إلى هواة صيد الاسماك!

**goodwave** · 07-08-2007 10:18 AM

الاخوة الاعضاء

بما إنني إسكندراني والبحر هو عشقي الأول وصديقي العزيز فاني امامة انسى كل شئ ولا أمل ابدا من ملازمتة فإنني اعشق كل الأنشطة المتعلقة بالبحر وخاصة صيد الاسماك. ولقد كلفتني هذة الهواية الاف الجنيهات بس على قلبي زي العسل. مرة شراء بوصة جديدة ومرة مكنة ومرة عدة وهكذا . المهم كل دة بيتنسى اول ما تقعد قدام البحر ويا سلام لما ربنا يرزقك بسمك وياسلام ياسلام لما تاخد السمك دة البيت وتقعد تشوية وتاكلة طازة! اه يا عيني يا سيدي!

طبعا في ناس حيقولو يا عم بلا صيد بلا صبر بلا وجع دماغ بس اللي بيصطاد حيفهم انا قصدي اية اصل يا جماعة دة هوس!

فكدة بسم الله اللي عندة تجربة حلوة في الصيد او صورة حلوة لسمكة كبيرة اصطدها او اللي عندة مكان حلو للصيد يقول علية ! وكمان اليي مش بيصطاد يقول راية اية في الصيد واهو يشاركنا!

يا جماعة دة موضوع خطير واحنا على سبيل المثال في اسكندرية بننتج كل يوم صياد

:lol: :lol:

يالا بسم الله ومستني مشاركتكم

**Ahmed Hassan** · 07-08-2007 11:00 AM

الشيء الاكيد ان الصيد ده هوايه ممتازه لأنها على الأقل بتهدي الأعصاب.. و دي اكتر حاجه احنا محتاجينها اليومين دول. بس مين بقه فاضي يروح يصطاد؟ بصفتي من بورسعيد انا بشوف الناس اللي بيروحو يصطادو.. و خصوصا لما بشوفهم في الشتاء في عز البرد بليل بعرف اد ايه هيه حاجه مهمه بالنسبه ليهم و انها غيه و موضوع كبير... بس بصراحه انا شخصيا محصليش الشرف... بس بعرف اكل السمك كويس اوي لو حد محتاج مساعده :mrgreen:

**goodwave** · 07-08-2007 11:33 AM

طب اتفضل عندنا في اسكندرية علشان في موضوع اكلة سمك عاوز رايك فية! :lol:

**Ahmed Hassan** · 07-08-2007 11:44 AM

:mrgreen:

**emadfk** · 07-08-2007 11:47 AM

وانا من افضل هواياتى صيد السمك و خصوصا فى الاسكندرية معشوقتى والى لمل باروح علشان اصطاد فيها على بير مسعود بنسى الدنبا و مافيها و خصوصا لما تصطاد سمكة حلوة كدة وتبذل مجهود كبير فيها حتى تصل اليها ياسسسسسسلااااااااااام شعور لايوصف

وياريت الى يعرف اماكن فى الصيد فى الاسكندرية او فى القاهرة ينفع فيها الصيد بالمكنة يقول عليها

وشكرا على الموضوع الجميل ده

**goodwave** · 07-08-2007 01:17 PM

شوف بقى! صيد المكنة دة لعبتي!

1- انت ممكن تاخد مركب من ميامي او من بحري الصبح ودة بيخدك في عرض البحر لمدة ساعتين وبعدين بيوقف في اماكن هو عارفها ان فيها تجمعات سمكية. وانت ورزقك. بس ان شاء اللة حتاخد سمك يعني حتاخد.

2- ميناء الاسكندرية ودة بيتعمله تصريح دخول وتصريح صيد بتكلفة بسيطة جدا. بس انصحك تروح مع حد عارف المكان علشان يدلك على اماكن تجمع السمك وبردة انت ورزقك!

3- تيجي بقى للغرب ودة مكاني المفضل وهو الساحل الشمالي من اول كرير لحد سيدي عبد الرحمن. تقف على البحر بمكنتك وتحدف وماتقلش لعدوك لو ضربت معاك سمكة كبيرة. هدوء اية وطبيعة اية بس في الصيف مش كل الاماكن متاحة علشان بلبطة المصيفين ودة بيطفش السمك بس بردة في اماكن كويسة!

4- قرية مارينا الساحل الشمالي وما ادراك ما مارينا في الصيد بس بردة عاوزة حد فاهم الاماكن الحلوة وانواع الطعم!

كفاية كدة بقى علشان قربت اعيط بجد اصلي نفسي اروح اصطاد ومش فاضي اليومين دول

**AlmAhAtmA** · 07-08-2007 01:43 PM

مع اني اسكندراني لكن ما ليش في الصيد خالص
انا ليه في الغطس
خالد اخويا وصل لمرحله الهوس في الصيد
يعني بيسافر هوه و صحابه يصطادوا
و لو تشوفه و هوه بيوضب السمك اللي بيجيبوا بيكون في حاله هيام مع العده
و يا سلام و هوه و الحاجه منكبين علي الغنيمه و بيفصصوا مع ان ساعات بيكون فيه سمك لا يري بالعين المجرده بس بيكون فرحان قوي
واضح انها هوايه بترتبط بالشخص و بترتبط بتفكيره و مشاعره

يعني حنشوف من حبايبنا هواه الصيد في المنتدي رحله صيد بالعربيات ولا كلام و بس
عايزين نعمل انشطه نستخدم فيها العربيات
رحلات خروجات مقابلات اي حاجه فيها ات في الاخر

**aboalm** · 07-08-2007 01:50 PM

فكره حلوه ممكن نضيف ليها التجارب الشخصية من حيث الوقت فى السنه اللى بيكون فيه السمك كتير لانهة مواسم و دى عن تجربة فى النيل و كمان انواع الطعم ( دود , سبيط , جمبرى , ريم ) حتى تعم الفائده
بالنسبه ليا بأصطاد فى النيل ووجدت ان افضل الشهور هيا فى الصيف و خصوصا لما يكون يوم الجو فيه حر زى اليومين الحلوين قوى دول بيكون السمك باليلل تقريبا بيطلع يتمشى على الشط

**Karim_Monir** · 07-08-2007 02:03 PM

بضم صوتي لحبايبي احمد حسن(اللي زعلان اني ما شوفتوش المرة دي) وهاني
اكل سي فوود انا معاكم
اسوق لكم ان شالله لحلايب
لكن اقعد امسك صنارة وكدة
اموت من الجوع ولا اعملهاش
ماليش في الصبر ده خالص
ابن خالتي مهندس كمبيوتر وعنده محل بيع ادوات وعدد صيد وبينظم رحلات لحلايب وحاجات كدة
حفي وراي ياخدني معاه مرة وانا ابدا
اكل بس :mrgreen: :mrgreen:

-

الموضوع: إلى هواة صيد الاسماك!

LinkBack

أدوات الموضوع

عرض

إلى هواة صيد الاسماك! - انشر الموضوع فى :

-

-

-

-

-

-

-

المواضيع المتشابهه

السياحة او الصياعة في مصر .... جنينة الاسماك بالزمالك !!!

سؤال للسادة هواة صيد الاسماك

صيد الاسماك بطريقة مبتكرة

الكلمات الدلالية لهذا الموضوع

المفضلات

المفضلات

ضوابط المشاركة