عندى خبط فى العربية من تحت والنبى قولولى أيه ده (فيات 128)

**angel_man100** · 21-12-2008 03:39 PM

أنا عربيتى 128 المهم لما أكون ماشى على الشوارع المكسرة بحس ان العربية مش ماشية مرتاحة وفى صوت كركبة كأنى ماشى بعربية كارو روحت ربط العفشة وأنا عندى المساعدين زى الفل ورا وقدام مفيهاش أى مشاكل نفسى أعرف الخبط دة من اية قولولى ربنا يخليكوا وشكرا للمنتدى

**SAMER_ENGINES** · 21-12-2008 05:09 PM

عزيزي ممكن يكون الكاوتش عندك مليان زيادة عن اللزوم و في الحالة دي ممكن تسمع صوت الخبط و بيكون من الكاوتش مش من العفشة خالص و اللي بيتسمع بيكون علي الأغلب صوت دبدبة.

**morabet79** · 21-12-2008 09:34 PM

يعني الدبدبه من صوت الكاوتش؟

**dr_abooody** · 21-12-2008 11:19 PM

الصوت دة في الغالب من الكاوتش

انا مرة مليت هوا من بنزينة و قولت للرالجل يظبطهم على 30

بعد ما مشيت بدأت احس جامد بالمطبات و العربية بتحدف شمال بطريقة عجيبة

اعدت يومين لقيت فردة منهم مريحة عشان كان فيها مسمار
روحت لبتاع العجل لحمهم و قوتلة يظبط هوا باقى العربية

تصوروا لقيتهم كام
فردة 45 و فردة تانية 48 وواحدة 40
الحمد لله ان ربنا ستهرها معايا

نصيحة ما تحطش هوا غير من عند بتاع عجل محترم

**mrghost** · 22-12-2008 07:14 AM

فعلا انا مره لقيت الكاوتش عندى على 50 !!!!!!!!!!

**bassem.naguib** · 22-12-2008 01:10 PM

على فكرة زي ما الأخوة الأفاضل بيقولوا كده .. ممكن يكون كاوتش .. ولو كشفت عليه وملقتش كده

يبقى في حاجات لازم تبص عليها .. أولهم كاوتش الميزان بتاع العربية ممكن يكون متاكل أو مهري أو مش محكوم

ممكن برضه يكون عندك مشكلة في ركبة العربية وعاوزه تتلحم .

وبعدين أنت في الأول والأخر مقلتش الصوت والكركبة دي في أنهي حته بالضبط في العربية . ورا ولا قدام

**chihab18** · 23-12-2008 08:58 PM

بخصوص الكاوتش ؛لاحظت ان معظم اللي ينفخوا العجل ؛ المقياس بتاعهم مختلف ؛ فالحل هو شراء مقياس عجل سليم خاص بالواحد ويبعد عن مقياس بتوع الكاوتش لانه مختلف ومتباين بين كل واحد
وياريت حد يقول لنا سعر المقياس في حدود كام تقريبا ؛ وهل في جحهاز لنفخ العجل يدويا ؟

**eslamspirit** · 24-12-2008 09:50 AM

المشاركة الأصلية كتبت بواسطة sab3aawy

فيه 157346 حاجة فى العربية ممكن تعمل الصوت ده

اولها واهمها علبة الديريكسيون ودى بييجى منها 75% من اصوات الكركبة

اما ال 25% الباقية فبتيجى من صليبة عمود الديريكسيون واتياش الديريكسيون وبيض الديريكسيون والمقصات وصرر العجلات والمساعدين والبطاحات والميزان وكاوتش الميزان وقاعدتى الموتور وقواعد الفتيس والقنطرة والشكمان وتانك البنزين وصاج السيارة وعشرات الأشياء الأخرى

لذلك الحل الوحيد ان عفشجى يكشف لك عليها، وبرضه اعمل حسابك ان لو العربية قديمة مهما صرفت عليها هيفضل يطلع منها اصوات برضه مهما تعمل فيها لأنك لو صرفت دم قلبك على العفشة مش هيخطر على بالك انك تبص على قزاز الشباك اللى سايب فى المجرة بتاعته او التابلوه اللى فيه شوية شدادات قديمة مفكوكة جواه بتلق او بلاستكة قطمة الديريكسيون اللى مش مربوطة كويس علشان متآكلة، لذلك بالنسبة للعربيات القديمة اهم حاجة تبقى مطمن ان عفشة العربية سليمة وان لحامات العربية كلها سليمة، وكبر دماغك من الأصوات الأخرى

الله ينور عليك