انت منفسن ليه ؟؟!!!

**نور القمر** · 24-12-2008 12:36 PM

انت منفسن ليه ؟؟!!!
احيانا كتير نبقه داخلين على مكان جديد شغل مثلا او كليه او حتى مدرسة
وداخل ومبسوط وفرحان بالمكان الجديد
تلاقي شخص بيناصبك العداء بدون سبب وانت لا تعرفه ولا يعرفك
وواقف بس عشان يتصيد الاخطاء اللي مش بالضرورة تكون فعلا اخطاء
وجايز جدا يكون هو بس اللي شايفها اخطاء
اكيد كل واحد فينا مر بحاجات زي كدة
يا ترى بتتصرف ازاي مع الناس المنفسنه دي ؟؟؟
وهل من وجهة نظرك في طريقه ممكن نعالج بيها نفسنتهم ؟؟ ولاانت شايف ان ده مرض مستعصي صعب العلاج؟؟
المنتدى مليان ماشاء الله اطباء لو في حد تخصص نفسي ياريت يشاركنا الموضوع

ولما بتدخل انت مكان جديد وتلاقي شخص محبوب من الجميع
ياترى بيكون ايه شعورك؟؟
بتنفسن منه ؟؟!! ولا عدوى الحب للشخص ده بتتنقل لك ؟؟

يعني مثلا انا لما دخلت نايل موتورز جديد لقيت الناس بتحترم وتحب في الله علا عثمان ونهى لقيت عدوى الحب اتنقلت لي على طول وحبيتهم من غير ما اعرفهم وكنت عندي رغبه اني اتعرف عليهم اكتر
وكمان واحد زي استاذ احمد ابراهيم ودكتور شيكو محبوبين اوي في المنتدى
طيب ليه ؟؟ اكيد لانهم زوق ومحترمين واخلاق وتلقائيين

طبعا الاسماء دي على سبيل المثال لا الحصر لان المنتدى ماشاء الله مليان باعضاء وعضوات يتحبوا فعلا

**أبو إياد** · 24-12-2008 12:46 PM

انا فعلا حصل معايا الموقف ده اول لما اتوظفت لقيت مدير من مديرى الاداره طلب منى طلب غريب جدا هو طلب فى الشغل اه بس مش من اختصاصى ولانه مدير اداره لازم اعمله ولانى مش متخصص عملته غلط فاكتشفت فى النهايه انى كرهته وهو كمان كرهنى ده على المستوى الخاص اما بالنسبه لمستوى العمل اولا اهدار وقت كبير جدا فى الطلب ده مر عليه شهور ثانيا اهدار فى استهلاك الموارد وطبعا كل ده بيأثر على الشغل ولان ده شغل حكومه مش مهم مش مهم اى حاجه مش مهم الشركه او الهيئه تنجح المهم ان المدير تتنفذ طلباته .
ده بالنسبه للشخص المعقدددددددددددددددددددد ددد نفسيا لدرجه انى مابقتش اصلى فى الشغل علشان مااقفش جانبه لان حرام اصلى مع واحد انا شايل منه والطبيعى دلوقتى لما اشوفه اتجاهله واللى لقيته ان الناس كلها مش بتطيقه
بالنسبه للشخص المحبوب ده من عند الله اختصار كده ( من حبه ربه حبب فيه خلقه )

**نور القمر** · 24-12-2008 01:12 PM

المشاركة الأصلية كتبت بواسطة mohamedezat

ده بالنسبه للشخص المعقدددددددددددددددددددد ددد نفسيا لدرجه انى مابقتش اصلى فى الشغل علشان مااقفش جانبه لان حرام اصلى مع واحد انا شايل منه والطبيعى دلوقتى لما اشوفه اتجاهله واللى لقيته ان الناس كلها مش بتطيقه
بالنسبه للشخص المحبوب ده من عند الله اختصار كده ( من حبه ربه حبب فيه خلقه )

بالظبط كلامك جبت المفيد
الشخص المنفسن ده مريض نفسي احيانا اشعر بشفقه عليه لانه لا يعي تصرفاته
لا يعي انه بنفسنته دي بيكَرِه الناس فيه
وصعب اوي الانسان الطبيعي يعيش في مكان وهو حاسس ان الناس كارهاه لكن اللي مش طبيعي مش بتفرق بالنسبة ان مكانش متلذذ بكره الناس له
وحقيقي اجمل احساس في الدنيا لما تلاقي الناس بتحبك لله في لله نعمة كبيرة من عند ربنا

