الموضوع: رأيكم ايه في العربية دي

اشبه بال 125 بس اعتقد انها بولندى او فى تقفيل مصرى..بأمانه وحش ماشى على الطريق..قريبة من ال 132 فى تقلها و صلابة الصاج..عيوبها كتير طبعا منها البنزين الكتير.. لكن بالنسبة للسعر اعتقد معقول؟؟ممكن على 15 كمان يبقى تمام..متهيألى انها افضل من ال 128 لو عاوز حاجه صاجها جامد

شوف يا باشا..
العربة ي نفس ال125 تقريبا بالظبط..
لأنها بولندي فعلا.ز و في منها تصديقا علي كلام اخونا الفاضل تقفيل مصري..
صاج تقيل جدااااااااااااااااااااااا ااااا.. و صلابة مش طبيعيه..
فيها كام عيب..
الاول.. انها دركسيونها تقيل جدا.. بس مع الوقت هتتعود عليه.. و ممكن تملا الكاوتش اللي قدام زيادة شوية هتخف معاك شوية..
و العيب التاني انها مش بتاعت قرص علي الموتور.. عشان العربية تقيلة جدا علي الموتور الاصلي ال1500 بتاعها.. ولو انه برضه موتور عفي.. مش ضعيف.ز بس العربية تقيلة عليه..
و كمان استهلاك البنزين كتير شوية.. يعني ممكن تعمل معاك بتاع 180-150 جوة البلد ف الصفيحة.. و ده كتير.. بس ف المقابل قطع غيار ببلاش.. و ممكن طبعا لو في امكانية تحط بنزين 80.. هيوفر معاك جدا..
العربية احسن من ال128 و ال127 و الكلام الضغيف ده..

المشاركة الأصلية كتبت بواسطة mido01050

متشكر جدا لكل الناس اللي ردت بالسرعة و أرجو ان حد يعرفني عيوب العربية تفصيليا دي خاصة ان دي هاتكون أول عربية أمتلكها . و حاجة أخيرة أنا كل ماقول لحد أنا هاجيب بولونيز يقولي اوعى دي عربية زبالة أقوله عرفت منين يقولي أسمع كده من غير ميكون مجرب . لدرجة ان أنا بقيت مش عارف أعمل ايه . ال 128 أنا ركبتها مع صحابى عربية سيئة للغاية من حيث الركوبة في الكابينة و ياسلام لو خرجت بها على السريع تحس انك راكب معزة بتسابق بيها أحصنة حواليك . على الرغم من كده يقلولي اشتري 128 طاب ازاي حد يفهمني الناس دي بتفكر ازاي . أنا عارف تابلوه البلونيز أنضف بمراحل و أحسن من ال128 و الكابينة فيها قاعدة محترمة أوسع من الشاهين و أريح . و الناس برده تقولك زبالة أرجو حد يفهمني بالتفصيل فعلا ليه ال128 عليها الأقبال الغريب ده

احب اوضح بس حاجات بسيطة كده.. بحكم اني كان معايا 125.. اللي هي اختها ومن انتاج نفس المصنع في بولندا.. و اللي بيتقاسموا نفس الموتور و الفتيس.. و احتمال الفتيس كمان.. بس مش متأكد..

المهم قطع غيارها برضه رخيصة جدااااااااااااا..
وشوش الفوانيس و الكلام ده كلام فارغ.. ببلاش يعني.. تقريبا زي ال128 و ال127..

صالون العربية مريح وواسع.. و التابلوه كويس.ز مش شيك قوي.. بس ظريف, و فيها ار بي ام كمان..ودي حاجة قليلة قوي ف الموديلات القديمة دي..

شوف العيوب بقي..
وهاقولك علي الحاجات اللي مشتركة بينها و بين ال125..
اهم كام حاجة كده..
الردياتير يكون كويس.. ولو فيه اي حاجة يتغير.. عشان السخونة.. بس لو مظبوط و سليم.. انسي السخونة دي تماما..
الكاربيراتير.. لازم برضه يكون مظبوط علي الشعرة..عشان لو مش مظبط.. هتاكل معاك بنزين كتير.. يمكن ده اللي لو حبيت تغيره غالي شوية.. ممكن يوصل 450-500 جنيه.. الاصلي البولندي.. بس نادرا ما حد بيغيره يعني..
اهم حاجة ف الدنيا ف العربية دي.. زيت الكرونة تكون متابعه علي طول..
يعني مع كل غيارة زيت.. تشيك علي زيت الكرونة.. و تزوده لو ناقص.. عشان دي اكتر حاجة حساسة ف العربية.. ولو انها مش حساسة قوي زي كرونة ال125.. بس برضه امن نفسك..
غير كده.. ماقدرش اقولك حاجة.ز العفشة ما شاء الله قطر.. عربية نص نقل..
اطلع رصيف.ز نط من علي رصيف.. براحتك خالص..
مطبات حفر الكلام ده كله لعب عيال..
ثبات علي الطريق.. مش عالي قوي.. بس مش هتحتاج بيتهيألي اكتر من 100 كويس قوي..
فرامل..مش من النوع القوي جدا ف العربيات القديمة.. بس كويسة.. افضل من ال127 و ال128 طبعا.. بس كده..
لو نويت عليها توكل علي الله و متسمعش كلام حد..
عشان بسبب الكلام ده ضيعنا واحدة كانت بتاعت واحد صاحب والدي كانت موديل 90 و الكلام ده كان سنة 97.. و كانت ماشية بتاع 15 الف كم حاجة زي كده و فبريكة تماما..عشان كلام الناس.ز و بعدها ب 4 سنين.. اشترينا ال125.. اللي هي اختها الكبيرة.. و كانت ماشية 120 الف كم.. و موديل 83..
وفرق السعر كان كلام فارغ.. 4-5 الاف جنيه..

الموديلات 89 و90 الفرق بينها وبين اللي قبلها وجود زجاج (شماسة) في الجانبين الخلفيين خلف الأبواب بدلاً من الباغة السوداء .. وده بيخللي العربية أشيك وشكلها أوسع.
وكمان أظن إن موديلات 89 و90 كانت من إنتاج نصر، يعني هاتلاقيها غالباً نصر-بولونيز

عربية زي الحديد وشيك وتوكل على الله (السعر اللي صاحبك بيقول عليه حلو جداً لو العربية سليمة) بس اعمل حسابك إن بيعها تقيل حبتين مش زي ال 128 وهو ده اللي بيخللي الناس تروح لل 128

متهيألى كمان ان شكل الفوانيس الخلفية فى التجميع المصرى مختلف