انا هحكي عن تجربتى مع الكرولا 2008 و انا استلمتها في شهر 5/2007 اولا العربيه ممتازه جدا من كل النواحي وتقفيلها مش وحش خالص انا بتكلم عن جنوب افريقيا و ثباتها علي الطريق عالي جدا اعلي من موديل 2007 بكتير انا مشيت بيها على سرعه 180 كم في طريق مصر اسكندريه الصحراوي وبسم الله ماشاء الله كان ثباتها عالي جدا جدا وعزمها و سحبها جامد جدا الفتيس Mmt مش وحش زي ما الناس بتقول كل ما في الموضوع ان لازم تفهمو عشان تعرف تتعامل معاه الفتيس عباره عن فنيس منيوال عادي جدا يعني فيه دبرياج و اسطوانه ودسك بس الاختلاف انه متركبلها مواتير و كمبيوتر هما الي بيقومو بنقل الحركه و الدوس علي الدبرياج بدل من السائق يبقي لازم منعملهاش زي ما بنعامل الفتيس الاوتوماتيك العادي لازم معامله خاصه للفتيس ده عشان تطلع البور بتاع العربيه الكمبيوتر بتاع العربيه هو الي بنقل الحركه بس ده بناء علي اشاره انت بتدهالو عشان يفهم يعمل ايه يعني انت الي بتتحكم في العربيه عن طريق دواسه البنزين انت الي بتحدد امتي العربيه تنقل و امتي تحرق علي الغيار و امتي تسقط نقله اقل كل ده بدواسه البنزين انا هشرح كيفيه التعامل مع الفتيس بدقه. طريقه استخدام الفتيس اولا النتشه الي بتحصل بين النقله و النقله دي نتيجه ان الكمبيوتر بيفصل الحركه(يدوس دبرياج) و ينقل ويرجع يسيب الدبرياج وممكن نقلل الاحساس بها عن طريق حساسيه الرجل علي دواسه البنزين عندما ندوس علي دواسه البنزين بخفه(رجلك خفيفه) الي بيحصل ساعتها ان العربيه بتنقل للنقله التاني و الثالثه و تجيب الرابع و لسه العربيه سرعتها مجبتش 50 كم فبنحس ان عزم العربيه عزمها ضعيف جدا و ضايع لان بتكون واخده الرابع و سرعتها لسه 50 كم و العربيه بتعمل كده لان الكمبيوتر بيفهم انك عاوز تمشي براحه و بكده بيوفر في استهلاك البنزين يبقي لازم رجلك تكون ثقيله شويه علي البدال لو مش عاوز ده يحصل معاك نيجي بقي لنقطه النقل لما بندوس علي البدال العربيه بتاخد سرعه الاول و الار بي ام بيعلى طول ما انت كابس علي الدوازه العربيه مش هتنقل و هتفضل تحرق علي الغيار لان الكمبيوتر بكبسك علي الدواسه بيفهم انك عاوز تحرق علي الغيار لازم ترفع رجلك سنه بسيطه جدا عن الدواسه عشان العربيه تنقل للغيار الي بعده(اكنك بترفع رجلك من علي البنزين و الكمبيوتر بيدوس دبرياج و ينقل بدل منك و ترجع تدوس بنزين تاني)اول ما هتخف رجلك من علي دواسه البنزين هتنقل العربيه للغيار التاني نرجع ندوس علي دواسه البنزين تاني لحد ما الار بي ام يعلى و نخف رجلينا عشان النقله الي بعدها و هاكذا لو حبينا نحرق علي غيار بتفضل كابس رجلك علي الدواسه مترفعش رجلك السنه الي قولنا عليها طيب نفرض اني ماشي علي الرابع و عاوز انزل نقله عشان ادي عزم للعربيه بضغط دواسه البنزين جامد الكمبيوتر بيفهم اني عاوز اجري فجئه بيسقط نقله اقل و بتلاقي العربيه جريت بس لما بيسقط نقله بيحرق عليها يعني مثلا انا علي الرابع و دوست بنزين جامد بينزل علي الثالث و بيحرق عليها شويه مبينقلش للرابع تاني بسرعه و ممكن كمان عن طريق البدالات الي في الدركسيون (+ , -) تستخدمها كمساعد بدل دواست البنزين و انت علي النظام الاتوماتيك يعني مثلا عاوز تنزل نقله تدوس - صوت الماتور علي و منقلتش دوس + عادي لما بندوس في اي وقت على +او- و احنا علي النظام الاوتوماتيك بيقلب مانيوال و بيرجع بعد كده اوتوماتيك لوحده تاني طبعا في اي وقت لو حبيت تعرف انت علي انه نقله حرك عصا الفتيس علي M هيظهرلك رقم الغيار في التابلو و رجعه تاني على E دا شئ عادي و مفهوش مشكله طبعا الموضوع بتحسه انه صعب او معقد لكن مع الممارسه هتلاقي بعد كده بتعمل كل ده تلقائي و هتلاقي نفسك حاسس بالعربيه و تصرفاتك بتطلع تلقائى للتحكم في العربيه بكده و بالطريقه دي انت متحكم في العربيه 100% طبعا في ناس هتقول ليه وجع الدماغ ده لازم نفهم ان الفتيس MMt فتيس مانيوال منعملهوش معامله الاوتوماتيك بكده اكننا بنسوق مانيوال بس في كمبيوتر بيسهل علينا شويه عمليه النقل و الدبرياج اما عن عيوب الفتيس فيه عيب فعلا ظهر و هو الكمبيوتر المسؤل عن النقل سعات بيكون فيه عيب صناعه لما بيسخن بيعلق و تلاقي العربيه مبتنقلش او تكون جايب الفتيس علي E و تلاقي العربيه على N في التابلوه ده بيكون عيب صناعه و التوكيل بيغير الكمبيوتر كله المسؤل عن النقل ببلاش لانه حصل معايا و التوكيل غيرهولي فعلا ببلاش و في معلومه كمان للمعرفه لما بنجيب عصايه الفتيس R سعات الكمبيوتر بيدي بيب(صوت) مره واحده و بعدين ينقل ويجيب النقله R وسعات بيدي 2 بيب و سعات بيدي 3 بيب وده بعتمد علي سرعه نقلك يعني مثلا لو كمنت ماشي للامام ووقفت بسرعه و جيبت العصا على R كله وري بعض يعني ساعتها بيدي 3 بيب و بعدين بيستجيب و ينقل و ده الكمبيوتر بيعمله عشان يدي شويه وقت لفصل الحركه و عكسها اما لو كنت ماشي للامام ووقفت و جيبت العصا علي R بس مش وري بعضه بسرعه يعني سيبت ثانيه او 2 قبل ما تحرك العصايه فبينقل علطول بعد بيب واحده اخيرا انا مش بشكر في الفتيس ده و لا بدافع عنه بس دي خلاصه تجربتي للاستفاده و عشان تعرف تتعامل مع الفتيس وشكرا