جدوى سائل منع تسريب زيت الموتور Engine stop leak

**Silent Storm** · 05-05-2018 08:20 PM

السلام عليكم ورحمة الله

سؤالي باختصار شديد..
هل الإضافة دي بتعالج تسريب زيت الموتور فعلاً ؟
وهل ليها أضرار لاحقاً ؟

المشكلة..
عربيتي رينو كليو موديل 2005 1400 سي سي 16 صباب مانوال عامله 115 ألف كيلو

كان فيه تسريب زيت خفيف جداً جاي من ناحية الكاتينه بقاله 3 شهور,
غيرت طقم الكاتينه كامل وغيرت أويل سيلات الكامة 5 مرات (في خلال شهر)بحجه ان التسريب جاي منهم!
كل مره عن التانيه كميه التسريب كانت بتختلف .. مره تزيد ومره تقل.
لدرجة كنت بمشي مشوار 100 كيلومتر ألاقي نفسي مضطر أزود كيلو ونص زيت (عربيتي بتاخد 5 كيلو)

وهنا بقى كتر الفتي
واحد يقولي الكامات عندك مبوشه ومحتاج تغير وش سلندر
وواحد تاني يقول التسريب جاي من جوطان الشكمان
وتالت يقولي لا ده جاي من جاويط تقسيمه الكاتينه
وكل مره شغل وضياع وقت وفلوس
إلى الآن معرفش سبب التسريب الحقيقي
لكن أخر مره كنت بغير الاويلسيل اكتشفت ان الصنايعيه جرحوا الكامات من المكان اللي بيبات فيه الاويل سيل والميكانيكي قالي مهما تحط اويلسيلات هتجيب زيت
عملها بصنفره ومن بعدها ترسيب الزيت قل بشكل ملحوظ بس لايزال موجود

فأنا صراحه جبت آخر وعايز أجرب الاضافة دي قبل ما اخش في حوارات تغيير كامات او وش سلندر او حتى شورت بلوك !
فايه رأيكم ؟؟

الزيت المستخدم حالياً كاسترول ماجنتك 10w40
ماشي عليه بقالي 5 او 6 سنين ومكنش فيه تسريب قبل كده
مفيش دخنه والموتور حالته كويسه بفضل الله

**borio1704** · 06-05-2018 12:43 AM

سائل منع التسريب اللي حضرتك ذكرته عبارة عن إضافة مخصصة للاستخدام مع العربيات القديمة اللي الأويسيلات بتاعتها نشفت وما بقتش بتحكم زي ما كانت جديدة..

https://www.wolflubes.com/EN_EU/prod...aspx?cat=17563

نفس الإضافة دي بتبقى موجودة في زيوت منتشرة في أمريكا من كذا ماركة .. عادة بيسموها "Long Milage".. هدف الإضافة دي هو إنها ترجع الأويلسيلات تبقى طرية تاني وترجع لوضعها الأصلي وتحكم وتمنع التسريب..

في حالة حضرتك... الإضافة دي مش هتعمل أي حاجة لإن حضرتك مركب أويلسيلات جديدة فعلا.

المشكلة فعلا زي ما الميكانيكي قاللك... مهما تغير أويلسيلات.. هتجيب زيت.

للأسف.. الشغل دلوقتي هيبقى على عمود الكامة... إما يتصلح أو يتغير.. والتغيير أضمن.

عموما.. جرب الإضافة.. ما أتوقعش تأثر على حاجة.. وأهو تبقى اتأكدت بنفسك.

...

**borio1704** · 07-05-2018 10:12 PM

المشاركة الأصلية كتبت بواسطة Silent Storm

متكشر جداً لردك الوافي يا باشمهندس
النقطه اني غير متأكد من ان التسريب جاي من الاويلسيلات
وغير متأكد من ان عمودي الكامه فيهما مشكلة
لان كل ميكانيكي برأي

علشان كده عايز اجرب الحلول البسيطه الأول قبل ما ادخل في حوارات كبيره وهي
اني اجرب درجه لزوجه أكبر 20w50
واجرب سائل منع التسريب ده

خصوصاً ان تغيير الكامات او وش السلندر غير مضمون في عربيتي نظراً لان قطع الغيار قليله والموتور معقد ومفيش حد غير إلا وكل شهر داخل في جوان وش سلندر
ولعدم وجود ميكانيكيه عندهم ضمير يشتغلوا فيها
فالحل أمامي هيكون تغيير شورت بلوك وهو أريح وأوفر

أتفق معاك في تجرب الحلول البسيطة أولا..

ولو إني شايف إن المشكلة سببها واضح.. بدليل إن الصنفرة جابت نتيجة وقللت من التسريب.. تبقى المشكلة في العمود.

ربنا يوفقك.

...