الموضوع: البروتون توكيل سيء جداااا؟؟؟

المشاركة الأصلية كتبت بواسطة saidbakr

الا الا الا!!!
يعني معنى إن اللي معاه عربية بروتون موديل السنة دي، كمان 8 سنين هيبقوا يقولولوا في التوكيل ... "اشربها يا فندم" ده كلام فارغ.

النقطة التانية مع كامل احترامي و تقديري للمهندس آمر، بالرغم إني لسة ما عنديش بروتون أو حتى لسة ما اتعاملتيش معاه خالص، و لكن من واقع كلام الاعضاء و وصفهم له؛ أحب توضيح نقطة مهمة جايز أكون اتكلمت فيها قبل كدة، و لكن بيتهيألي انه من المناسب اتكلم فيها تاني في الموضوع ده:
المفروض أي توكيل أو شركة محترمة بجد، المفترض إنها بتقدم خدمة كويسة لزبونها، تتعامل مع الزبون خارج نطاق الأشخاص و الأفراد بصفتهم الشخصية.

يعني لازم تعامل الزبون مع الشركة يكون من فرد للشركة نفسها ككيان من خلال أصول و قواعد عامة على الجميع، و تكون الأصول و القواعد دي واضحة جداً و معروفة للكل سواء كانوا زباين أو موظفين من كبيرهم لصغيرهم.

غير كدة بيتهيألي إن الموضوع يتحول إلى فوضى و هرجلة و عدم انضباط، و تصبح الشركة دي أو التوكيل عبارة عن عزبة أو مولد و صحبه غايب، و في الوضع ده يبقى التعامل مع شركة زي دي في حاجة و بالذات العربيات، عبارة عن مضيعة للوقت و الجهد و الفلوس.

في الصدد ده بحب دايما اذكر تجربة تويوتا في السعودية، تويوتا كعربية بالنسبة لسعرها و وضعها و إمكانيتها، ما هياش أحسن عربية و المفروض إن مبيعاتها ما تكونشي بالمستوى ده في بلد زي السعودية، و لكن توكيل زي عبداللطيف الجميل (موش عارف اسمه بالضبط) قدر من خلال خدمة ما بعد البيع و تعامل مميز مع الزباين، قدر انه يخلي تويوتا أعلى مبيعات في السعودية. ياريت إخوننا في عز العرب يستوعبوا الدرس ده، و إن الموضوع موش هبرة بنهبرها من الزباين و هنخلع. في إمكانهم إنهم يضاعفوا مكاسبهم، لما ينجحوا إنهم يخلوا بروتون عربية شعبية و منتشرة لو ركزوا على خدمة بعد البيع و حسسنوها من ناحية النوعية و الاسعار.

كلم مظبوط 100 * 100