اثناء محاولاتى اجراء بعض الحسابات فىمجال اقطار الإطارات لاحظت ملاحظة غريبة جدا عايزكم تركزوا معايا فيها

احنا شرحنا قبل كدة الطريقة اللى بنقيس بها القطر الخارجى للإطار اللى هى:

ق = 2 * ع * ن \100 + ج *25.4

حيث ق هى القطر الخارجى: ع هى عرض الفردة ن هى نسبة الفردة و ج هى قطر الجنط

يعنى لما نقول ان مقاس الفردة هو 185/80/13 تبقى ع = 185 و ن = 80 و ج =13

المهم باستخدام هذة الحسبة وجدت ان لو عندنا فردة مقاس 185/80/13 هيكون قطرها الخارجى 626 مللى متر وطبعا قطرها الداخلى هو 13 بوصة أو 330 مللى متر، اى ان ارتفاع الفردة هو 626-330 مقسومة على 2=148 مللى متر


لو كررنا نفس الحسبة على فردة مقاس 175/70/14 نجد ان قطرها الخارجى 614 مللى متر (اصغر من الفردة السابقة) وبما ان قطرها الداخلى 14 بوصة او 355 مللى متر فإن ارتفاع الإطار يكون 614-355مقسومة على 2=129 مللى متر يعنى برضه اقل من لحمية الفردة ال13 سالفة الذكر، فيما معناه ان هذة الفردة الأقل فى القطر الخارجى والأقل فى اللحمية لأنها اوسع فى القطر الداخلى تحتوى كمية مادة خام اقل من الفردة السابقة(لاحظ انهما بنفس العرض)

طيب هنكرر نفس الحسبة بحذافيرها على فردة 185/60/15 سنجد ان قطرها الخارجى 605 (اقل من الإتنين اللى فاتوا) وقطرها الداخلى 381 مللى متر فيما معناه ان لحميتها =111 مللى متر (برضه اقل من الأتنين اللى فاتوا) يعنى فيها كمية مادة خام اقل من الفردة ال13 واقل من الفردة ال14

طيب بعد القصة الطويلة العريضة دى ممكن حد يتطوع ويفمنى ليه الفردة ال13 اللى فيها كمية مادة خام اكثر من الفردتين التاليتين بتتباع ارخص بكتير من الفردة ال14 اللى بدورها بتتباع ارخص برضه بحبة كويسين من الفردة ال15 اللى هى فيها مادة خام اقل منهم كلهم؟

مع العلم ان كل المقاسات اللى انا بتكلم عيها دى مقاسات عادية مستعملة للسيارات العادية وليست رياضية او نوعيات خاصة

مش لاقيلها تفسير سوى اننا بينضحك علينا بسبب جهلنا


حد عنده تفسير تانى؟