**نور القمر** · 24-12-2008 01:17 PM

المشاركة الأصلية كتبت بواسطة elassar2010

انا بفسر الموضوع دة ان الشخص المنفسن بيقلل من قيمة الى انتى بتعملية لانة مش عارف يعملة فيحسسك انك معملتيش حاجة علشان تبقىء زية فاشلة

فعلا النفسنه دي موجودة في كل مكان
واحسن تعبير انت عبرت به
اللي بيهاجمك من غير سبب ده لانه غيران منك وحاسس انك نجحت في حاجة معينه ونفسهم تفشل زيهم ويبدأوا يحبطوك بكل الوسائل
ربنا يكفيا شر المنفسنين يا عم ههههههههههههه

**muslimah_dentist** · 24-12-2008 01:31 PM

أولاً بالنسبة لهذا الموضوع أنا لى فيه رأى شخصى و بناءاً على تجارب عديدة مع انواع كثيرة من البشر

الانسان اللى من الآخر بيحاول يفرد ضلوعه زى ما يكون ما اتوجدش حد قبله ده انسان جاهل و معندوش أى علم و ممكن يكون مستواه الوظيفى فى وظيفته مُتدنى و بيحاول يعوض النقص اللى عنده بأنه يكبت فى الناس و يحسسهم انهم دايماً أقل منه

و على النقيض تجد العالم و الذى عنده خبرة فى عمله هو أكثر انسان متواضع على سطح الأرض و تجده قمة فى الأخلاق و الذوق

و الرأى ده بنيته على تعاملى الشخصى مع الكثير من العلماء ، من علماء العلم الدنيوى أو العلم الشرعى و أدركت أن العالم الحق هو الانسان المُتواضع الحليم أما مُدعى العلم و الخبرة هو الجاهل العصبى.

**نور القمر** · 24-12-2008 01:37 PM

يعني خلاصة كلامك يا مسلمة انه انسان عنده احساس بالنقص
الاحساس بالنقص احساس داخلي ممكن يكون له عوامل تراكميه اثرت على نفسيته وبقت نفسية مريضه
وعلى فكرة مش بالضرورة يكون جاهل او مستواه العلمي متدني
لكن هو زي ما انتي قلتي مستواه الاخلاقي متدني ميقدرش يمسك نفسه ولا يحفظ لسانه من الغلط وتلاقيه مكروه من اغلب الناس المحيطة به

**احمد عز** · 24-12-2008 04:16 PM

اولا انا مش عارف انتى بتجيبى منين الموضوعات الجمده دى ربنا يوفقيك
اما بالنسبه للموضوع انا فعلا كتييييييييييييير بيحصل معايا الموضوع ده بس مش عارف ليه مع ان مش بحب اتمنظر على حد ولا بروش على حد وعلى طول فى حالى

**نور القمر** · 24-12-2008 04:19 PM

المشاركة الأصلية كتبت بواسطة احمد عز

اولا انا مش عارف انتى بتجيبى منين الموضوعات الجمده دى ربنا يوفقيك
اما بالنسبه للموضوع انا فعلا كتييييييييييييير بيحصل معايا الموضوع ده بس مش عارف ليه مع ان مش بحب اتمنظر على حد ولا بروش على حد وعلى طول فى حالى

ميرسي احمد باشا على مرورك بالموضوع
على فكرة الموضوع ده بيحصل كتير مع الكل
ومش لازم تكون بتتمنظر علي حد عشان ينفسن عليك
ولو ركزت في اللي بينفسن عليك هالاقيه غيران منك في حاجة معينه

**mohamed_kta** · 24-12-2008 05:20 PM

السلام عليكم

و الله أنا ليا رأى خاص أيضاً فى الموضوع ده .

معظم الساده المنفسنيين بيكونوا أصحاب مناصب و ده بيظهر جداً فى الأعمال الحكومية أو حد يكون أغتنى جيبه و ليس عقله ، وعلشان نستفيد من الكلام ده أظن كل واحد فينا لازم يبص على نفسه لحسن ممكن تطلع منفسن .
أزاى تعرف شوف بتعامل زملائك فى العمل فى الدراسة أهلك فى البيت و أنتا هتعرف خصوصاً الأصغر مقاماً أو سناً .