السلام عليكو يا أعضاء نيل موتورز الكرام
قمت بشراء البروتون جين 2 بناء على ترشيحات الأخوة الأعضاء فى نايل موتورز و اعجابى بهذه السيارة , قمت باشراء يوم 28/7/2008 و عند شرائها سألنى مسئول البيع (أستاذ محسن صالح) اذا كنت اريد التأمين على السيارة ضد الحوادث ام لا و ذكر لى ان امامى اختيارين اما التأمين مع شركة تأمين مثل الجمعية لمصرية و دفع 1.6% من ثمن العربية كقسط تأمين سنوى وفى هذه الحالة اذا وقع حادث للسيارة اقوم باصلاحها على حسابى و بعد كدة يتم استخراج شيك لى , او التأمين مع التوكيل ب2.5% وفى هذه الحالة اذا وقع حادث للسيارة يتكفل التوكيل بالاصلاح وبعد كدة برجع هو على شركة التأمين وقولت اريح دماغى و اتعاقد على التأمين مع التوكيل و قد كان
و فى 6/12/2008 تعرضت سيارتى لحادث نتج عنه خرم فى كارتيرة الزيت و تانك البنزين و عوامة تانك البنزين , وقع الحادث فى 6 اكتوبر بجانب بنزينة اون ذا ران فنصحنى اصحاب البنزينة بحمل السيارة على ونش الى التوكيل و قد كان واستلموا فى التوكيل السيارة الحراس وكان هذا قبل العيد بيومين و الدنيا كلها اجازة, بعد العيد توجهت الى التوكيل حيث استقبلنى مسئول الصيانة الباشمهندس وجيه وذكرت له انى مأمن على السيارة مع التوكيل و انهم لابد ان يقوموا بالاصلاح بناء على تعاقدى مع التوكيل, طمأنى الباشا و قالى حضرتك العربية تبعنا وكلمنى علشان اتابعك و اقولك امتى تيجى تستلم العربية , طبعا انا فرحت و صدقته, تانى يوم بكلم الباشا يقولى اسف يا بيه دا نزل قرار ان اللى مأمنين مع التوكيل تبع الجمعية المصرية يحاسبوا التوكيل زى اى زبون عادى و بعد كدة نطلعلهم شيك على الجمعية زى اى عميل عادى عند الجمعية ولا كأنى مأمن مع التوكيل, يعنى يا جماعة التوكيل ضرب الفرق بين 1.6% و 2.5% فى جيبه و كمان حيخلينى ادفع زى اى زبون عادى بسعر التوكيل الغالى نار, طالبين منى 4250 جم علشان تغيير كارتيرة زيت و تانك بنزين و عوامة فى مقابل شيك من الجمعية المصرية انا اعلم جيدا انه ملوش لازمة لأن اجمعية المصرية فلست ورئيسها فى السجن لأنى بشتغل فى بنك وعارف ان الشيك دا بدون رصيد, ان عايز تعليق اعضاء نايل موتورز الكرام خصوصا الاخ توت عنخ امون على المهزلة دى نصب و احتكار توكيل عز العرب