اسمع كلامى , لو جبت العربية دى هتندم ندم العمر صدقنى
العربية لو قلنا عليها سيئة نبقى بنكرمها اوى اوى
انا الصراحة مش عايز اشبهها بالعربيات الصينى او اقول اسوأ علشان اصحابها ميزعلوش بس يكفى اقولك ان بعد 35000 كيلو العربية عاملة زى الجرار من ناحية الصوت و كل حتة فيها بتعمل اصوات و فراملها اساسا مش فرامل , انت علشان تفرمل لازم تقولها انا هفرمل بكره الساعة 3 مثلا علشان تعمل حسابها (حتة مبالغة علشان احاول اوصلك الصورة) فعلا فرامل سيئة جدا و اخر حاجة العربية تعتبر ميتة جوة المدينة سحب تحت ال40 فعلا مفيش و يا سلااااام لو فاتح التكييف تقريبا مبتسحبش نهائيا!ّ!!!
على فكرة كمان معظم اللى بيكتبوا تقييم للعربية ناس محترمة جداااااا بس للاسف بيكتبوا عن غير علم لان معظمهم مكملش بالعربية 5000 كيلو و مع ذلك ظهر معاهم عيوب بسيطة , تخيل بعد سنتين لما يشوفوا كل حاجة على حقيقتها!!
قليل اللى كملوا فوق ال5000 بالعربية و دول اللى ممكن تبدا تسمع تقييمهم مع ان فى رايى العربية متتقيمش غير بعد سنتين تلاتة على الاقل و 15000-30000 الف كيلو.
طبعا دا غير العيوب اللى ممكن نسميها بسيطة ذى الانذار و حاجات بسيطة تعلق او تبوظ و تتصلح فى التوكيل فى الضمان!!
العربية فى المقابل ليها مميزات بس بجد لو تعرف عيوبها تقتل المميزات دى!
مميزاتها : شكل خرااااااااافى من بره و جوه !!! فعلا احلى من عربيات باضعاف تمنها من بره و جوه , امكانيات بالهبل مع ان فى حاجات منها هتبوظ مع الوقت , سعر رهيييب بالنسبة للشكل و الامكانيات بس مناسب او غالى جدا بالنسبة للعيوب!!
ثباتها كمان من مميزاتها!!!
بالذمة فى عربية فى الدنيا 1600cc بالحجم الصغير دا تيجى تدوس بنزين تلاقى عداد الRPM يطلع ل 5 و العربية متتحركش غير بعد كذا ثانية؟؟ و يقولك صلحوا العيب فى الCPS الجديدة يبقى ازاى ازااااى تطلع العربية دى من ايدهم اول مرة؟ مجربوهاش , دا عيب يبان من اول مرة تسوق العربية يعنى تخيل لما انتجوا اول عربية تغاضوا عن العيب دا ازاى؟؟ يعنى دا مش عيب مع الوقت يعنى بروتون كانت عارفة و باعت العربيات المعيوبة!! يعملوا ايه يبطلوا يبيعوا لحد ميطوروا الموتور علشان يصلحوا العيب؟
موضوع السحب دا فى الاوتوماتيك بس على فكرة.
اخر حاجة كفاية توكيلها و عدم توافر قطع الغيار و الاهمال و ياخد جايزة تانى اكبر موزع ليها , يبقى تخيل المركة عاملة ازاى؟
صدقنى مركة بروتون فشلت فشل زريع من كل النواحى بجد و الشركة بتخسر خسائر مهولة (بتكلم على الشركة الام فى ماليزيا) .
مع احترامى و اسفى الشديد لكل ملاك العربية و اولهم و خاصة توت و المهندس احمد صيام بس الصراحة و باقى الناس المحترمين الى هنا بس ناس كتير من المشترين الجدد بيرشحوا العربية لغيرهم عن غير علم فبيجى حد يلاقى 10-15 واحد بيقولوا العربية ممتازة و فى الحقيقة مفيش منهم غير 2-3 اللى عندهم العربية عاملة اكتر من 10000 كيلو زى توت و بالتالى مبانش عيوبها لسه فالناس بتفتكر ان العربية عند ناس كتير و ممتازة و كمان توت معندوش مشكلة السحب علشان عربيته مانيوال و الصراحة انا مبسوط جداااا ل توت علشان الحمد لله مظهر مشاكل عنده فى العربية و اتمنى الموضوع يستمر معاه كدا و معاكوا كلكم و الله بس الفكرة ان اللى بيشترى لازم يعرف عن العربية كل حاجة من كل الناس و هو يقيم مستعد يضحى بالجودة مثلا فى سبيل الامكانيات و لا لأ و ايه حدود التضحية (يعنى ايه اقل مستوى من الجودة مقبول و كدا).
انا كل قصدى و الله مش انى ازعل حد بس خايف حد يلبس فى العربية دى و فى الاخر يدعى علينا او يلومنا و يقول ملولتوليش ليه و ليه تقولولى ممتازة و كدا
لو العربية كويسة اوى مع حد ربنا يباركله و هبقى فرحانله بس يا جماعة ارجو بلاش التعميم و ارجو الناس اللى بتقول ممتاااازة لشخص عايز يشترى يوضح كلمة لحد دلوقتى و يقول انا عامل بيها 2000 كيلو مثلا و محصلش مشاكل و مثال نبص على رد توت على اى شخص دايما يقولوا ناس بتقول كذا و كذا و يوريلو علشان كل واحد يحكم بنفسه و بيذكر مزايا و عيوب العربية بجد انسان محترم ارجو نعمل زيه كلنا و انا اولكم.
و كمان لا انا مستفيد حاجة لو محدش اشترى العربية و لا اللى ماعهم العربية بيستفيدوا حاجو محدش فينا شغال فى توكيل بروتون او توكيل منافس علشان نذم او نمدح فى العربية .
فى النهاية الاختلاف فى الراى لا يفسد للود قضية و يا ريت محدش يزعل منى على الكلام دا لانه فى مصلحة اى حد جديد هيشترى
المفضلات