الموضوع: أعراض تلف بعض أجزاء الميجان Ii

السلام عليكم

أنا قولت أعمل تجميعة كده لبعض الحاجات اللى حصلتلى فى العربية واللى حصلت لناس أعرفهم أو شفتهم أو حتى حاجات حصلت مع ناس تانية فى منتديات أجنبية.....عشان لو لا قدر الله حصلت مع حد يبقى عارف أيه اللى بايظ عنده ويطمن........و أن شاء الله ميحصلش حاجة و ما تحتاجوش للموضوع ده خالص
نبدأ بسم الله

1- العربية مش بتدور خالص ( ولا بتسمع صوت الدوارة ) :
أول حاجة تبص عليها هى البطارية.....تتأكد أن كابلات البطارية راكبة و مربوطة كويس....لو تمام يبقى فى حاجة من 2......البطارية خلصت خالص أو البطارية أتحركت من مكانها والعربية دايرة و عشان ميحصلش مشكلة بيبقى فى فيوز بيضرب و بيفصل الكهرباء خالص عن العربية.
وعادةً مفيش رسايل هتظهر على الشاشة.

2- العربية بتدور وبتبطل على طول أو بتبطل وأنت ماشى ( مصحوبة بنزول ال Rpm ) :
غالباً هيبقى حساس كامة
وعشان تمشى بالعربية أفضل دايس بنزين وخللى ال Rpm على 3 لمدة من دقيقتين الى 3 دقايق....شيل رجلك من على البنزين وهتلاقى العربية مبطلتش.
وعادةً مفيش رسايل هتظهر على الشاشة.

3- العربية بتترج و مخنوقة قوى ومش بتسحب :
غالباً هيبقى كويل أو أكتر
أمشى على العربية عادى بس مش كتير.
ممكن تظهر رسالة " Check Gear Box"

4- العربية بتترج مع دوسة الفرامل :
غالباً مشكلة من الطنابير أو الكاوتش.
وعادةً مفيش رسايل هتظهر على الشاشة.

5- صوت ونة من العفشة و أنت طالع بالعربية بسرعة شوية:
قاعدة فتيس أو موتور.
وعادةً مفيش رسايل هتظهر على الشاشة.

6- صوت خشونة تحسها فى الدركسيون و أنت بترجعه على المنتصف بعد ما تلفه يمين أو شمال:
بطاحات مساعدين.
وعادةً مفيش رسايل هتظهر على الشاشة.

7- بتسمع صوت خرفشة بعد الدوارة :
ترس الديفازر Dephaser عاوز يتغير.....وتعمل حسابك على كاتينة معاه.
وعادةً مفيش رسايل هتظهر على الشاشة.

8- لمبة ABS و لمبة Stop بينورو مع الفرامل أو ساعات مع المطبات:
التيل عاوز يتغير
وعادةً مفيش رسايل هتظهر على الشاشة.

9- لمبة Airbags منورة مع لمبة Service :
فيش الأيرباجز اللى تحت الكراسى مهزوزة.....وخصوصاً لو متعود تحط حاجة تحت الكرسى زى طفاية الحريق مثلاً أو هيكون شريط الايرباجز فيه مشكله او عايز يتغير.
وعادةً مفيش رسايل هتظهر على الشاشة.

بس دول اللى أنا فاكرهم ذاكروهم كويس بأه يا وحوش وربنا ميجيبش حاجة وحشة أن شاء الله.

ويا ريت لو حد عنده أضافة يتفضل يضيفها بس تكون حاجة متعلقة بميجان شوية مش مشكلة ممكن تحصل فى أى عربية زى العربية بتحدف أو بتغربل على السرعات........يعنى قصدى أنها تكون حاجة مثلاً زى الكويل كده أو حساس الكامة.