الموضوع: تقييم سيارتي الجين 2 بعد 7000 كم

بسم الله الرحمن الرحيم

هذا هو تقييمي عن سيارتي الجين 2 موديل 2008 بعد صيانة الـ 5000 كم و عن التوكيل و بعض ملاحظاتي عن الأداء العام للسيارة :
بداية لن أتحدث عن مميزات و عيوب السيارة اللي طبعا كلكم خلاص عرفتموها و حفظتموها و مللتم من سماعها لكن سوف أتحدث عن تجربتى عموما مع السيارة ( هى عاملة دلوقتي 7000 كم ) .
1- المشكلة الأولى هي مشكلة الطقطقة في علبة الدركسيون اللي كانت مخوفانى جدا يكون فيه عيب في العفشة , و عند صيانة ال1000 أخبروني بأن علبة الدركسيون بها عيب يسبب صوت فقط و لا يتسبب في أي مشاكل أثناء السير و انه سيتم تغييرها و لكنها غير متوفرة وقتها , و حتى يومنا هذا غير متوفرة , و بعد مشورة مع الصديق العزيز " توت " ذهبت و عرضت العربية على عفشجى اعرفه للتأكد من صحة الكلام و فعلا تأكد سلامة علبة الدركسيون , و عندما علمت بوجود الماليزيين ذهبت إليهم بالسيارة و عندها أكدوا أن هذا العيب معروف لديهم باسم ( carrefour noise ) بمعنى انه هناك منطقة غير ممهدة بماليزيا بجوار كارفور ( الماليزي طبعا ) و جميع السيارات الجين 2 ( تقريبا موديل 2008 ) تصدر هذا الصوت عند المرور فيه , و بناءا عليه فسوف يقوموا بعمل تعديل لأنابيب معينة لا اعرفها تقوم بتوصيل زيت ( الباور تقريبا ) بكفاءة مما يؤدى إلى حدوث هذا الصوت , و إلى الآن لم يتم إرسال التعديل .
2- المشكلة الثانية هي عدم استقرار مؤشر الـRPM عند معدله الطبيعي , بمعنى انه أحيانا يكون و السيارة متوقفة في إشارة أو ما شابه ذلك يستقر عند 1400 لفة و أحيانا اكثر من ذلك , و عرفت من مهندس صديق بالتوكيل أن هذا عيب لا حل له , و انهم جربوا من قبل كافة الحلول له مثل تغيير سنسور السلانسيه و الكنترول يونيت و لم ينتهي العيب , و عندما عرضت السيارة على الماليزيين قالوا أن السيارة لا بد لها من استخدام بنزين عالي الاوكتين و قرروا بنزين 95 , أما الأقل من ذلك فانه يضر بالموتور و يقلل من كفاءته ( و البنزين ال90 يعنى دمار للموتور بالمناسبة ) , و جربت فعلا ال95 و حسيت باختلاف كبير فعلا في أداء السيارة , انخفاض صوت الموتور بصورة كبيرة , نعومة في الموتور , و انتهت المشكلة الخاصة بالRPM بنسبة 70% تقريبا إلا أنها مازالت موجودة و تحدث أحيانا و إن كان على فترات متباعدة .

بخلاف هذا لا يوجد عيوب تقريبا بالسيارة نهائيا , و إن كان هذان عيبان كبيران فعلا و لكن يمكنني التعايش معهما .

استهلاك البنزين :1- داخل المدن : السيارة تستهلك بنزين عالي فعلا في الزحام , يمكن أن يصل إلى 8.5 لتر لكل مائة كم, و لكن في الطرق العادية تستهلك حوالي 7.5 لتر لكل مائة كم .
2- خارج المدن ( السفر ) : استهلاك السيارة حوالي 6.5 لتر لكل مائة كم , و هذا بدون قرص على السيارة , بمعنى تركها تاخد سرعتها براحتها بمتوسط سرعة 120 كم .
ملاحظات :
· المعدلات السابقة باستخدام كمبيوتر السيارة و كذلك الطريقة التقليدية .
· المعدلات السابقة عند استخدام بنزين 92 .
· عند استخدام بنزين 95 انخفض المعدل إلى حوالي 7 لتر للطرق العادية , 5.5 لتر للسفر , و ذلك بكمبيوتر السيارة فقط .
· استخدام التكييف صيفا يؤثر بشدة على استهلاك البنزين داخل المدن ( يمكن أن يصل إلى 11.5 لتر لكل مائة كم ) و لكن في السفر لا يؤثر مطلقا على الاستهلاك .
· نقل السرعة مبكرا أو متأخرا يسبب زيادة في استهلاك البنزين ( أنا بانقل عند 3500 لفة ) .
· أخيرا يجب ملاحظة استهلاك البنزين دائما لأنه يحتاج متابعة في هذه السيارة , و يجب تنظيف فلتر البنزين دائما , و لكن تنظيفه داخل التوكيل يتكلف 40 جنيه فشوفلك مكان تانى احسن تنظفه فيه .

