و بدأ مسلسل المتاعب فى بروتون بيرسونا -الحلقة الثانية

**hadota_masreya** · 15-01-2009 10:49 AM

سلام عليكم
يا جماعه انا كنت بدعى انه يبقى حلقة واحده - لكن شكله كده هايعمل زي مسلسلات رمضان - ربنا يستر
النهارده الصبح دورت و سخنت و بعدين اتكلت على الله اتحركت
انا بطبيعة الحال ماشى فى شارع مكسر (شارع بيتنا) و بعدين شغلت السى دى شويه و بعدين بغير السى دى و أول مالصوت وقف - ابتديت اسمع صوت تانى غريب
صوت كأن العربية فيها برميل مياه من ورا و قاعد بيلق
صوت جاي من ورا يمين
الصراحه فعلا اكتأبت على الصبح كده و حسيت ان المسلسل فعلا كده هايبتدى
مش عارف يا جماعه الصوت ده منين ولا اروح لمين و لا اعمل ايه
انا شكيت فى نفسى و قولت يمكن فى اي زجاجة مياه انا سايبها ولا تحت الكرسى واقعه ولا حاجه
لكن مالقيتش اي حاجه خلاص ولا حتى فى الشنطه
ده علاوة على انى حاسس ان العربية مش مظبوطة من ورا - و بعدين قولت علشان برضه اتأكد ان مافيش حاجه فى العفشة او كده و انا رايح الشغل زودت شويه لغاية لما وصلت لـ 170 و العربية كانت الحمد لله ستيبل
بس مش عارف موضوع صوت لقلقة المياه اللى جاي من ورا يمين ده ايه و كأنى بسمع صوت البنزين اللى فى القربه

مش عارف الصراحه ياريت اللى عنده حل يقولهولى و جزاكم الله كل خير
يارب مايبقى فى حلقة تالته ياااااااااااااااااااااااا اارب

**ahmed_su** · 15-01-2009 11:00 AM

الحقيقة انا مش عارف مواصفات العربية

انما توقعى للوصف اللى بتقوله انه يكون صوت

البنزين فى التنك , وده ممكن يحصل فى بعض انواع

تنكات البنزين لما مستوى الوقود يوصل لحد معين

وبيبان صوته مع حركة السيارة - ننتظر اراء باقى الاعضاء.

**aapaap855** · 15-01-2009 06:24 PM

لو صوت لقة في المطبات او الحتت المكسرة من ورا
دة صوت standard بينزل في كل البيرسونا والجين 2 ودة بسيط
من الكنبة الي ورا (بيعملوها في التوكيل ) بيلفوا حتة شيكارتون على حديدة ورا الكنبة بيروح الصوت

عادي
كلنا حصلنا كدة
لو محصلكش الصوت دة لازم تقلق
بس مدام حصلك اطمن

**hadota_masreya** · 15-01-2009 09:39 PM

لا الصوت ده يا باشا حصل و حلوه فى صيانة الالف - و الغريبه انهم عملوه من غير ماقولهم

لكن انا الصوت بتاعى كأن فى مياه جوه جركن و بتلقلق مع المطبات

**gagareen** · 15-01-2009 09:44 PM

إن شاء الله بسيطه طالما جت فى الصوت ده
اللى ظهر قبل كدا هنا كان الصوت ده من الجهه الاماميه مش من الخلف وكانت الاراء ممكن صوت الفريون بتاع التكييف او سريان البنزين ناحيه الموتور
طالما انت بتقول انه من الخلف يبقى الاحتمال الاقرب زى ماقال الاخ احمد يمكن من خط البنزين اللى جاى من التنك فعلا بطريقه ما

اسال فى التوكيل لو الصوت مزعج وبيظهر كتيير

تحياتى

**ahmed_h_g** · 16-01-2009 10:51 AM

الصوت ده أكيد صوت تانك البنزين أنا متأكد
عايز تتأكد فول بنزين هيروح معاك لغاية ما تستهلك نصف التانك
ده مش عيب ولا حاجه الموضوع ده فى كل البروتون وهو سماع صوت البنزين وهويتحرك داخل التانك .
تانك البنزين مصنوع من مادة خفيفه ولكن شديدة الصلابه علشان تعادل وزن السياره عند ملئ التانك وجرب علشان تتأكد

**MohabSaeed** · 16-01-2009 11:42 PM

انا بأكد على كلام الاخوه الى قالو ان الصوت مصدره تنك البنزين
اعتقد بنسبه 99,9 % ان ده مصدر الصوت .

بس الصوت ده المفروض مايظهرش , لان تانك البنزين المفروض انه تحت الكنبه الخلفيه مابين الاكس و غير كده بيبقى فى عازل " بيكتم الصوت " تحت الكنبه
الصوت ده انا بسمعه فى ال131 لان التنك فى الشنطه و اماكن السماعتين الى ورا مفتوحين و علاشان كده بسمع صوت البنزين مع الملفات و المطبات
لكن فى عربيتك اعتقد فى حاجه مش مظبوطه حاول ترجع للصيانه و تكشف على الموضوع .

**Ghamrawy** · 17-01-2009 01:01 AM

فعلا موضوع صوت البنزين و هو بيلق جوه التنك ساعات بيبقى عامل زى صوت معدة واحد طفس اكل كتير و شرب مياه كتير و معدته بتلق زى القربة و انا ارجح الاحتمال ده
وفى احتمال تانى و انا مجربه عن تجربة شخصية و هو ساعات لما الدنيا بتمطر أو بعد غسيل العربية فى محطة البنزين بخرطوم مياه ضغط عالى المياه بتنزل جوه الباب من جوه و لو المجارى اللى فى الباب من تحت مسدودة المياه بتفضل متحوشة جوه و بتعمل الصوت ده....جرب افتح الباب و هزه و اسمع كويس لو لقيت فعلا فى مياه متحوشة عليك و على دبوس رفيع و انزل تحت الباب و دور على الفتحات و نضفها