مقارنة لمالكى نيسان اوتوماتيك EX salon واوبترا اوتوماتيك

**myatooooo** · 28-12-2008 12:32 AM

انا مقبل على الشراء ومحتار بين العربيتين دول نيسان اوتوماتيك EX salon واوبترا اوتوماتيك ومش عارف اعمل اية والكلام المسموع هوة الأتى :
بالنسبة للنيسان 93000جم :
1-تقفيل مصرى غير جيد
2-استهلاك بنزين عالى
3-واطية وتحك بالمطبات عند التحميل الخلفى
4-مشاكل بدوائر الكهرباء
5-ارتفاع اسعار قطع الغيار
6-مشاكل فى الثبات والأفضل هى السوبر صالون من الجهة دية والسوبر صالون مشكلتها معايا فى الأبانوس عشان بكرة
بالنسبة للأوبترا 97000جم :
1-اوتوماتيك مكلف جداً وخايف منة بكل صراحة
2-ضمان قليل سنتان او 60 الف كم
3-صاج ضعيف
4-اى تعديل بيخرج العربية من الضمان ( كاسيت - جنوط)
5-علبة الديركسيون بها مشاكل ويتم تغيرها بالضمان و سعرها 4000جم
6-فرامل ضعيفة

ومن الأخر انا هتجنن ومش قدامى عربيات تانية عشان محدش يقترح عليا حاجة تانية لأنى بتعامل مع ابو غالى وبعد ما حجزت الأوبترا فوجئت بأنضمام نيسان ومش عارف اعمل اية اخلينى زى منا و اتكل على اللة ولا اغير ارجوا المساعدة عشان قربت اتجنن خلاص والمفروض انى اخد قرار بسرعة و مش قادر افكر

**Rsarabia** · 28-12-2008 01:11 AM

هات لانسر او تيدا

**حماده المصري** · 28-12-2008 01:22 AM

كيا سيراتو عربيه ممتاااازه شاسيه الالنترا القديمه ونفس العفشه وقطع الغيار
بس الفرق انها مساعدين غاز على زيت عشان كده ناعمه مش ناشفه
قطع غيار وتوكيل مضمونين وقطع غيار مش غاليه ومنتشره والسبب انها
زي الالنترا القديمه ملقتش تيل فرامل كيا هاتو من هيونداي وهوه هوه

عموما معظم مشاكل الاوبترا الي بتتكلم عليها مش لاقيها فيها خالص هي مع صديق فيها مشكله طرمبه البنزين بتخررف شويه غير كده مفيهاش حاجه

اكتر ميزه بالنسبه للعربيه عفشه كويسه مش ناشفه اوي زي هيونداي او لانسر مثلا

ومريحه جدا بالنسبه للركاب الي ورا

بس السيراتو عربيه كويسه جدا وافضل من العربيتين دول

ومتنساش الاستخاره

**myatooooo** · 28-12-2008 01:42 AM

المشاركة الأصلية كتبت بواسطة Rsarabia

هات لانسر او تيدا

اللانسر غير متوفرو بأبو غالى لأنى بشترى بالقسط والتيدا خارج امكانياتى شكراً على مشاركتك

**myatooooo** · 28-12-2008 01:44 AM

المشاركة الأصلية كتبت بواسطة حماده المصري

كيا سيراتو عربيه ممتاااازه شاسيه الالنترا القديمه ونفس العفشه وقطع الغيار
بس الفرق انها مساعدين غاز على زيت عشان كده ناعمه مش ناشفه
قطع غيار وتوكيل مضمونين وقطع غيار مش غاليه ومنتشره والسبب انها
زي الالنترا القديمه ملقتش تيل فرامل كيا هاتو من هيونداي وهوه هوه

عموما معظم مشاكل الاوبترا الي بتتكلم عليها مش لاقيها فيها خالص هي مع صديق فيها مشكله طرمبه البنزين بتخررف شويه غير كده مفيهاش حاجه

اكتر ميزه بالنسبه للعربيه عفشه كويسه مش ناشفه اوي زي هيونداي او لانسر مثلا

ومريحه جدا بالنسبه للركاب الي ورا

بس السيراتو عربيه كويسه جدا وافضل من العربيتين دول

ومتنساش الاستخاره

شكراً على ردك و أهتمامك للأسف الكيا خارج ابو غالى ويا ريت تفدنى اكتر عن الأوبترا من صديقك تبقى خدمتنى

**Hosam_Optrawy** · 28-12-2008 04:18 AM

بص انا معايا اوبترا اوتوماتيك بقالها 6 شهور
مش فاهم قصدك ايه من ان الاوتوماتيك مكلف بس اكيد الاوتوماتيك اريح واحسن وملوش مشاكل ولا حصله حاجه فى اى عربيه من 2005 لحد دلوقتى وعلى فكره الفتيس يابانى
الضمان مش قليل 3 سنين او 60 الف ودى المده اللى فى اغلب العربيات
الصاج مش ضعيف ولا قوى هو عادى مقارنه بباقى العربيات الجديده
التعديل مبيخرجش من الضمان لو مضرتش بالعربيه ولو عايز تعمل تعديل ممكن تعمله فى التوكيل او مركز معتمد
علبه الدركسيون مفهاش مشكله بس فيه فى بعض العربيات تسمع صوت تزييق وانت بتلف الدركسيون وانت واقف والعربيه لسه دايره لكن بعد شويه الصوت بيختفى وده مجرد صوت مبيأثرش على اداء العربيه
الفرامل مش ضعيفه الفرامل عاديه لانها مش ABS
وعموما الاوبترا من انجح العربيات فى الفئه دى
انا جبتها بعد مقارنه مع السيراتو والصنى
وربنا يوفقك فى الاختيار

**madoo** · 29-12-2008 02:28 AM

انا راى النيسان صنى احسن حتى لو بتتقفل فى مصر

بس كفايه انها نيسان اليابانى

**amr elkady** · 29-12-2008 06:17 PM

Nissan Taba3an

**kmansy** · 30-12-2008 09:44 AM

معايا أوبترا 2008 أوتوماتيك لايوجد مشاكل نهائيا حتى الآن ولكن الصاج ضعيف وأعتقد إن كل السيارات فى نفس المستوى بالنسبة لأوتوماتيك الأوبترا الأوتوماتيك إنتاج شركة Asin وده يابانى ومورد للفتيس الأوتوماتيك لمعظم سيارات تويوتا أنصحك بشرائها فهي صفة ناجحة إن شاء الله