التوكيل :

التوكيل نفسه غير جيد و العاملون فيه مظلومون معنا , التوكيل لا يوفر الاهتمام الكافي بالسيارة من قطع الغيار و أماكن للصيانة , و تحس كده انه عاوز يقولك القانون لا يحمى المغفلين , يعنى انت اشتريت السيارة بارادتك الحرة و محدش غصبك عليها فمتقرفوناش بقى , انما صراحة العاملون به متعاونون جدا و محترمون و أخص بالذكر المهندس هاتى الغندور و كذلك مهندس مصطفى و طارق و كريم و غيرهم , يعنى رغم إني كنت مستاء جدا منهم في البداية ظنا منى أن العيب فيهم , لكن عندما تكرر التعامل معهم وجدت و الله انهم أناس محترمين و متفهمين لمشاكل السيارة و لكن الطاقة الاستيعابية الصغيرة جدا لورشة الصيانة هي اللي بتحكمهم .
و بعدين التوكيل غالى جدا جدا في كل شئ , أسعار الصيانة و قطع الغيار و خلافه , حاجة مش معقولة فعلا , و علشان أريكم الاستهبال ( أسف ) هعرض لكم بعض أسعار قطع الغيار بدون الضريبة و مصاريف التركيب :
الموتور 60000 ( ستون ) !!!!!!!!!!!
الفتيس 45000 ( خمسة و أربعون ) !!!!!!!!!!
مفتاح الزجاج الرئيسي 1400
فانوس الشبورة الواحد 405
الاسبويلر 1900 ( في الرياض بتوكيل بروتون سعره بعد دهانه 100 ريال !!!!!! )

ثبات السيارة :

مش هتكلم على ثباتها عند السرعات العالية لأنه معروف و مش محتاج كلام , لكن أنا تعرضت لموقف صعب جدا خلاني فعلا احب العربية دي و احمد ربنا على توفيقي للقرار ده .
كنت ماشى على الأوتوستراد راجع من وسط البلد في اتجاه المعادى و معي زوجتي و أولادي يوم وقفة عيد الأضحى , الدنيا صيام و المغرب أذن علينا و لسه موصلناش البيت , الشوارع فاضية تماما مثل وقت الإفطار في رمضان , أنا ماشى على سرعة 120 تقريبا و امامى فيرنا تاكسي بتخطيها و فجأة من أقصى الاتجاه المقابل وجدنا سيارة اوبل استرا تنحرف فجأة كده و بدون سبب و تمشى بعرض الشارع و تصطدم بالجزيرة الوسطى و تقفز بالعرض أمامنا , أنا فرملت بكل قوة و انحرفت بزاوية قائمة , يعنى مشيت بعرض الطريق ثم اعتدلت مرة أخرى عند نهاية الطريق و فلت بمعجزة بحتة , فقط لطف الله و فضله اللي أنقذنا يومها , و عشان تتخيلوا الموقف الفيرنا اللي كانت على يميني لم تستطع عمل أي شئ و اصطدم بالاسترا ليرجعها مرة أخرى إلى الحارة المقابلة , الفيرنا دمرت تماما و الاسترا الجانب الأيمن بالكامل لم يعد له معنى , و الله لو عربية تانية انحرفت بيها بالشكل ده على السرعة دي لانقلبت أو على الأقل لفت حول نفسها .

معلومات أخيرة هامة جدا لكم :

1- الجين 2 لا يوجد بها EBD , فقط ABS , و الكلام ده ينطبق على كل الموديلات 2006 حتى 2009 , و قبل المعارضة منكم ابقوا اسألوا لما تروحوا للصيانة .
2- عرفت أن الماليزيين قرروا في زيارتهم الأخيرة أن الضمان على السيارة بالكامل 3 سنوات أو 60000 كم , و سيتم إلغاء الضمان 5 سنوات على الموتور و الفتيس لكل الموديلات , طبعا إحنا كلنا اشترينا السيارة على أساس أن الضمان 5 سنوات على الموتور و الفتيس , يبقى لو صدر الكلام ده رسميا فلازم نجمع نفسنا و ناخد بقى موقف رسمي إحنا كمان .

تقييمي العام عن السيارة و رضائي عنها :

العربية جميلة جدا واسعة و ثابتة و موتور قوى و كماليات ممتازة , فقط الشنطة صغيرة قليلا و ده طبعا معروف قبل الشراء , انما فعلا كانت احسن الاختيارات و راضى عنها بنسبة 100% , و فى النقطة دى بالذات احب اشكر صديقنا توت عنخ امون لانه سبب رئيسى فى انى أهدى من ناحية العربية لأني كنت فعلا متأثر بالكلام اللي بيتقال و يتكتب عن العربية لدرجة أنى نفسي كانت وقفت منها بعد صيانة الألف و قررت أبيعها و أجيب حاجة تانية و اخسر اللي اخسره , لكن الراجل قابلني و شاف العربية و جربها معايا و قعد يقارن بينها و بين عربيته لغاية فعلا ما استريحت تاني و ابتديت أعيد تقييم العربية من جديد , يعنى لو كنت أيامها كتبت أي حاجة عن العربية كنتم سمعتم أسوأ كلام عنها , لكن دلوقتي أنا بأحمد ربنا على توفيقي إلى شراء السيارة .

ده تقييمي عن عربيتي أنا , و ربنا يحفظهالى و يبارك فيها , و إذا كان أي حد تانى شايف أن العربية وحشة و الكلام اللي من النوع ده ( نقد انطباعي مش موضوعي ) هو حر في رأيه لكن أنا باقيم عربيتي و أنا حر في رأيي .
أسف للإطالة عليكم و لكن كنت وعدت بعمل تقرير عن السيارة و أديني وفيت بوعدي .

و علشان أريكم الاستهبال ( أسف ) هعرض لكم بعض أسعار قطع الغيار بدون الضريبة و مصاريف التركيب :
الموتور 60000 ( ستون ) !!!!!!!!!!!
الفتيس 45000 ( خمسة و أربعون ) !!!!!!!!!!
مفتاح الزجاج الرئيسي 1400
فانوس الشبورة الواحد 405



الكلام ده مضبوط يا جماعه؟؟؟؟؟؟.........لو مظبوط دي تبقي مصيبه ولا ايه.