الموضوع: ممكن حد يقوللى عيوب الفيات132 وسعرها كام بالتحديد

أولا أهلا بيك عضو جديد معانا
شوف يا سيدي، انت بتتكلم علي عربيات مختلفة و قديمه فالفيصل هنا الحالة و ليس الموديل
و لكن بشكل عام حاقولك فكرة عنهم بس لما تكون حالة العربية كويسة او يعني نعتبر دي العيوب لما كانت العربية جديدة
128:
سيارة الشباب المعقول
الموديلات القديمة افضل من الحديثة جدا بالذات آخر التسعينات حتي الان
قطع الغيار رخيصة و منتشرة
اي بليه يعرف يصلحها
استهلاك بنزين معقول و تسارع معقول و صالون معقول و ثبات معقول و صاج معقول اي انها سيارة المعقول
132:
صخرة
استهلاك بنزين عالي و صاج جامد و قطع غيار غالية بالنسبة للفيات و ثبات جيد و تسارع جيد
بعض قطع الغيار نادرة شويه بس حتلاقيها
معظم الصنايعية يفهموا فيها
خليك بعيد عن الـ 2000 CC والا حيتخرب جيبك
124:
كلها جيد بس شكلها قديم شوية

زي ما قلت الكلام اللي فوق علي عربيات كويسة و ليس علي الاطلاق

بصراحه استاذ اسلام قال كلام عشره علي عشره و ما اقدرش ازود عليه كلمه علشان انا من عشاق ال 132 بصراحه لكن دلوقتي ال 132 اسعار قطع غيارها غاليه شويه مش غاليه اوي بس غليت عن زمان علشان نادره (يعني سنه 1994 جنا جايبين طقم الابواب استعمال بحاله نضيفه ب 1200 و الموتور ب 1000 و الديفرانس ب 400 جنيه تعالي بص علي اسعارهم دلوقتي حتلاقيهم مش اقل من 2500 و 2500 و 2000 علي التوالي!!)
اقرا الموضوع دا فيه كل حاجه عن ال 132
http://www.nilemotors.net/Forum/viewtopic.php?t=222

انا ما انصحش ب 132 لانها خلاص اصبحت عربية قديمة مهما كانت حالتها كما انقطع غيارها غالية و غير متوفرة بمقارنتها بمثيلاتها فى الفيات كما انها تقيلة جدا فى البيع علشان مش مطلوبة كتير على العموم اذا كنت مصر عليها ابحث عن 1600 الارجنتا دى احسن موديل فى 132

على العموم اذا كنت مصر عليها ابحث عن 1600 الارجنتا دى احسن موديل فى 132

ما اعتقدش حال الارجنتا ااحسن من حال ال 132 لاني شوفت كام عربيه منها اللي مركب فوانيس شاهين اماميه و الاشارات و اللي مغير الشبكه ف دا معناه ان الحاجات دي مش موجوده بعكس ال132.
بص من الاخر علشان تركب 132 نضيف مش حتقل عن 28 الف لكن حتركب عربيه تحفه و مش حتصرف عليها مليم و احلي من ركوبه عربيات كتييير جدا.
لو مش علي استعداد انك تضحي بالمبلغ دا فيها يبقي هات ريجاتا اهي برضه عربيه كويسه

اولا احب ان اشكر كل من ساهم فى الرد على موضوعى و طبعا انا يشرفنى ان اكون عضو جديد معكم هنا بس انتو كدا زودتولى عيب جديد وهو قطع الغيار المولعه دى وده بقى التفسير الغامض لكون ال132 ارخص من ال131 يعنى مثلا الموضوع اللى عامله الاستاز(حازم خضر) بيقول فيه ان سعر الشبكه الاماميه (900) الكلام ده لوبجد يبقى محدش حيعرف يركب العربيه الهايله دى وشكرااااااااااااااااااااا اااااا

هو مش انا اللي قولت ياباشا دا الاستاذ عبد الله اللي قال و بعدين فيه منها مصري و رخيص و شكلها معقول برضه مش وحش.
انتا بصراحه مغرم بالعربيه دي اوي ,
و ال 132 من زمان ارخص من ال 131 علشان ال 131 موفره في استهلاك البنزين مش اكتر من كده

انا شايف ان كلام الاخ حازم جميل جدا و انا معاه فى موضوع العربية الريجاتا انا شايف ان الريجاتا احسن كتير من 132 من حيث قطع الغيار و البنزين و سعرها معقول يعنى بحوالى 25000 تركب ريجاتا متظبطة و الكلام ده عن تجربة شخصية انا جربت الريجاتا حوالى 3 سنين و ما شفتش منها اى دقة نقص مع انى كنت باسافر بيها كتير جدا وكمان قطع غيارها متوفرة يمكن اغلى حاجة بسيطة من باقى الفيات لكن معمرة و متوفرة