طيب انا نفسى فى 2 زى دول اطلع عنيهم وعين.........................
عرض للطباعة
طيب انا نفسى فى 2 زى دول اطلع عنيهم وعين.........................
انا خرجت ليلة راس السنة مع صحابي
و مع إننا كنا راكبين عربية إلا إننا بدون أي مبالغة في الأرقام .. و في خلال ساعتين فقط
قابلنا 11 ديلر حشيش و مخدرات بأنواعها، 6 قوادين، 4 بيقولولنا إن عندهم خمرة مستوردة غير المصري .
و كل ده في الشارع و هما اللي بيقفوك .. و ده و إنت في العربية .. انا مش متخيل لو كنا علي رجلينا كنا قابلنا كام واحد .
بعد كدة رحنا حفلة في المعادي .. أول ما دخلت واحد معرفوش من اللي في الحفلة لقيته إداني جوينت حشيش في إيدي و بيقولي خد كمله انا إتعميت :120146b
و سلملي عالأمن .
ده يا جماعة لما بروح الساحل و أغلط و أقلب نور عالطريق، تلاقي بتوع المخدرات بيجروا وراك ، يا جدعان انا بقلب نور للي قدامي .. و هما عايزين يوقفوك يبيعولك حشيش برضه .
بس بصراحة الموضوع عجبني و بقيت أقلب نور بالقصد عشان أسحلهم ورايا :satelite:
وفعلا الموضوع ده بقى حاجه فوق الفظيع لان الموضوع ده حصل مع اثنين من صحابي وكان بالليل في المعادي بعد العشاء وكانو بيتمشو طلع عليهم ثلاثه بلطجيه وخدو ساعاتهم وفلوسهم وسابوهم وجريوا ...........
طبعا لو صحابي مسمعوش الكلام ووقفو كان ممكن لاقدر الله واحد فيهم او الاثنين ميكونوش معانا انهرضه .................
ربنا يصلح حالنا لان العمليه زايده عن الحد............
ههههههههههههههههههههههههه ههههه
طبعا انت اللى مزعلك فى الموضوع انة مش دخانة كويسة
ههههههههههههههههههههههههه ههههه
طيب ادينى عنوانك وانا ابعتلك حتة كويسة هتخليك متعرفش بيتكم ولا الشارع ولا البلد كلها
على فكرة الموضوع دة بقى فعلا منتشر جدا و اخد منحنى خطيييييييير
واحد صاحبى موثوق فى كلامة حكالى ان قريبة تعرض لاعتراض جديد من نوعة
ماشى بالعربية - لقى تلات شباب واقفين بعرض الطريق ومعاهم عصاية اخرها سلسلة معلق فيها كرة حديد صغيرة ( تخيلوا)
ولما خاف منهم ومرضيش يقف جرى بالعربية راحو خابطين العربية بالكرة الحديد بس الحمد للة مفيش خساير غير الزجاج الخلفى
الكلام دة هنا فى المنصورة فى طلخا بالتحديد
انا من ساعتها وانا بشك فى هدومى ومتوقع فى اى وقت حد يعترضنى
ربنا يستر
نصيحة لوجه الله عن تجربة شخصية قبل كدة حدثت بالصدفة البحتة :-
الي بيقف يثبتك في الشارع بيبقى قلقان منك لانه مش عارف رد فعلك و لا يعرف انت بتشتغل ايه علشان كدة ما تخفش خالص و خش بقلب ميت
الموقف الي حصلي :-
كنت في سنة أولى جامعة و نزلت باليل الساعة 2 علشان كنت عايز اكل برة البيت و كنت ماشي لوحدي في اول فيصل و لقيت واحد قاعد على عربية و شكله مش عاطفي و لقيته بيندهلي و جاي عليا ( انا في الفترة دي كنت بلبس سلسة دهب بس الحمد لله ربنا تاب عليا )
المهم مش عارف ايه الي خلاني اقف اشوفه عايز ايه حاجة كدة من عند ربنا وقفتني علشان اكلمه
المهم لقيته بيقولي انا لسة خارج من السجن و مش معايا فلوس و عايز 20 جنيه و انا مستعد أخش السجن تاني لو مخدهاش
قو لتله ما كنش يتعز يا نجم و الله و على فكرة انا مدخلتش السجن قبل كدة بس نفس اجرب الموضوع ده
راحد حاطط أيده على كتفي و مش بيا في شارع جانبي و انا مشيت معاه عادي خالص ( محدش يسألني انا رديت كدة ازاي او مشيت معاه ليه انا كنت بعمل كل ده و انا مش حاسس كأن شئ بيحركني و لساني بيتكلم لوحده ) و لقيته بيطلعلي مقبض سيف من البنطلون بتاعه علشان يهددني انا سبحان الله و الله و لا اتهزيت قولتله و بعدين يعني اناقولتلك الي عندي ما فيش فلوس لو عايز تشوف مين الي نفسه يخش السجن قولي و نعيش مع بعض و نشوف مين الي يخش السجن
قالي قشطة يا برنش انت منين قولتله بتسأل ليه يعني قالي عادي يا نجم
قولتله من هنا من اول فيصل
قالي اسمك ايه قولتله اشرف العدوي
قالي و انا اخوك أشرف عنتر :confused::confused:
( أشرف عنتر ده واحد كدة سمعته سبقاه اي خناقة اي سطو مسلح تجارة مخدرات تلاقي اسمه فيها هو ساكن في حتة اسمها ابو قتادة و لو كان قالي انه اشرف عنتر من الاول كنت اديته كل الي في جيبي و كنت ممكن كمان اقلعلو هدومي لو كان محتاجها )
بس كل ده حصل علشان اتعلم موقف معين و زي ما قولت قبل كدة انا كان في حاجة هي الي ممشيان و حاجة هي الي بتخلي لساني يتكلم
انا مش قلبي ميت و لا حاجة بس ربنا حطني في الموقف ده علشان اتعلم ما اخافش من حد غير من ربنا و بس
علشان كدة اي واحد بيحيب يبلطج او يعيش اللحظة او حتى بيحاول يقلب حد في الشارع بدخل على طول من غير خوف و من غير زعيق و لا حاجة
بتلاقي الي بيطنطت ده مش عارف يهرب ازاي
دي نصيحة وموقف حصلي قعدت احلل فيه شهور لحد ماو وصلت للنتيجة دي
و محدش يخاف من حد الي عايز يقلبك حاول انت تقلبه
:k48: :C_laugh[1]:
فعلا يا جماعة موضوع الأمن ده بقى مشكلة كبيرة ومش شرط عشان السرقة بس لأ ده للبلطجة حتى الحوار بين اللى سايقين فى الشوارع بقى كله بلطجة فى بلطجة وانا كنت عامل موضوع عن انتشار البلطجة فى الشوارع والرابط بتاعه هو ده
http://www.nilemotors.net/Nile/showthread.php?t=44940
على فكرة لما سألت اشرف عنتر ده ( احنا بقينا صحاب فترة يعني بنسلم على بعض و كدة لما نقابل بعض في الشارع )
قولتله انت ما بتخافش من البوليس او الشرطة قالي حكمة هما شغالين بيها
( الحكومة سند الضعيف )