السلام عليكم

ان شاء الله ناوي اشتري عربية خلال الشهرين القادمين, عائلتي كبيرة و مضطر اشتري عربية 7 راكب, و أنا مش داخل دماغي خالص اللوجان و الأفنزا.

و بافكر اليومين دول في الجراند تريوس ال 7 راكب, أنا عارف انها تقفيل أندونيسي. و كان عندي شوية اسفسارات و ياريت كل من يستطيع المساعده ان يفيدنا بخبراته خصوصا ملاك العربية و طبعا الأخ أبو عبد الله, و ياريت كل من يشارك في هذا الموضوع ان تكون له خبره كافيه بهذه العربية, حتى تعم الفائده و نتجنب المعلومات الغير دقيقه التي تسبب حيره لكل من هو جاد في معرفه حقيقة هذه العربية.

معلش اسف على الاطالة نخش في الاستفسارت:

1- العربية تقفيل اندونيسي, هل في مشاكل في التقفيل و هل في اختلافات كبيرة بينها و بين الياباني من حيث الجوده و خامات التقفيل.

2- هل في مشاكل في السحب خاصة انها أثقل شويه من ال 5 راكب.

3- انا شوفت الفتيس الاتوماتيك في العربيتين و لاقيتو مختلف !!! المسار متعرج في ال 7 راكب, مش عارف ليه, و الصراحه كنت عايز اعرف اذا كان في حد قابل مشاكل في الفتيس ده ولا لأ, هو طبعا مافيش مشكله أن مساره مختلف بس المهم ان الواحد يتأكد انه مافهوش مشاكل

4- هل في مشاكل في الثبات, خاصة ان في موضوع كان عن ان 4*4 بيدي ثبات جامد و ده مش متوفر في الجراند تريوس.

و لو في اي ملاحظات اخرى ياريت تنورونا بيها و جازكم الله خيرا و جنبكم الحيره و الف شكر.