الوقوف و الحركه في المطالع

**fady911x** · 23-12-2008 01:45 PM

انا عندي مشكله اني اقف و اطلع في مطلع كبري واقف
يعني مثلا المطلع زحمه و طلعت فيه شويه و بعدين اضطريت اقف و دوست فرامل عشان اللي قدامي
لو شيلت رجلي عن الفرامل هرجع علي اللي ورا
و مش هلحق ادوس بنزين بسرعه كفايه
اصحاب ليا قلولي اوعي تدوس فرامل انت تكلبش العربيه في الارض بانك توازن الدبرياج و البنزين
و في ناس تانيه قلتلي مش هتعرف تعملها عشان انت لسه جديد فاستخدم فرامل اليد و خفها بشويش لما تحب تتحرك

في سؤال اضافي برضه
انا حصل معايا في الأول لما كنت احب بس انزل اغير ركنه العربيه لقدام شويه انسي فرامل اليد مرفوعه و مع ذلك الاقي العربيه بتتحرك عادي هل ده معناه انه فرامل اليد ضعيفه؟ و ازاي اتأكد من قوه الفرامل عامه سواء يد او رجل من غير مخاطره عشان انا لسه بتعلم

**ottana** · 23-12-2008 04:28 PM

هو فى طريقة تانية بدل استخدام فرامل اليد
و هى انك لما بتكون واقف فى المطالع بتكون دايس دبرياج للاخر مع الفرامل و لما تبدى تتحرك تانى شيل رجلك سنة سنة من على الدبرياج من غير ما تشيل رجلك من على الفرامل لغاية ما تحس برجة فى العربية و ان العربية عاوزة تمشى و هنا تشيل رجلك من على الفرامل و العربية ما عمرها ما هترجع لورا ابدا و تمشى عادى

**ramylanos** · 23-12-2008 06:06 PM

المشاركة الأصلية كتبت بواسطة ottana

هو فى طريقة تانية بدل استخدام فرامل اليد
و هى انك لما بتكون واقف فى المطالع بتكون دايس دبرياج للاخر مع الفرامل و لما تبدى تتحرك تانى شيل رجلك سنة سنة من على الدبرياج من غير ما تشيل رجلك من على الفرامل لغاية ما تحس برجة فى العربية و ان العربية عاوزة تمشى و هنا تشيل رجلك من على الفرامل و العربية ما عمرها ما هترجع لورا ابدا و تمشى عادى

بس لو مطلع شديد العربيه هتبطل

**Abdo_Eldesokey** · 23-12-2008 07:18 PM

الكلام الي اتقلك صح ...

في الأول استخدم فرامل اليد لحد ما تتعود على العربية وابتدي اوزنها بالدبرياج والبنزين

وفيه فكرة جميلة إنك تيجي في يوم بالليل الدنيا تكون فاضية وشوف أي مطلع جنب البيت ، وروح اتدرب عليه

حاول توقف العربية عليه باستخدام الدبرياج والبنزين ، في الأول الموضوع متعب لكن بعد كده هتعمله بكل سهولة

**SAMER_ENGINES** · 23-12-2008 07:32 PM

كل الأراء السابقة تعتبر صح و اللي كتبه Ottana صح و انا شخصيا بعمل كدة بس رأيي ده هيكون صعب عليك دلوقتي.
و أحسن حل هو فرامل اليد حالياً حتي تتعود علي السيارة.

و بالنسبة للتأكد من فرامل اليد أو الرجل فإليك الإجابة من موضوعي "إسال و إطمن علي الفرامل" في "ورشة نايل موتورز"

كيف أتأكد من جودة الفرامل؟؟

1- يكون مشوارها مش طويل لتحت.

2- (تجربة الفرامل العادية) تاخد سرعة بالعربية و تفرمل فجائي و لو صرخ العجل و توقف العجل عن الدوران يبقي الفرامل جيدة.

3- ألا تكون الفرامل ناشفة زيادة عن اللزوم يعني مشوارها قصير زيادة عن اللزوم و اول ما تدوس العربية تكلبش في الأرض.

4- تكون الفرامل مش محجرة لما تدوس تحس انك بتدوس علي طوبة و مع ذلك العربية مش بتفرمل و لا تتوقف.

5- عدم وجود حدفة يمين او يسار.

6- أن تكون الفرامل مستقرة و استقرار الفرامل بمعني الا تتوقف في مرة و مرة الفرامل تهرب.

7- عدم توقف عجلة واحدة فقط و الباقي لا و عدم توقف جميع العجل و عجلة واحدة لا أو ان تتوقف السيارة من ناحية الشمال فقط او اليمين فقط او من الامام فقط او الخلف فقط.

* و للتأكد من فرامل اليد نضع السيارة علي السرعة الاولي و نشد فرامل اليد و نقوم بالتحرك بالسيارة بصورة عادية و كأننا بنتحرك بالسيارة بشكل عادي لو امتنعت السيارة عن التحرك أو المحرك بطل تكون الفرامل جيدة اما لو تحكرت السيارة و لو بثقل يكون هناك عيب, مع مراعاة انك تشدها بطريقة جيدة فلو شديت الفرامل سنتين او تلاتة فقط فلن توقف السيارة كما ينبغي فيجب عليك شدها جيدا ليس بعنف زيادة عن اللزوم و لا بخفة زيادة عن اللزوم.

و لأي إستفسار بخصوص الفرامل فأنا في الخدمة و إليك الرابط الخاص بالموضوع:-

http://www.nilemotors.net/Nile/showthread.php?t=50685

و تقبل تحياتي.

**Mostafa Hessen** · 23-12-2008 07:55 PM

Car_Lover

100000000000000%

**Rafraf** · 25-12-2008 12:48 AM

انا لو فى اى مطلع بوقف العربية بالبنزين

ازود و اسيبها متعلقه فى النص كدا :) لاهى ماشيه و لا واقفه

دا احسن حل لانى جربت فرمل اليد و قطعت منى!

**fadynabil** · 25-12-2008 11:17 AM

أعتقد إن الموضوع هييجي بالتعود .. وهو مش صعب خالص

**nader1117** · 25-12-2008 07:36 PM

انا لى سؤال هل استعمال الفرامل و الدبرياج
او الفرامل والبنزيت
لايؤثران على الاسطوانة والدسك ويقلل عمرهما
يعنى مش ممكن مع التكرار الكتير بنزين ودبرياج يلحس الاسطوانة