الموضوع: بتشبع الغيار للاخر ؟ ولا بتنقل بدرى ؟ ايه الاحسن للموتور؟

مفيش اي مشكلة انك تمشي علي التالت و الار بي ام علي 2 عادي جدا بالعكس ده صحي للموتور اكتر و عموما باين من ردك انك عاوز تجري و تفرق و تحرق بالعربية و لا ايه؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟

زي ما فهد قال
الافضل 3 - 3.5 Rpm
لو عايز توفر في البنزين و تريح الموتور خالص يبقى 2.5 و مش اقل عشان متخنقش الموتور و لو نقلت على 2.5 متدسش غير لما العربية تاخد سرعتها المناسبة بالنسبة للغيار

احسن حاجه الفتيس الاوتوماتيك بلا قلبة دماغ

معلش يا باشا مش هعرف افيدك لأني مابعرفش أسوق ( مانيوال )

لا دي Out منك اسمها (اريح حاجة الفتيس الاوتو) انما الاحسن في رأيي المانيوال لانك لو عايز تريح الموتور خالص بايدك , عايز تمشي عادي زي الاوتوماتيك بايدك , عايز تشد و تحرق و تجيب اخر الموتور بردة بايدك

يمكن الاوتوماتيك مريح خاصة في الزحمة لكن المانيوال افضل اكيد

معظم المحركات باختلاف سعتها يعنى من 800 مثلا لحد 1600 افضل نقل علشان تحصل على استهلاك بنزين كويس جدا هو عند السرعات المتعارف عليها
الاول 20 و اقل ممكن من 10 او بعد بدايه التحرك يكون ال rpm 2000 يبقى 100 100
التانى 40 لو محرك صغير زى الماروتى ممكن 30 -35
التالت 55-60
الرابع حتى 75 -80
السرعات دى بتخليك تمشى على الترس (النقله) لحد لما توصل عليها 3000 rpm و يمكن اقل او ازيد حسب كل محرك
و لما تنقل لنقله اعلى تلاقى ال rpm فى حدود 2000 لفه.
مثلا فى الماتريكس الموصى بيه هو بعد بداية التحرك على الاول تجيب على التانى 40.... ثم 55.........75.......
بس على النقلات دى هتحس ان التسارع ضعيف و يضعف اكتر لما الموتور يكون حجمه اصغر يعنى مثلا كان معايا زمان daihatsu mira موتورها 850 سى سى لو نقلت على الرابع على 60 تلاقى مفيش استجابه و لا تسارع خالص لكن على الاقل انقل عند 80+ علشان احس بالسحب.
و رغم ان النقل على السرعات اللى ذكرتها بيعطى اعلى عزم (دائما عند 3000-3200 لفه) و احيانا 4000+ على حسب المحرك الا ان القدره (عدد الاحصنه) المتولده بتكون قليله.... و الpower بيزيد بزيادة السرعة لكن استهلاك البنزين بيزيد جدا فى المقابل (صدقونى ممكن يوصل ضعف الاستهلاك و ده انا شوفتوا فى رسومات بيانيه بتوضح استهلاك البنزين مع السرعة) و ده بسبب زيادة السرعه مما يعنى زيادة الاحتكاك بين الاجزاء الميكانيكيه (و دى كده مفاقيد انت مش بتستفيد منها) و ايضا rolling resistance و معنى ان السرعه زادت ان سرعة دخول الهواء عبر الصمامات زاد لكن الزمن المتاح للدخول قل (لان الصمام هيقفل بسرعة) و زيادة سرعة الشحنه الداخله يؤدى الى زيادة الفقد فى الضغط يعنى ضغط الشحنه هيقل و بالتالى الكفاءة الحجميه......
لكن زيادة السرعة بتزود القدره المتولده من المحرك لان القدره بتتناسب مع كمية الهواء الداخل للمحرك... اذن لما تدخل هواء كتيير مع زيادة السرعه مثلا 4000 و 5000 و 6000 لفه هنا استهلاك البنزين بيزيد ليه؟؟؟؟؟؟؟؟؟؟؟؟؟؟؟؟؟؟؟
علشان زى ما قولت دخل هواء كتير و علشان يتحرق لازم له وقود كتيير (احتراق غنى) rich.
لكن فى النقلات العاديه اقل استهلاك بنزين و لو نقلت بدرى اوى مش كويس هتسمع صوت خربطه كتيير اللى هو الصفع و زيادة الحمل جدا على المحرك.
ايضا معلومه هامه للحفاظ على استهلاك بنزين كويس هو انك متسبش العربيه دايره على الفاضى و المليان الافضل تبطلها لأن علشان الاحتراق بيكون غنى (وقود محقون كتيير) لذلك استهلاك البنزين عالى.
معلش طولت جدا و حاولت ابسط بس انا دارس الكلام دا بطريقه علميه و مش عارف ابسطه اوى للناس. ارجو تكونوا استفدتوا
و لو فى حاجه غلط ادينى بتعلم

يا جماعه لازم تعرفو ان لو حد مشي علي التالت مثلا وجايب 30 او20 كم ده غلط من عده نقط اهمها انك بتكبس علي الاكسلتير اكتر من الازم فبتهدر البنزين لانها بتكون علي ترس اكبر من سرعه ال 20 وال 30 لكن لما تحرق علي الغيار لحد 3.5 او اربعه كده احسن لانك قديت كل ترس حقه ولو عايز تعرف الكلام ده صح ولا غلط اركب عربيه اوتوماتيك وكبس علي البنزين سنه بسيطه وهي ماشيه هتلاقيها بتنقل علي 3.5 فبكده بتديك سرعه علي قد الغيار وعلي قد البنزين اللي جي من الرشاش

أنا بنقل علي حوالي ٣.٥ موتور ١٣٠٠