الموضوع: انت منفسن ليه ؟؟!!!

غريزة موجودة فى كل بنى ادم ....
كل واحد عنده نفسنة ولكن بتختلف ..
ناس كتير جدا تقولك انا بكره المغنى الفلانى والمغنية الفلانية اوووى وعمرى ما حبتهم ويعبر لك على مدى كرهه لهم وتلاقيه بيسمع اغانيهم !!!( دى نفسنة مش كره ولكنه لا يدرك ذلك ) ...
وكمان النفسنة بتظهر عند البنى ادم فى الوقت اللازم وهو ( النجاح والفشل ) اى انسان فى الدنيا لما بيفشل فى اى شيء خصوصا لو كان مهم فى حياته فى حين ان شخص اخر نجح نجاح ساحق فى ذلك الشيء ..اكيد بيحس بنفسنة و محدش يقدر ينكر ده ولكن بتختلف من انسان لاخر فى بنى ادم ممكن يعترف بفشله وفى بنى ادم بينفسن على اللى نجح وهو فشل وواحد تانى ممكن تتحول نفسيته دى الى كره الشخص اللى نجح ...
شيء وارد جدا وموجود عند الناس كلها ولكن باختلاف درجاتها وده راجع للبيئة اللى اتربي فيها الشخص و درجه قناعته وثقته بنفسه ...

المشاركة الأصلية كتبت بواسطة mohamed_kta

السلام عليكم

و الله أنا ليا رأى خاص أيضاً فى الموضوع ده .

معظم الساده المنفسنيين بيكونوا أصحاب مناصب و ده بيظهر جداً فى الأعمال الحكومية أو حد يكون أغتنى جيبه و ليس عقله ، وعلشان نستفيد من الكلام ده أظن كل واحد فينا لازم يبص على نفسه لحسن ممكن تطلع منفسن .
أزاى تعرف شوف بتعامل زملائك فى العمل فى الدراسة أهلك فى البيت و أنتا هتعرف خصوصاً الأصغر مقاماً أو سناً .

ده تقدر تقول عليه محدث نعمه و شبع من بعد جوع وتلاقيه كدة بمناسبة وغير مناسبة يحب يستعرض قدامك امكانياته المادية

المشاركة الأصلية كتبت بواسطة essam_virus

علي مااعتقد يا جماعه اني هو مش مريض نفسي ده بيقي انسان عنده نقص مش نقص ماديا لا ده ممكن يكون اغني منك لكن نقص في كل حاجه مش بتمني للناس الخير بمعني اصح وحش اوي من جوه

فعلا النقص مش لازم يكون مادي
في ناس اغنياء وتلاقيهم حاقدين على شخص بسيط عشان محبوب مثلا من الناس والحقد طبعا من امراض القلوب

المشاركة الأصلية كتبت بواسطة Rafraf

انا مش عارف الصراحة اللى هحكيه دا نفسنا ولا دا طبيعى

بس فى واحد صحبى انا بحبه بصراحه!

بس ساعات بلاحظ انو غريب يعنى يقوللى ايه الجزمة اللى انت لابسها دى!! شكلها وحش جدا!! و بعديها بكام يوم البسها هى هى يقول لى حلوه الجزمة دى!!! مش عارف هل دا نفسنا ولا زهيمر ولا جنان؟؟

حاجة تانية انو دائما يحاول تقليل ثقتى بنفسى!! يعنى مثلا يقول لى انت مافيش حد بيحبك!! يمكن يكون قالها بهزار بس معلقا معايا لحد دلوقت! مش عارف هو بيهزر ولا بجد! ولانى خجول فـ مش هسألو مين اللى مش بيحبنى دا !ولا حتى قلت له مش دى الجزمة اللى انت قلت انها مش عاجباك!!

مش عارف دا الحل معاه ايه مع انو طيب والله و غلبان بس مش عارف بيعمل كدا ليه

في واحد تانى كل ما يشوفنى يخنق عليا! بس دا فى ناس كتير بتكرهه بس انا بتعامل معاه بالضحك "المستفز" و التطنيش و احيانا الرد عليه بـ قله ادب عشان يسكت :)

مواضيعك كلها جميله شكرا لكِ

على فكرة يا رفرف اعتقد والله اعلم صاحبك ده هو بس من النوع اللي لسانه بيسبق تفكيره يعني اللي بيجي في باله بيقوله من غير تفكير ومش بيكون قاصد يضايق اللي قدامه وبعد كدة تلاقيه بيراجع نفسه ويحاول يصلح غلطه
وانا من رأي ان اللي زي صاحبك لازم ترد عليه اول بأول وتقوله مثلا على موضوع الشوز (بس عاجباني او ناس كتير عجبتهم غريبه انها مش عجباك) ومرة ورا التانية هياخد باله من كلامه ويتكسف من نفسه

المشاركة الأصلية كتبت بواسطة SE_coralsea

شكرا لك يا نور علي موضوعك الجامد ده , دي حاجة مش غريبة عليكي

أنا لي رأي في موضوع الناس المنفسنة دي و دايما باتبع طريقة من اثنين معاهم :
- أولا .. معاملتهم بالحسني و امتصاص شعورهم بالنقص و مساعدتهم علي النجاح مثل الأخرين و تشجيعهم كي أرفع من معنوياتهم و احسن من نفسيتهم تجاه الأخرين و تجاهي شخصيا
- ثانيا .. في حالة فشل الاسلوب الأول ألجاالي تجنبهم تماما و عدم الاحتكاك بهم

بس علي فكرة الاسلوب الاول عادة بيكون ناجح و له تأثير ايجابي

ميرسي ليك بشمهندس سمير ديما كدة رافع معنوياتي ومنور مواضيعي
انا كمان ببدأ بالحسنى مع النوعيه دي وفي ناس بتستجيب وناس لأ وفي الحالة دي تجاهلهم اكتر شيء يقتلهم