المشاركة الأصلية كتبت بواسطة amir
طيب علشان الغرض في نفس يعقوب الذي لم يباح به بعد
انا مأمن علي العربيه مع الجمعيه المهلبيه
و لما عملت حادثه لاقيت الامرين مع الجمعيه و ساعه استلام فلوس التصليح مخدتش المبلغ اللي دفعته انا في الحادثه بالكامل بل بالعكس عملو تخفيض عليه روعه, و اللي ينرفز ان في ناس تانيه كانت دافعه مبالغ اكتر مني و برضو صرفولهم قيمه قريبه قوي قوي من القيمه اللي اخدتها
انا مش قادر افهم هما محرمين التأمين ليه بس
و السؤال ده مش جدال و استهانه بالمحرمات
ده سؤال
مثلا
انا ماشي في امان الله الاقي واحد غشيم خبطني
انزل الاقيه هو و الناس يقولو حصل خير و عوضك علي الله و كلام من ده
طيب بدايه محصلش خير دي حادثه
اكيد كلنا عوضنا علي الله
انما في حديث بيقول من افسد شيئا فعليه اصلاحه
ولا الفلوس اللي هتدفع في الاصلاح قلت او كبرت مش فلوس من جيبي الخاص؟
ده غير بقي الخسائر المعنويه من تعطل السياره و وقتي الشخصي
و اللي ينرفزك تلاقي واحد طلع من تحت الارض يقولك هتقبل فلوس عوض!!!!!
عوض ايه بس
بنفس المبدء يبقي انا كدكتور اسنان ابوظ سنان الناس عن جهل او خطأ و اقولهم لما يتكلفو فلوس في تركيبات و خلافه هتقبلو عوض
و المهندس لما يبني عماره عن جهل او خطأ برضو يقول لصاحب العماره لما تقع هتقبل عوض
و هكذا و هكذا و قيس علي ده كل حاجه في حياتنا
لو مكنش في تبعات لأخطاء الواحد كثواب و عقاب يبقي ليه ربنا عمل جنه و نار و ثواب و عقاب؟
حياه البشر لا تستقيم بدون وجود رادع و عقاب
و ابسط مثال حاله المحروسه الحاليه و ان كان الكلام عنها مش في مجال الحوار دلوقتي
طيب لما الحادثه تحصل مره و اتنين و تلاته
و كل مره تلاقي المخطيء قدامك يتمسكن او يقولك هتقبل عوض و كلام لا بيقدم ولا يجيب ده لو كان اساسا محترم, لأن في نوعيه استغفر الله تلاقيه غلطان من ساسه لراسه و ينزل يبجح و يحاول يغلطك انت!!!!
و رجال المرور و المرور اهم حاجه عندهم ساعتها انك تشيل مصيبتك دي من الشارع و يسحبو رخص و يعملو محضر و مادام مفيش اصابات في البني ادمين يبقي قابلني لو المحضر عاملك حاجه
ده الواقع الاليم بتاع الحقوق المهدوره لينا في الشارع
نيجي بقي لحل
واحد يخبطك انت تخبطه مش مهم
تنزل زي الباشا تبص بصه علي عربيتك لو شايف انها محتاجه اصلاحات كبيره يبقي تعمل محضر علشان التأمين انما اقل من مبلغ معين (اظنه 5 الاف جنيه) يبقي مش لازم محضر
و في كلا الحالتين انت زي الباشا معزز مكرم و مش هتتكلم ولا تناهد ولا تزعق ولا تحرق دمك معاه او مع حد
و حتي لو خبطك و جري يا تلحق تاخد نمرته علشان المحضر او تقيده ضد مجهول
و التأمين يتولي الباقي
انا مش قادر افهم بقي ليه التأمين حرام
فلوس و بتدفعها و بيتم استثمارها و لو احتجت لتصليح بيدفعولك
اه ممكن اكتر من اللي انت اساسا دافعه انما هم بيستثمرو فلوسك و فلوس غيرك في مشروعات بتكبر الفلوس دي
و انت راضي ان الفلوس اللي انت دفعتها في الاول لا تستردها في حاله انك معملتش حادثه
ايه الرابط بين ده و بين القمار و الميسر و بين ان التأمين بيخلي الناس مستهتره؟!
انا مسلم و بحكم عقلي برضو اللهم الا في الغيبيات
و انا شايف ان فقهاء الدين لو توسعو بعقولهم شويه و درسو اقتصاد و طب و فلسفه و هندسه و غيره و غيره من علوم الدنيا اكيد فتاويهم و ارائهم بخصوص امور كتير هتتغير
مثال بسيط قوي موضوع نقل الاعضاء اللي كان محرمينه من فتره
الموضوع ده فتح ابواب كتير للهجوم علي ديننا
مع اني ببساطه شديده شايف ان نقل الاعضاء ده بيعتبر علاج زيه زي الدواء اللي بنشتريه من الصيدليه
لا بيطول في العمر كما اشاع ولا بيمنع الموت و القضاء و القدر
و رسولنا الكريم صلوات الله و سلامه عليه قال كل داء و له دواء الا السقم (و السقم اللي هو الموت) و الله اعلم يمكن صيغه الحديث ما خلق الله من داء الا و له دواء الا السقم
يبقي انا كواحد مش شيخ او مفتي و اسمع الحديث ده و اجرم او احرم نقل الاعضاء ازاي بس؟!
دي امثله بسيطه بس علشان نتصور العقليات اللي ورا الفتاوي
عقول مش عايزه تستنبط ولا تواكب العصر (مش بتكلم عن اباحه الخمر ولا الزنا) انا بتكلم عن مستحدثات في عصرنا الحالي مش قادرين يستوعبوها
و سؤال اخر للناس اللي شايفه ان التأمين حرام
هل انت شايل شوم و عصي و اسلحه خفيفه علشان تستعملها في حاله ان واحد خبطك في عربيتك ولا لأ؟
لأن كان في موضوع مفتوح عن الموضوع ده و نسبه كبيره قوي اجمعت ان ده ضروري علشان تاخد حقك!!
طب مادام شايف ان التأمين حرام مش شايف انك تعتدي علي بني ادم بأيدك حرام برضو عليك كمسلم؟!!
انا شايف ان التأمين بيحفظلي مالي و ممتلكاتي عند حدوث حادث
و المفروض ان ديننا الاسلامي بيحفظ برضو الحقوق و الممتلكات لأن لو الواحد محسش ان عرضه و ماله و ممتلكاته بأمان ساعتها الدنيا هتبقي غابه و كله هيقتل في كله
و برضو افتكرت حديث شريف عن الرسول صلي الله عليه و سلم بيقول
من مات دون عرضه او ماله او ارضه فهو شهيد
طيب مش مالي ده اللي بيتسرق مني ساعه ما حد يخبطني و الغلط منه و انا واقف اتفرج!!!!!
ياريت حد يناقش الكلام ده