بلزوجة 10w-40 وسعرة 365 جنية وبيقعد 10 الاف كيلو زيت ممتاز
امسويل xl 10w-40 ودة ب 500 جنية وبيقعد 10 الاف كيلو وممتاز بردة
لو عايز تحط زيت هوندا مافيش مشكلة بس انصح بية لماتور معداش 120 الف كيلو
عموما... أنا دورت شوية عالنت ولقيت كتالوجين للسيفيك 2009
واحد أمريكي.. والتاني انجليزي (أوروبي)
الأمريكي مشكلته إن توصيات الزيت مراعيين فيها قوانين بتحافظ على البيئة مش موجودة إلا في أمريكا...
علشان كده مش هتلاقي عندهم لزوجات تقيلة...
أثقل حاجة عندهم 10W-30
دي توصيات الزيت من كتالوج أمريكا..
https://nileup.com/up/uploads/nilemo...5226041953.png
https://nileup.com/up/uploads/nilemo...5226041954.png
من الكتالوج ده .. توصيات الزيت كما يلي:
مستوى الجودة (الأداء):
مش محدد حاجة غير إن الزيت يكون عليه الـDonut بتاعت الـAPI... وموضوع الدونت دي له وضع خاص في أمريكا الشمالية مش موجود في حتة تانية...
اللزوجة:
لكل الموديلات ما عدا الـSI.. لزوجة 5W-20
موديل الـSI ... لزوجة 5W-30 أو 10W-30
كده ما استفدناش حاجة تقريبا... وكل اللي عرفناه إننا نقدر نستخدم لزوجة 5W-30 لإنها الوحيدة الموجودة في مصر من اللزوجات دي.
إنما بقى الكتالوج الانجليزي... بيديك لزوجات أكتر بكتير ومواصفات أوضح تمشي عليها...
https://nileup.com/up/uploads/nilemo...5226041952.png
https://nileup.com/up/uploads/nilemo...5226041951.png
الكتالوج هنا بيقول إن مواصفات الزيت كالتالي:
مستوى الجودة (الأداء):
لو انت جوه أوروبا: ACEA A1 أو A3 أو A3
لو انت بره أوروبا: API SL
اللزوجة
0W-30 أو 0W-40
5W-30 أو 5W-40
10W-30 أو 10W-40
ومزود 0W-20 لو انت جوه أوروبا
الشروط دي تنطبق على زيوت كتير جدا...
فيهم الرخيص وفيهم الغالي... وفيهم المحلي وفيهم المستورد...
وكلهم تمام بالنسبة للموتور... لإنهم بيحققوا المطلوب في الكتالوج.
المهم... انت أولوياتك إيه وميزانيتك كام...
والأهم... ازاي بتستخدم عربيتك.. وهل بتحب تقرص عالموتور ولا لأ.
الحاجات دي هي اللي بتفرق فعلا... مش الكيلومترات خالص.
...
للأسف الفكرة دي غير صحيحة وتعتبر من أكتر الأفكار الخطأ الشائعة بين الناس عن زيوت السيارات...
أرجو إنك تقرا الموضوع ده...
أسطورة الـ100 ألف كيلومتر... هل لها أصل؟؟؟
...
لأ طبعا , يعنى انت عايز تجيب ماتور ماشى 250 الف وتحطلة زيت 5w-40 ؟؟؟
لان الزيوت اللى بلزوجة 5w-40 / 0w-40 / 10w-40 لو الماتور كبسة مش تمام , هيبقى نسبة البخر فيها عالى وبالتالى الزيت مش هيكمل معاك
لكن غير كدة هيشتغل عادى وهو دة الهدف الاساسى من فكرة استخدام زيت بلزوجة اتقل بعد كيلوهات اكتر من 140 الف
متهيألي قبل ما نرفض ونقول لأ.. نحاول نفهم الأول...
لو الموتور بتحطله زيوت تخليقية (خفيفة) من الأول هيكون معدل التآكل بتاعه قليل جدا بالمقارنة مع اللي بيستخدم زيوت معدنية...
ده معناه إن الموتور اللي ماشي 250 ألف وبيستخدم الزيوت التخليقية هيكون بنفس حالة الموتور اللي ماشي 50 ألف بزيوت معدنية...
إيه السبب؟؟؟؟؟
الميزة الأساسي في الزيوت التخليقية هي سرعة التزييت في أول دقيقة من تشغيل المحرك خصوصا بعد وقفة طويلة.. اللي عادة بيكون الموتور فيها بدون تزييت لإن الزيت بيكون راقد في الكارتيرة
دي هي الفترة اللي بيحصل فيها أعلى تآكل للشمايز والموتور بشكل عام...
الحاجة التانية..
أثناء تشغيل الموتور.. لو استخدمت زيت 5W-40 فتأثيره حيكون بالضبط زي زيت 20W-40... لإن لزوجتهم واحدة على الساخن.. وبالتالي بيدوك نفس الحماية على الساخن... ونفس حبك الكبس.. لو هو ده اللي يهمك.
الحاجة التالتة...
لو كنت بتستخدم زيت معدني من البداية.. فحتى لو الموتور كان بحالته بدون تآكل فبمجرد استخدام زيوت تخليقية هتلاقي نسبة استهلاك الزيت عالية... وده شيء طبيعي...
واللي بيحصل فعلا إن الموتور هيرجع يحبك تاني ويقلل استهلاك الزيت مع الوقت... وده له تفسير ناس كتير مش واخدة بالها منه... ممكن أشرحه في بوست مستقل..
موضوع الزيت التقيل للعربيات القديمة والخفيف للجديدة ده طلع من حوالي 40 سنة بس.. والناس فاهمة المسألة بطريقة غير أسبابها الحقيقية تماما... والموضوع أسبابه اقتصادية أساسا.. مش فنية إطلاقا.
رابع حاجة...
الخلوصات اللي وسعت مع الاستخدام... في الأغلب لا يتعدى مقدار التآكل فيها حوالي 0.1 مليمتر .. لو التآكل أكتر من كده يبقى الأجزاء دي لازم تتغير ..
تفتكر دي مسافة تخلي الزيت يستهلك كده؟؟
آخر حاجة...
مفيش حاجة اسمها "بخر" في الزيوت...
الزيوت من السوائل اللي تكاد نسبة البخر فيها تكون معدومة....
نقص الزيت في الموتور سببه "استهلاك الزيت".. مش بخره... وبفرض إنه بيتبخر.. هيخرج منين؟؟
الموضوع ده بيشرح الحكاية دي بشكل أفضل..
تبخر الزيت... هل هو حقيقة أم خرافة؟؟
ومعلش سامحني... يا ريت تعدي على الموضوع ده لإنه بيشرح أغلب المعلومات اللي تهم مستخدمي السيارات عن زيت المحرك... ويمكن تلاقي فيه معلومات غايبة عن حضرتك.
القواعد الذهبية لاختيار زيت العربية.... موسوعة مبسطة لأساسيات زيوت المحركات
...
زيت هوندا أو كاسترول إيدج 5w-30
زيت هوندا لسه مغيرين مواصفاته ل SN
وكاسترول إيدج SN من قبل هوندا بكتير
العربية من 2012 وعاملة 140 ألف وبدون أي مشاكل مع اللزوجة دي