الموضوع: جين 2009 مانيوال بعد اول الف

السلام عليكم جميعا
انا الحمد لله استلمت عربيتى جين 2009 مانيوال يوم 28 ديسمبر
العربيه لونها ميتال جراى او سكاى جراى
المهم هاقولكو على العربيه عشان انا عارف ان فيه ناس قلقانه تشتريها وبتخش تدور زى مانا كنت بقعد افصص المواضيع بتاعه التفييم اللى الناس المحترمه اللى هنا بتكتبها

اول حاجه الموتور ما شاء الله باين عليه انه قوى جدا رغم انى لسه مجرتش بيها عشان التليين وكده

العفشه برضه كويسه ومش خشنة زى مانا كنت متخيل بعد ما الناس حكولى بالعكس انا شايف ان عفشتها ناعمة او زيها زى اى عربيه زيرو
كمان العربيه محكتش فى ولا مطب من اول ما جبتها رغم انى فيه مره كان راكب معايا اربعه قرايبنا منهم اتنين اوزان تقيله وكمان معاهم طفلين صغيرين

الصالون طبعا مايتحكيش عليه ماشاء الله قمة الشياكة والاوبشن اللى فى العربيه بيخليها احسن من اى عربيه فى نفس السعر يعنى التاره بتاعتها والفانوس اللى بيعلى ويوطى وفتح الشنطة من الريموت وباقى الاوبشن مش موجود فى عربيات كتير فى سعرها واغلى منها كمان

الكاسيت بتاع العربيه mp3 وصوته نقى والسماعات بتاعتها قويه برضه يعنى الواحد مش محتاج يركبلها اى حاجه زياده فى طقم الصوت الا بقى ممكن تركب بازوكا فى الشنطة لهواة الbase العالى

الصالون من ورا مش ضيق اوى ومش واسع برضه يعنى متهيالى طبيعى او زيه زى الفرينا والاكسنت بس انا لسه مركبتش فيها ورا ده كلام الناس اللى ركبو معايا

الثبات بتاع العربيه عالى جدا بيخليك تستمتع وانت سايقها يعنى باخد الملفات على الطريق بسرعه عاليه وبحس انى راكب عربيه محترمه

استهلاك البنزين كان بين ال 8 و ال 9 لتر اول 500 كيلو ودلوقتى وصل معايا ل 7 لتر لكل ميه كيلو


العربيه طبعا شكلها جامد جدا ومش منتشره زى عربيات كتير كان نفسى اركبها واتخنقت منها لما لقيت منها تاكسيات

الحمد لله ماسمعتش اى اصوات طالعه من العربيه الا شويه خبط كده بس ده لما كان فرد الكاوتش عليها طينه ومن اول ما غسلت العربيه ما سمعتش اى اصوات

نيجى بقى للعيوب
فرامل العربيه متهيالى كانت المفروض تبقى اقوى من كده شويه او ممكن انا مخدتش عليها لسه
بس انا شايف انها المفروض كانت تبقى اقوى عشان الموتور قوى فعايز فرامل قويه

الباب اللى جنب السواق مبيقفلش ويفتج مع السنتر (بسيطة الحمد لله) اكيد هاتتعمل فى الصيانه
غير كده الحمد لله مفيش اى مشاكل

طبعا شكرا لكل الناس اللى فى المنتدى اللى بيتكلمو بصراحه عن العربيه لانى خدت القرار انى اجيبها بعد ما شوفت المنتدى ده
وللناس المترددين لسه عايز اقولهم انا كنت محتار بين الجين والياريس والنيو اكسنت والجيتز عشان هما اللى تقريبا فى نفس السعر
الياريس استحرمت ادفع 85000 واجيب عربيه ومتكونش كامله
النيو اكسنت عربيه حلوه بس خفيفه جدا كنت هاتقلب بيها مره على كوبرى
الجيتز عربيه كويسه برضه بس صغيره اوى وشكلها مدخل دماغى
الحمد لله انا مش ندمان بالمره انى جبت العربيه انا فرحان جدا بيها وشايف انها احسن عربيه فعلا بالسعر ده

شويه استفسارات بقى
انا كنت قريت ان الكاسيت بتاعها bluetooth بس مش لاقى حاجه عن الموضوع ده فى الكتالوج بتاع الكاسيت حد عارف عنه حاجه ؟

الزرار اللى مكتوب عليه RDS ده بتاع ايه ؟

انا دلوقتى المفروض اعمل صيانه الالف كيلو اعملها فين ؟ لانى معرفش اماكن التوكيل وبعدين انا من الزقازيق فياريت حد يوصفلى الطريق لاى مركز صيانه كويس مع العلم انى بروح القاهره صحراوى يعنى اول حاجه بتقابلنى بتبقى السلام وبعديها الحرفيين

كمان هو انا المفروض يبقى معايا ورق معين عشان الصيانه ولا هو الدفتر اللى جاى مع الكتالوجات ده بس ؟

معلش طولت عليكو